Husiya 11 - Udél Dwata: Gna Kesfasad ne Lomi Kesfasad

Bud tulón Dwata yóm kbong nawahen yó kem tau Israél

¹ Yó udél yóm sana Dwata hol gónó mogot, monen, “Bè yóm hanà tolo kegenen ngà Israél, tey kbong nawahu du ne botong tnabahu gu bè Idyip yóm ngau logi yó.

² Okóm henlelu tmaba du, henlelen se kmogol do lanen demsù ebè yó kem lennged Baal ne mtem insinsu ebè yó kem dumu dwata lennged.

³ Igoen ou tehe tmolok ke Israél mógów, tendo nogotu bè sigelen. Okóm balù udì ke hendemen ke ou yóm tehe semgyok du.

⁴ Nalaku Israél lanen mayuk nawahu du ne mung du yóm tey kbong nawahu du. Kóhu béléen yóm kegheseken ne lekohonge etahen yóm igou hemken du.

⁵ Okóm lemwót bè yóm là kóyô le semfulék ebéléu yó kem dou tau, yó gónó le angat bud semfulék ebè yóm tehe keghesek le lómón yóm deng glan le bè Idyip, ne yóm tau hol geta bè Asirya angat mogot kul lemwót bè yóm alì kmò le sidek.

⁶ Angat wen gida bong tódô sut lem yó kem syudad le ne angat gotu genbà kem hohon le yó kem bak tikeb yó kem syudad le, omin le gotu gemlà yó kem tau nô lemen, gotu nmoen sónen yó kem sidek atul le.

⁷ Yó gónó le gemfà du yó kem yó abay se deng tahu nawa le kmogol do yó kem tauhu. Baluen ke bud le htóbóng béléu, ou yóm Hol Dandónen Geta, là kô bud kenmónu kul.

⁸ Ó kem tau Israél, mò tô keblayu kuy elem hólól yó kem hohon ye du? Mò tô kbayau kuy bélê le du? Là gbeku du ke sulék genlau yu lómón yóm tehe keglau yóm lewu kem benwu Adma ne Sibuim. Lebà nawaw ke yó tô nmou. Tey mget yóm kbong nawaw kuy.

⁹ Là. Là kô tnafaku kuy ke là lemwóten bè yóm alì sidek kebutu kuy. Là kô hensulék genlau kuy, kem tau Israél, yakà ou du yóm hol Dwata, là tauhe tonok. Ou yóm laen dù belenen tendo nô bélê ye. Là kô yó du nmou ke naw e hensulék genlà yu lemwót bè yóm tey kebutu kuy.

¹⁰ Angat wen kdawen ou se angat lolò yó kem tauhu. Bè yóm ktabahu kul, angate mngel lómón liyun ne gotu le mulék ebéléu yó kem tauhu mung du kkel le, lemwót le bè yóm benwu fi desdef.

¹¹ Tey kehlóng le mulék lemwót gu bè Idyip, lómón kehlóng yó kem onuk koyu móyóng. Bud le mulék se kul yó kem tau tehe nô bè Asirya lómón kehlóng le kóyóng obun. Ne bud nwitu lu mulék ebè yóm hol tahu kul benwu. Ou se yóm sana kul Dwata hol gónó mogot nim mudél ni.”

Kdelem Dwata yó kem tau bè Israél ne bè Juda

¹² Yó udél Dwata, monen, “Deng le tódô gotu slibut do yó kem tau Israél gel mò kéng béléu ne gel smukat do. Ne yó kem tau bè Juda tolo lel le he matù do, yóm Dwata alì mólós ne teneb bélê le.” Là gomongen bè nili yóm tsaptér 12. Yó tulónen bè yóm tsaptér ni yóm bud kbólów. Yóm heftulón Husiya bè nawa le yóm tehe nmò yóm tehe fù le Jakub ekni, hulung smukat se kun. Okóm yóm Jakub, kóyóen ke hol tngónen Dwata ne ke nuyag Dwata. Yó nmoen, heglaan bè Dwata ne hotuhen nawahen mimón du. Kóyô Husiya bè yó kem tau Israél ke hol lolò le yóm tehe nmò yóm tehe fù le Jakub, yóm keheglaanen knóen bè Dwata ne yóm khotuhen nawahen mimón du. Dwata malak ne kemlung yó kem tau Israel efet kól bè kdê lugod le, bede yó balà le du yóm là kimón ne kegsalà ne yóm katù le du.