Hlolò 16 - Udél Dwata: Gna Kesfasad ne Lomi Kesfasad

Yóm kdaw kkó Dwata salà

¹ Kogol yóm khatay Dwata yó kem lewu ngà Aron logi lan le tódô temsob mò du ebè Dwata yóm ofi là hmoen du kul, bud mudél ebè Musis Dwata, monen,

² “Hol tulónem ke Aron yóm twoguhem, béen tódô óyô husek elem yóm Dfél hol gónóhu nô sentu yóm nes seng ye. Abay se bè yó lemen fita yóm sefeng yóm Slungan Fasad gónóhu hegfan mung bè lobun. Ke là nimónen du yóm monu ni, angat hatay tafaku du.

³ Ke bang kdawen husek elem yóm dfél gónóhu nô yó, là hyuhen ke là nan gna demsù ebéléu sotu ngà safì tudu mò hkó salà ne nan hkekeb ebéléu sotu ubiha logi.”

⁴ Yó bud hlolò Dwata ke Aron gu laan Aron là deng husek elem yóm Dfél hol gónón nô Dwata yó, nan gna dyo ne leseken yóm nes gel lesek yóm tau blóng ebè Dwata, yóm nes tahà ne yóm sewel ukol suen lemen ne hyu hmilet ne mulew, bede hono bukay yóm leseken yó.

⁵ Bong bè yó kem tau Israél, hol le bemlay lewu kambing logi bè Aron anì du fen demsù du bélê le mò hkó salà le ne bud benlay le sotu ubiha logi mò hkekeben bélê le ebè Dwata.

⁶ Ne yó gna nmò Aron, nan gna demsù ebè Dwata yóm ngà safì tudu deng eles niten bè yó mò mkó yóm kun salà dalang se kul salà yó kem fes lówóhen.

⁷ Kesok deng kedsuen yóm kun, ominen yó ma yó kem lewu kambing logi deng blay le du yó kem tau Israél ne niten ebè bak dól yóm Gónô Dwata.

⁸ Ne bè yó gónón mélék du ke kambing du yóm mò ke Dwata ne ke kambing du yóm mò lo le mò mit hlayuk yó kem salà le.Yóm kambing mò ke Dwata, yó kmò Aron du hnatayen ne dsuen ebè Dwata mò hkó salà yó kem tau Israél.

⁹ Yóm kambing mò ke Dwata, yó kmò Aron du hnatayen ne dsuen ebè Dwata mò hkó salà yó kem tau Israél.

¹⁰ Bong yóm kambing mowil mò lo le tolok Aron ke Dwata, omin le tódô mlo du etu lem yóm benwu laen hol wen tauhen mò fen mit hlayuk salà yó kem tau.

¹¹ Bong yóm ngà safì tudu Aron, nwiten ebè gónón demsù ne bè yó gónón hmatay du mò hkó yóm kun salà dalang se kul salà yó kem fes lówóhen.

¹² Ominen ma yóm gónó le gel mit ofi ne nlemen yóm bala ofi nô bè yóm gónó le gel demsù. Ne wen lewu kuf insinsu bulus bud nwahen, yóm alì tilob boohen ne nwiten elem yóm Dfél hol gónón nô Dwata.

¹³ Bè yóm kkólen ditu lem yóm Dfél gónó Dwata nô, lemwót yóm insinsu nwiten, bulusen lem yóm bala ofi anì hol kmebel. Ne lemwót bè yóm tey kebelen, yó gónón là gfan yóm sefeng yóm Slungan Fasad gónó Dwata mkó yó kem salà le. Ke hol loloen yóm hlolò Dwata du yó, là kóen matay.

¹⁴ Bè yóm igoen kmebel, tódô hlós ebè yóm Slungan Fasad ne wen litô eles niten, yóm litô yóm safì tudu dsuen. Yó nmoen, leneben lemen tdoken ominen hemtsik sulék bè kilil sefeng yóm Slungan Fasad, yóm fi bè soluhen ne hitu duléken hemtsik bè lówóhen.

¹⁵ Kesok deng kmò Aron du yóm yó, ominen hewà nan e hnatay yóm kambing hedsù le du ebè Dwata yó kem tau. Nwahen litô yóm kambing yó ne nwiten elem yóm Dfél hol gónó Dwata nô ne bud hentsiken sulék bè kilil yóm sefeng yóm Slungan Fasad, ne bud hitu duléken hemtsik du bè lówóhen lómón yóm deng gna nmoen bè litô yóm safì tudu kun dsù.

¹⁶ Bè nim nmò Aron ni, hólósen yóm Dfél gónó Dwata nô anì là gomongen bè là kólós yó kem tau Israél ne bè yóm là kimón le ke Dwata. Nim nmò Aron ni, bud senged se nmoen bè klamang yóm Gónô Dwata abay se tódô mdà bè gónón sóól yóm kamfù yó kem tau là mólósen.

¹⁷ Lemwót bè yóm khusek Aron elem yóm Dfél hol gónón nô Dwata na a mò du yó kem yó koni efet bud kehewaen, hol béen wen tau nô lem yóm Gónô Dwata. Ke deng hfólósen ditu lemen yóm kun knô ne yó kem fes lówóhen dalang se yóm kdéen tau Israél.

¹⁸ Ominen yó he hewà ne hlós ebè yóm gónó le gel demsù yóm dsù hkekeb le ebè Dwata anì bud hfólósen se yóm gónó le demsù yó. Deng eles nwiten yóm dù litô yóm ngà safì tudu kun dsù ne litô yóm kambing logi kul dsù yó kem tau Israél ne lumangen bè sufà yó kem hteg sfatà kilil yóm gónó le gel demsù.

¹⁹ Ne bud hitu duléken hemtsik du ta yóm gónó le demsù yóm litô nwiten yó. Yó gónón mò du yóm yó anì bud mulék mólós se kun yóm gónó le gel demsù, ne mò mkó là kólós yó kem tau Israél.

Yóm kambing mò mit hlayuk yó kem salà

²⁰ Ke sok deng gotu deng kmò Aron du yóm hlolò Dwata du bè kehólósen yóm Dfél hol gónón nô, dalang se bè klamang yóm Gónô Dwata ne senged se yóm gónó le gel demsù ebè Dwata, ominen yó mit du ebè Dwata yóm sotu kambing tolo mowil.

²¹ Yó kmoen du, noken te kulu yóm kambing yó yóm lewu hólólen. Bè yóm igoen mnok du, tódô gotu benkasen ebè Dwata kdê sidek deng gel nmò yó kem tau Israél dalang se yóm là gel kimón le ke Dwata. Bè yóm nmò Aron yó, gotu mili ete kulu yóm kambing yó yóm kdê sidek deng benkasen yó koni. Wen tau deng eles nélék le mò fen mlo yóm kambing yó etu bè yóm benwu laen hol wen tauhen.

²² Yóm kambing yó, gotu niten hlayuk etu bè yóm benwu laen hol wen tauhen yóm kdê salà le.

²³ Ke deng lo yóm tau yó yóm kambing yó, lemwót Aron bud husek elem yóm Gónô Dwata anì nan e nlus ditu lem yóm sotu dfél bè yó, yó kem nes leseken bè yóm khuseken elem yóm Dfél hol gónón nô Dwata ne henyuhen bè yó yóm nes yó.

²⁴ Ominen yó dyo ditu lemen ne bud leseken yóm sana kun nes. Ominen yó he hewà nan e dsù yóm ubiha logi mò kun dsù hkekeb ebè Dwata ne yóm sotu ubiha logi mò kul dsù hkekeb ebè Dwata yó kem dumuhen Israél. Bè yóm kmoen du yóm yó gotu kóhen yóm kun salà dalang se kul salà yó kem dumuhen Israél.

²⁵ Lemwót yóm abù yóm safì tudu ne yóm kambing deng dsuen mò hkó salà, gotu hkekeben bè yóm gónó le gel demsù.

²⁶ Bong bè yóm tau fen mlo yóm kambing etu ebè yóm benwu laen hol wen tauhen, gu laanen là deng mulék elem kamfù le nan gna nfuk yóm nes leseken, ominen dyo.

²⁷ Lemwót yóm safì tudu ne yóm kambing dsù bè salà, yó se gónó Aron ma yóm litô niten elem yóm Dfél hol gónón nô Dwata mò hkó salà. Yó kmò le du yó kem lówó le, gotu nit le lu ebè lewà yóm kamfù le ne tódô hkekeb le lu bè yó. Gotu hkekeb le kulit le ne unged le kkólen bè tnahi le.

²⁸ Yóm tau fen hkekeb du yó, gu laanen là deng mulék ebè kamfù le nan gna nfuk yóm nes leseken, ominen dyo.

Yó kem hlolò Dwata kul bè yóm kdaw kkóhen salà

²⁹ Bud wen hlolò Dwata kul bè yóm kdaw kkóhen salà le ne laen kô dù sónen yóm klolò le du. Yó hloloen kul, bè yóm gesfoloen kdaw bè ghitun bulón, yó nmò yó kem tau Israél dalang se yó kem tólóng tau menwu lem blóng le, gotu le fasting ne bê le abay mò nmò.

³⁰ Bè yóm kdaw yó, gotu nulit le yó kem hlolò Dwata kul bè kehkó salà anì mólós ktonen kul.

³¹ Hol hetfing le yóm kdaw yó mò kdaw le fasting ne mò kdaw le là mò nmò. Yóm hlolò Dwata kul yó, laen kô dù tul sónen yóm klolò le du.

³² Elem hulin kdaw, yóm tau mò du yó kem hlolò Dwata bè khólós yó, tek són yóm geta bè yó kem tau blóng ebè Dwata, yóm deng tenwél le te kuluhen ne deng hetfing le ebè Dwata mò tles tehe fuen. Bè yóm kmoen du, hol leseken yóm nes gel lesek yóm tau mò blóng ebè Dwata

³³ ne tódô nuliten yó kem hlolò Dwata bè khólós yóm Dfél hol gónón nô, dalang se bè klamang yóm Gónô Dwata ne bè yóm gónó le gel demsù ebè Dwata. Bud nuliten yóm khólós yó kem dumu tau gel blóng le ebè Dwata ne yóm kdéen tau Israél nô bè kamfù le.

³⁴ Ni kem hlolò Dwata ni, laen kô dù sónen yóm klolò le du. Yó kem tau Israél, là hyuhen ke là gotu lolò le du yó kem hlolò Dwata kul yó mò mkó salà le. Ket halay le mò du bede olon sulék. Tahu se, gotu nmò Musis yóm kdê hmò Dwata du yó. Là gomongen bè nili yóm tsaptér 17 kól bè tsaptér 18. Yó tulónen yóm nmò hol kenbê Dwata bè yó kem tau Israél anì mólós ktonen kul, duhen yóm là kken le litô ne bê le muget.