Husiya 1 - Udél Dwata: Gna Kesfasad ne Lomi Kesfasad

¹ Bè yóm tehe kesetles le mogot yóm benwu Juda le Usaya ne Jutam ne Ahas ne Hisikaya, yó fen mogot yóm benwu Israél duhen Jirubuam ngà Jihuas logi. Bè yó kem halay yó wen htugod Dwata ke Husiya yóm ngà Biri logi.

Kyehen Husiya ke Gumér ne yó kem ngà Gumér gu laan

² Bè yóm tanay kehlan Dwata du ta Husiya yóm kudélen ebè kem tau Israél, yó monen mò du, “Ó Husiya lemwóti ne mebeli libun hdóyón mò yehenem, duhen yó, yó kem dumu ngaen lemwót bè dumu logi, angat le menmà béléem. Hol lómón yó se deng nmò le béléu yó kem dou tau, lómón ke hdóyón le lan le gel tmaba ebè yó kem dwata kéng.”

³ Tahu se, myehen Husiya, yehenen Gumér yóm ngà Diblaim libun. Ne mlutut Gumér ne mngà logi.

⁴ Ne yó bud mon Dwata mò ke Husiya, “Boluyem du Jisriil yóm ngaem sut yó, abay se móyón tnafaku yóm tau hol geta bè Israél mò beles yóm tehe kbonok yóm tehe fuen Jihu yó kem tey tau wen bè Jisriil. Angat lensónu yóm kogot le benwu yó kem sfu Jihu.

⁵ Bè yóm kdaw ktafaku kul yó, angat tenfoku boho yó kem tau Israél ditu bè Datal Jisriil anì là gemmò le ne laen dù bud kgis le gmida hulin kdaw.”

⁶ Là legenen bè yó bud mlutut Gumér ne mngà libun. Ne yó mon Dwata mò ke Husiya, “Boluyem du Lo-ruhama yóm ngà sut yó abay se là bud knoduhu kul ne yó kem tau Israél ne là se kô hnifótu yó kem salà le.

⁷ Okóm yó kem tau bè Juda, angat hegfanu bélê le yóm kkoduhu kul. Tódô ou angat lemwà kul lem tdok yó kem hohon le, bede là mlanen bè gida ne là mlanen bè boho le duhen ke bè sudeng le. Là mlanen bè yó kem tey kudà le duhen ke bè yó kem sendalù smakay kudà, bede mlan bè yóm dou kfasang yóm sana kul Dwata hol gónó mogot.”

⁸ Timbow senkó Gumér tmutù Lo-ruhama, bud mlutut ne mngà logi, yó se deng gewu ngaen logi.

⁹ Ne yó mon Dwata mò ke Husiya, “Boluyem du Lo-ammi yóm ngà sut yó, abay se là do tau du yó kem tau Israél ne là se kô ou du yóm kul Dwata.

¹⁰ Okóm angat kól yóm kdawen bè yó kem tau Israél yó, angat tey kwen le lómón helek bè kilil mohin, là gbekem msó kul. Ominen bè yóm benwu tehe gónó Dwata mon du mò kul, ‘Là do tau du,’ bud bè yó se angat gónó Dwata mon du mò kul, ‘Yu se hol kun ngà yóm Dwata laen tul katayen.’

¹¹ Ominen yó angat baling sotu benwu le yó kem tau bè benwu Juda ne yó kem tau bè benwu Israél ne sotu se tau nélék le mò mogot kul. Ne angat tey kból le ta yóm kul tonok. Ne angat tey kehligal bong bè yóm kdaw yó, yó se kun kdaw Jisriil.”