Husiya 13 - Udél Dwata: Gna Kesfasad ne Lomi Kesfasad

Hol són ktafak Dwata yó kem tau Israél

¹ Bè yóm gnan kdaw ke gel le mudél yó kem ból Ifraim, gotu le likò yó kem dumu tau Israél abay se nadat le Ifraim. Okóm yó kem ból Ifraim yó, deng le mom gemsalà lemwót bè yóm ktaba le ebè Baal ne lemwót bè yóm nmò le ni gónó le angat gotu meglà.

² Tódô senflós le mò salà bè yóm gel kmò le dwata kéng lemwót bè blówón bukay mò gónó le tmaba dwata nmò le lemwót bè kehedem tau ne nmò tdok tau. Yó udél le, “Demsù ye ebélê le ne nelek ye lu ni kem safì lennged ni.”

³ Yó gónóm mon angat le gotu lana ni kem tau ni lómón lobun ke hlafus, tódô kmanas ne lómón ke amù, tódô lana bè nóng kdaw ne lómón ke ubek holis bè lenos, là bud tonem du ne lómón kebel ofi tódô lana.

⁴ “Ou se yóm sana kuy Dwata hol gónó mogot, yóm deng tehe lemwà kuy gu bè Idyip yóm benwu tehe gónó ye ghesek. Laen dù dumu Dwata ye, tek sónen o. Laen dù dumu lemwà kuy, tek sónen o.

⁵ Tehe tey kesgifau kuy lem yóm benwu là hyu menwu du, benwu alì mékéng.

⁶ Okóm timbow ye deng gusek bè yóm tey tonok hyu ne deng wen ken ye ne deng ye bsow, deng ye mom baling hegmón, deng mom klifót ye o.

⁷ Duhen yó, angat gotu kenfóu yu, hol lómón kekfô yóm liyun dun ke lipard, yóm tendo lemfen hmékét gu bak lan.

⁸ Lómón kmò ksék yóm bér ke nwa le béléen kem ngaen, lómón yó se kséku kuy. Naw gotu somok yu lómón ksomok liyun sok bitil.

⁹ Ó kem tau Israél, móyón genlau yu ne. Tau du de tô gembek tmóbóng kuy?

¹⁰ Gónóhen nô de yóm tau hol geta bélê ye anì du lemwà kuy? Dalang se yó kem genlal bè benwu ye, nô se lu du anì tnóbóng le yu? Tehe hni ye lu béléu se mò malak kuy.

¹¹ Igou tehe lembut bè yóm kni ye yó, igoen wen kem tau hol geta blayu kuy. Ne lemwót bè utó nawaw kuy, bud kóhu lu lem blóng ye.

¹² Deng gotu hsulatu yóm kdéen salà ye ne deng henyu le.

¹³ Deng wen lan le bud mowil yó kem tau Israél, okóm là móyô le du. Tey le nungel. Hol le mkél bè yóm ngà móyón sut gu lem blutut yéen, là dogen gewà gu lem balayen.

¹⁴ Sawang tô nsoku lu gu lem lebeng? Book. Sawang tô lenwau lu gu lem hatay? Là. Ó hatay, gotu heglumfakem kul yóm kdê hlayamem. Ó lebeng, hol hnikoem lu. Laen dù bud koduhu kul ne yó kem tau yó.

¹⁵ Anien ke lómón klobung kluon yóm Israél, okóm angat hwitu ebélê le yóm lenos kinì gu bè yóm benwu là hyu menwu du fi gu dmata kdaw anì gotu kti yó kem tbul él ne yó kem kokol le. Angat gotu negef yó kem hohon le yó kem kimu mebtes deng henyu le.

¹⁶ Yó kem tau bè Samarya angat gotu bud nuta le yóm kdê sidek deng nmò le lan le alì kmogol du yóm kul Dwata. Yó gfà le, angat gotu hnatay le lu yó kem sendalù husek bè benwu le, kkólen bè yó kem ngà lemnek angat le gotu matay lan le mbot kul te tonok. Ne kem libun mlutut bélê le, tódô gotu snifal tnibó le lu.”