Hlolò 23 - Udél Dwata: Gna Kesfasad ne Lomi Kesfasad

Yó kem hlolò Dwata bè yóm gel kehligal le tmaba ebéléen

¹ Bud wen udél Dwata ebè Musis, monen mò du,

² “Hol tulónem yó kem tau Israél, wen mdengen kdaw le hligal stifun tmaba ebéléu. Yó kem kdaw yó, deng néléku mò hetfing le ebéléu. Ne gotu le stifun yóm kdê le kem tau Israél bè yó kem kdaw yó.”

Kdaw Kehegnô

³ Yó htulón Dwata ke Musis, monen, “Wen nem kdaw ye mò nmò, okóm hol bê ye abay klifót yóm ghituhen kdaw, yó se yóm kdaw ye hegnô. Bè yóm kdaw yó, béen abay wen bélê ye mò nmò bede hol ye stifun tmaba ebè Dwata. Balù kihu gónó ye nô sana ke Dwata du funen yóm ghituhen kdaw yó ne hol nadat ye.

⁴ Hol tulónem yó kem tau Israél, wen kem dumu kehligal bud hmou kul okóm hol nmò le bè yóm kdaw kehmou du kul.

Kehligal le bè Kdaw Khius ne bè yóm kken le du yóm mambang laen dù bulung henoken

⁵ Yóm tanay kehligal hmou kuy, duhen yóm kehligal ye mò du yóm ken bè Kdaw Khius. Yóm kehligal ye yó, hol nbut nmò ye bè sdef kdaw bè yóm gesfoloen fat kdaw bè yóm tanay bulón.

⁶ Hayahen bè yó duhen yóm gesfoloen limu kdaw, nbut ye ne mò du yóm kehligal ye mken du yóm mambang laen dù bulung henoken. Nbuten bè yóm kdaw yó, hitu kdaw ye là tagad mken du yóm mambang wen bulung henoken.Bè yóm hol tanay kdaw ye mò du, hol ye stifun tmaba ebè Dwata ne hol béen abay wen tagad mò nmò.

⁷ Bè yóm hol tanay kdaw ye mò du, hol ye stifun tmaba ebè Dwata ne hol béen abay wen tagad mò nmò.

⁸ Lem yóm hitu kdaw kehligal ye yó, tódô ket kdaw ye mit ken mò dsù hkekeb ye ebè Dwata. Ke deng kól bè yóm ghituhen kdaw, bud ye stifun tmaba ebè Dwata ne hol béen abay wen tagad mò nmò.

Kehligal Kminì

^9-10 Ke deng ye kól ta yóm tonok blay Dwata kuy ne ke deng bang ye muta, hol nit ye ebè yóm tau blóng ebè Dwata yóm hol tanay logom ye.

¹¹ Du fen bemlay du ke Dwata yóm basa ye du yó anì henmóyô Dwata. Bede yó he keblayen du ke Dwata senta yóm Kdaw Kehegnô.

¹² Bè yóm kdaw keblay ye du ke Dwata yóm tanay logom ye, hol homong hkekeb ye béléen yóm sotu ngà ubiha logi hanà sfalayen, yóm laen dù óngóhen.

¹³ Ne bud henmung ye lewu kilu arina bnool hnolo ulib mò dsù hkekeb ye ebéléen. Ne bè boo yóm dsù ye yó, hligal du Dwata. Ne bud henmung ye sotu litru yóm tifas grép gel ninum alì mnóm.

¹⁴ Ke là na ye gna nmò du yóm blay ye ke Dwata yó, hol bê ye tagad ken yó kem lomi nuta ye, baluen ke tolo matak duhen ke deng senla ye duhen ke deng baling mambang. Yóm hlolou kuy yó, angat bud lolò yó kem semfu gu bélê ye ne laen kô dù tul sónen yóm klolò le du.

Kehligal bè Kuta

¹⁵ Ke sok deng yóm Kdaw Kehegnô, yóm kdaw kwit ye du ebè Dwata yóm hol tanay logom ye, hayahen bè yó msó ye hitu fedyan.

¹⁶ Bè yóm kdaw senta yóm hitu fedyan yó, yó se yóm glimuhen folò kdaw. Bè yóm kdaw yó, blay ye ebè Dwata yóm lomi bud nuta ye.

¹⁷ Ket kmuleng, wen lewu botu mambang lembang nwiten mò basa le ke Dwata. Bè yóm kmò le du, sal lewu kilu arinahen yóm sotu mambang ne wen bulung henoken. Ni se yóm mambang lemwót bè yóm lomi nuta ye mò basa ye ke Dwata.

¹⁸ Yó hmung kdéen tau Israél du yóm mambang yó, hitu ubiha hanà sfalayen ne sotu safì tuduhen ne bud lewu kem ubiha logihen, bede yóm laen dù óngó le. Yó se yóm dsù hkekeb ye ebè Dwata ne wen halay hmung ye du mò blay ye ne bud henmung ye yóm kuy gel ninum. Yóm boo yóm dsù ye yó hligal du Dwata.

¹⁹ Bud ye bemlay sotu kambing logi mò dsù ye bè salà ye ne lewu ubiha logi hanà sfalayen mò dsù ye bè yóm gel kestifun ye hligal lemwót bè yóm deng kessotu ye bè Dwata ne bè dumu tau.

²⁰ Lemwót yóm tau gel blóng ebè Dwata, du mit du ebè Dwata yóm mambang blay ye yó koni, mung du yóm lewu ubiha logi hanà sfalayen mò basa ye ke Dwata. Yóm dsù ye yó, tey mólós kton Dwata du ne yó kem tau blóng ebè Dwata fen mken du.

²¹ Bè yóm kdaw yó, hol béen wen tagad mò nmò okóm hol ye stifun tmaba ebè Dwata. Yóm hlolò Dwata kuy yó, angat bud lolò yó kem semfu gu bélê ye balù kihu gónó le nô. Ne laen kô dù sónen yóm klolò le du.

²² Ke sok bang ye muta, hol bê ye abay nuta yó kem halay nô hilol kilil ne bê ye abay senfulék noyok yó kem dù tebel. Tebel ye lu bè yó kem tau élél ne bè yó kem tólóng tau menwu lem blóng ye. Ou se yóm sana kuy Dwata hol gónó mogot.

Kehligal bè kbut yóm lomi halay

^23-24 Bè yóm tanay kdaw bè yóm ghitun bulón, yó se yóm hol kdaw ye hegnô, kdaw deng hetfing Dwata mò kun. Ke sok gungol ye yóm tey uni féw segeng gotu ye stifun tmaba ebè Dwata.

²⁵ Mit ye ken mò dsù hkekeb ye ebéléen ne hol béen abay wen tagad mò nmò.

Yóm kdaw kkó Dwata salà

^26-27 Bè yóm gesfoloen kdaw bè yóm ghitun bulón, yó se yóm kdaw klolò ye du yó kem hlolò bè kehkó ye salà ye. Bè yóm kdaw yó bê ye tagad mken, gotu ye stifun tmaba ebè Dwata ne mit ye ken mò dsù hkekeb ye ebéléen.

²⁸ Hol béen abay wen mò nmò bè yóm kdaw yó abay se yó yóm kdaw klolò ye du yóm hlolò bè kehkó salà.

²⁹ Ke wen tau mken bè yóm kdaw yó, là buden gomong bè yó kem kun tau Dwata ne yóm tau yó.

³⁰ Ne ke wen tau mò nmò bè yóm kdaw yó, ou se hmatay du.

³¹ Yóm hlolò ni, hol bud lolò yó kem semfu gu bélê ye balù kihu gónó le nô.

³² Lenwóten bè sdef kdaw bè yóm gesyómen kdaw bè yóm bulón yó efet bud kól bè sdef kdaw bè yóm gesfoloen kdaw, yó se hol Kdaw Kehegnô. Ne béen abay wen tagad mken bè yóm kdaw yó.

Yóm Kehligal bè Slung

^33-34 Yó kmò kbut ye du yóm Kehligal bè Slung, nbut ye bè gesfoloen limu kdaw bè yóm ghitun bulón ne hitu kdaw ye kegen ye mò du.

³⁵ Bè yóm hol tanay kdaw, gotu ye stifun tmaba ebè Dwata ne hol béen tagad wen mò nmò.

³⁶ Lem yóm hitu kdaw yó, ket kdaw ye mit ken mò dsù hkekeb ye ebè Dwata. Ke deng kól bè gwoluhen kdaw, bud ye stifun tmaba ebéléen ne bud ye mit ken mò dsù hkekeb ye ebéléen. Yóm gwoluhen kdaw yó, hol kdaw ye stifun tmaba ebè Dwata ne laen dù tau tagad mò nmò.

³⁷ Ni se yó kem kehligal ebè Dwata tulónu kuy mò gónó ye hegfan du yóm tey kadat ye ke Dwata mlan bè yóm gel kestifun ye tmaba ebéléen ne mlan bè yó kem gel dsù hkekeb ye ebéléen, yóm ken ne halay ne ógóf ne gomong yóm gel ninum ye, hono kem dsù hkekeb ye ebè Dwata bè yó kem kdaw kehmoen du kuy.

³⁸ Yó kem kdaw kehligal monu yó koni mò tnù yóm gel kestifun ye bè yóm Kdaw Kehegnô bè yó bè kuy gónô. Ne yó kem blay ye ke Dwata yó koni mò tnù yó kem halay gel blay ye du bè Kdaw Kehegnô ne mò tnù yó kem gel blay ye ke Dwata lemwót bè yó kem tehe fasad ye du, ne mò tnù yó kem gel blay ye ke Dwata, yóm blay tódô lemwót bè kuy nawa.

³⁹ Duhen yó, ke sok deng gotu kuta ye kul yó kem nuta ye nmò ye yóm Kehligal bè Slung. Hitu kdaw kegen ye sbung hmigal du nbut ye bè gesfoloen limu kdaw bè yóm ghitun bulón. Yóm hol tanay kdaw ne bè yóm hol són kdawen, yó se yóm hol kdaw ye hegnô.

⁴⁰ Bè yóm hol tanay kdaw nit ye yóm hol hyu bè yó kem bungu koyu ye. Ne bud ye mit doun lefò dalang se yó kem hanga koyu alì dmoun bélê ye mò ngom slung ye. Omin ye yó mbut du yóm kehligal gónó ye madat yóm sana kuy Dwata hol gónó mogot.

⁴¹ Hitu kdaw ye kegen ye mò du yóm kehligal ni. Yóm hlolò ni, hol bud nulit lolò yó kem semfu gu bélê ye ne laen kô dù tul sónen yóm klolò le du.

⁴² Lem yóm hitu kdaw yó, tódô kdê yó kem tau Israél gotu le nô lem slung.

⁴³ Yó gónó ye mò du yóm yó anì tngón yó kem lugod ye yóm tehe knô le bè slung yó kem fù le ekni bè yóm tehe kehewà Dwata kul gu bè Idyip. Du se yóm sana kuy Dwata hol gónó mogot.”

⁴⁴ Tahu se, gotu tulón Musis bè kdéen tau Israél yóm kdê hlolò Dwata kul bè yóm kmò kehligal le tmaba ebéléen mò gónó le hegfan yóm kadat le yóm hol kul gónó mogot. Là gomongen bè nili yóm tsaptér 24 kól bè tsaptér 27. Tulónen yóm hlolò Dwata yó kem tau gel blóng ebéléen bè yóm kmò le nmò lem yóm kun Gónô. Bud tulónen yóm hlolò Dwata kul gbak bè yóm tonok yó kem tau Israél anì hol tembas. Tulónen snéen yóm tey któbóng Dwata kul ke nimón le yóm kdê hloloen kul ne yóm kmò ktafaken kul ke snonol le.