Hlolò 10 - Udél Dwata: Gna Kesfasad ne Lomi Kesfasad

Kulé le Nadab lewu le Abihu yóm hlolò Dwata kul

¹ Wen bè yó kem ngà Aron logi boluy le Nadab ne Abihu. Sotu kdaw bè yóm knô le bè yóm Gónô Dwata gel nit le mógów, sket le ma yóm gónó le gel hemsù ofi ne hensù le bala ofi lemen, omin le mulus du insinsu lem yóm bala ofi yó ne omin le mit du ditu bè Dwata. Okóm yóm ofi yó, ofi lenbù nmò abay se là hmò Dwata du kul.

² Bè yóm kwit le du ebè solu Dwata yóm ofi yó, tódô sen-gengen sut bélê le yóm tey dilóf ofi hwit Dwata ne tódô le se matay mekto bè yó bè solu Dwata.

³ Omin Musis mon du mò ke Aron, “Nim hegfà Dwata kul ni, ni se gónón e gbak yóm tehe udélen, yóm monen, ‘Angat hegfanu bè yó kem tau blóng ebéléu yóm tey klaen dù belenu. Ne angat wen klikò le do yó kem tau Israél.’ ” Okóm tódô neb Aron.

⁴ Omin Musis htaba kul le Misaél lewu le Élsafan hono kem ngà Usil logi yóm mà dì Aron, monen mò kul, “Géhél ye edini, nangay ye ni kem dumu ye setwoli deng matay bè ni. Nit ye lu hewà lem nim Gónô Dwata, sù ye lu bè lewà yóm gónó tekuy kmamfù.”

⁵ Tahu se, senkayang le lu bè nes le ne nit le lu hewà bè yóm gónó le kmamfù, tódô lolò le yóm hmò Musis kul.

⁶ Ne yó mon Musis mò ke Aron ne yó kem lewu dù ngaen logi le Ilisar ne Itamar, “Hol bê ye abay hegfan yóm klangag ye kul. Hgifat ye semwat ne hol bê ye abay kensê se nes ye. Ke là nimón ye du nim ni, matay ye mekto se kuy ne gomong lenbut Dwata kdéen tau Israél. Okóm kul yó kem dumu ye Israél, là sideken bélê le ke lenangag le yóm katay yó kem logi yó bè yóm ofi hesut Dwata ebélê le.

⁷ Okóm kuy, hol bê ye abay mdó bè bak dól nim Gónô Dwata ni. Ke mdó ye, tódô ye matay mekto abay se deng hetfing me yu ebè Dwata mlan bè yóm hnolo Dwata deng twél me te kulu ye.” Tahu se, nimón le yóm mon Musis yó. Là gomongen bè nili yóm tsaptér 10:8 kól bè tsaptér 15. Yó tulónen yóm hlolò Dwata kul yó kem tau fen blóng ebéléen. Bud tulónen bè ni yó kem ógóf hken Dwata yó kem tau Israél ne yó kem ógóf là hkenen du kul. Bud tulónen bè ni snéen yóm hlolò Dwata bè kmò khólós yóm libun lomi sut blututen ne yóm kmò khólós le du yóm tau lomi wen des bè kuliten.