Hlolò 19 - Udél Dwata: Gna Kesfasad ne Lomi Kesfasad

Yóm hlau Dwata bè khólós ne bè kogot kukum

¹ Yó bud mon Dwata mò ke Musis,

² “Tulónem yóm kdéen tau Israél yóm udélu ni, monem mò kul, Hol béen abay wen belen ye, yakà ou du yóm sana kuy Dwata hol gónó mogot, yóm laen kô dù belenen.Yóm ket sotu bélê ye, hol nadaten maen ne yéen ne hol loloen yóm hlolò bè Kdaw Kehegnô lómón yóm deng hlolou kuy. Ou se yóm sana kuy Dwata hol gónó mogot.

³ Yóm ket sotu bélê ye, hol nadaten maen ne yéen ne hol loloen yóm hlolò bè Kdaw Kehegnô lómón yóm deng hlolou kuy. Ou se yóm sana kuy Dwata hol gónó mogot.

⁴ Bê ye abay knogol ou ke tô lan ye tmaba ebè yó kem dwata lennged. Bê ye abay temwél yó kem dwata lennged ke mò gónó ye tmaba. Ou se yóm sana kuy Dwata hol gónó mogot.

⁵ Bè yóm gel khatay ye yóm ógóf dsù ye mò ken ye bè yóm gel kestifun ye hligal lemwót bè yóm deng kessotu ye béléu ne bè dumu tau, hol lolò ye yó kem deng hlolou kuy. Ke lolò ye, henmóyóu yóm ógóf dsù ye yó.

⁶ Bè yóm kken ye du yóm ógóf yó, hotu ken ye bè yóm kdaw khatay ye du duhen ke hayahen bè yó. Ke wen dù tebel du bè yóm getluhen kdaw, tódô gotu hkekeb ye

⁷ abay se là buden mólós ne ktonu du. Ne ke wen tau mken du yóm dù utón yó, là kô henmóyóu du yóm dsù ye.

⁸ Ke wen tau mken du, deng lenemegen ne yóm deng hetfing ye ebéléu. Ne yóm tau lememeg mken du yó, là kô bud dou tau du ne.

⁹ Ke deng bang ye muta, bê ye abay nuta yó kem halay nô hilol kilil ne bê ye abay bud senfulék nuta yó kem oyok.

¹⁰ Ne bè yóm gónó ye mulu grép, hol bê ye abay bud semfulék e du ke tô bud nebel ye yó kem grép tehe là ton ye du, duhen ke tô bud nulut ye yó kem grép tehe btang ebè tonok. Tódô tebel ye lu bè yó kem tau élél ne bè yó kem tólóng tau nô lem blóng ye. Ou se yóm sana kuy Dwata hol gónó mogot.

¹¹ Bê ye abay mnagaw. Bê ye abay smukat. Ne bê ye abay mò kéng.

¹² Ke wen fasad ye, hol bê ye abay safà boluyu. Ke là dnohò ye du, olo ye hemyak yóm dou boluy. Ou se yóm sana kuy Dwata hol gónó mogot.

¹³ Bê ye abay leningko kem dumu ye ne béen abay wen hennagaw ye bélê le. Bê ye abay nanggà efet kól haya sukéy yóm tau mò nmò bélê ye.

¹⁴ Bê ye abay hentolo yóm tau bokong ne béen abay wen sù ye bè lan yóm tau butô ke mò gónón tlokob. Hol knikò ye o. Ou se yóm sana kuy Dwata hol gónó mogot.

¹⁵ Ke wen knukum ye, hol nfi ye yóm tahu ne yóm tedeng. Bê ye nfi yóm tau élél ke là tahuhen yóm ndaen. Ne bê ye abay nfi se yóm tau wen boluyen ke là tahuhen se yóm kun ndà.

¹⁶ Bê ye abay tódô lenbù tnulón kéng kem dumu ye. Ne ke wen tau tô kukum le du hatay, hol tulónem bè kukum ke wen tngónem gónóm gemtóbóng du. Ou se yóm hol gónó mogot.

¹⁷ Bê ye senmò knutó nawa kem dumu ye. Ke uu yóm sotu tau knutó nawahen gu lem kem dumun, yó nmoem miti sefyu béléen bè yóm gónó ye seglius anì là gemsalai bè Dwata lemwót béléen.

¹⁸ Bê ye bneles yóm tau mò sidek bélê ye duhen ke henlós ye kmutó du nawa. Yó dé nmò ye, kenbong nawa ye kem dumu ye lómón kbong nawa ye yóm kuy knô. Ou se yóm hol gónó mogot.

¹⁹ Hol nimón ye yó kem dou hlau kuy. Bê ye abay senfebô lu yó kem ógóf stólóng kay le. Bê ye sensotu gónó ye mulu du bè tonok ye yóm stólóng kay lem hulu. Bê ye abay lesek yóm nes là senged kay holuhen.

²⁰ Ke wen libun hesek deng leninti yóm sotu logi, okóm yóm logi deng leminti du yó, là nan gna nsok du lem yóm kegheseken ne ke wen dumu logi smamuk du, wen tafak le bede là hatay du abay se hanà tolo ghesek he yóm libun yó.

²¹ Yóm logi smamuk du yó, yó mò bayaden yóm salaen, hol mit sotu ubiha logi ebè bak dól yóm dou Gónô.

²² Mlan bè yóm ubiha logi yó, lemwót yóm tau gel blóng ebéléu, du fen mò du yóm kmò khólós anì mkó salà yóm logi yó ne yó se gónóhu hmifót du.

²³ Ke deng ye kól bè benwu Kanan ne wen kem koyu mungu hulu ye, tlu halay kegenen là mólós ktonu du bungu yóm koyu yó. Lem yóm tlu halay yó, hol bê ye abay tagad ken yó kem bungu le.

²⁴ Bè gfaten halay, tódô kdê yó kem bungu le gotu blay ye dou mò gónó ye hegfan du béléu yóm nawa ye. Ou se yóm hol kuy gónó mogot.

²⁵ Okóm bè yóm glimuhen halay, hyu ne kken ye kul yó kem bungu koyu ye. Ke hol lolò ye yó kem monu yó angat tey kbungu le yó kem koyu ye. Ou se yóm sana kuy Dwata hol gónó mogot.

²⁶ Hol bê ye abay ken yóm utón tolo nô du litóen. Hol bê ye abay nmò yóm kul gel nmò yó kem tau wen lamaten ne yó kem tau mton bù.

²⁷ Bê ye abay gnunting yóm wek bè langi ye, dalang se yóm bnget ye.

²⁸ Bê ye abay tnugéng knô ye duhen ke tô hnalì ye lówó ye ke mlan bè klangag ye. Ou se yóm hol gónó mogot.

²⁹ Bê ye abay henyak yó kem ngà ye libun ke nmò ye lu kem libun hdóyón. Abay se ke nmò ye yóm yó, angat tey dê tau bè benwu ye gbót smamuk, baling hono sidek lem yóm benwu ye.

³⁰ Hol lolò ye yóm hlolou kuy bè Kdaw Kehegnô ne hol nadat ye yóm gónô gónó ye gel tmaba ebéléu. Ou se yóm hol gónó mogot.

³¹ Bê ye abay hmungol hlau bè yó kem tau gel tmaba bè lemogol. Ke nmò ye yóm yó, là buden mólós ktonu kuy. Ou se yóm sana kuy Dwata hol gónó mogot.

³² Hol nadat ye yó kem tuha bélê ye. Hol nimón ye o mlan bè yóm klikò ye dou. Ou se yóm hol gónó mogot.

³³ Bê ye abay hensidek kmò ye ebè yó kem tólóng tau nô lem blóng ye.

³⁴ Hol lómón kmò ye kul lómón ke kuy dumu Israél, ne hol kenbong nawa ye lu lómón kbong nawa ye yóm kuy knô. Hol hentulón nawa ye yóm tehe któlóng ye tau bè Idyip se kuy. Ou se yóm sana kuy Dwata hol gónó mogot.

³⁵ Bê ye abay leningko kem dumu ye ke wen hbalù ye. Bê ye abay kmulang ke wen bentes ye dun ke wen tnimbang ye dun ke wen gnantang ye.

³⁶ Timbangem yóm timbang là kmulangen ne yóm btes tahu btes. Ou se yóm sana kuy Dwata hol gónó mogot yóm deng mit kuy hewà gu bè Idyip.

³⁷ Hol gotu nimón ye yóm kdê hlauhu kuy ne yóm kdê hlolou kuy. Ou se yóm hol gónó mogot.” Là gomongen bè nili yóm tsaptér 20 kól bè tsaptér 22. Tulónen yóm kmò ktafak Dwata yó kem tau là mimón du yó kem hloloen kul. Tulónen snéen yóm hlolò Dwata yó kem tau blóng ebéléen anì mólós ktonen kul. Bud tulónen snéen yóm hlolò Dwata kul gbak bè yó kem gel kedsù le ebéléen.