Hbakuk 3 - Udél Dwata: Gna Kesfasad ne Lomi Kesfasad

Kni Hbakuk bè Dwata

¹ Ni se hni Hbakuk bè Dwata yóm sotu tugod Dwata, bede lingónen.

² Ó Dwata yóm sana Dwata hol gónó mogot, deng gungolu yó kem tey tennga deng tehe nmoem ne botonge likò. Ne ni, hol bud nmoem bélê me bè nim kum kdaw yó kem deng tehe nmoem yó. Balù yóm tey sidek kebutem kum hol knodum mi.

³ Tódô tonu Dwata yóm hol mólós, hlalak gu lem yóm benwu laen hol wen tauhen, lemwót gu bè Idom ne bud mlan bè yó kem bulul bè Paran. Tódô tfeng longit yóm tey keslinangen ne tfeng tonok yóm kdê tau dmóyón du.

⁴ Yóm tey keslinangen hol lómón keslinang kdaw. Tódô senflósen smilà gu lem hólólen, yóm gónón hol nô yóm tey kfasangen.

⁵ Eles wen des hógówen tukô gna du ne eles hógówen huli du hatay.

⁶ Ke htengen mdà, botong megsinsig tonok. Gotu le kenkel yó kem tau bè klamangen benwu bè yóm ketngelen ebélê le. Yó kem bulul là sekna gotu le bugal ne gotu le sdatal yó kem bulul lemnek. Okóm laen kô tul konolen yóm kfasangen.

⁷ Yó kem tau bè Kusan ne bè Midyan, tonu lu tódô setbol kkel le lemwót bè alì klikò le bè yóm kton le du yóm yó.

⁸ Ó Dwata, yóm él mlel kô buten yóm gónóm lembut? Yóm mohin kô yóm mò kóm alì lembut? Bè yóm kdaw yó, deng hegmoen yó kem kóm tau mlan bè ksakayem yóm klitun tók gel nwitem bè gida.

⁹ Dengi eles htigel mogot bohohem, lel yóm tey hanak wen eles hbakem. Tódô lemubék tonok lemwót bè yóm tey dunuk él.

¹⁰ Ton le uu yó kem bulul, botong le gotu megsinsig. Ne tódô msut yóm tey dunuk. Ya tey lungkul yó kem dunuk, tódô setbulù eta yó kem tey lewók le.

¹¹ Tódô htengen yóm kdaw ne yóm bulón, olo bè ksilà yó kem hanak gtiem nebuyusem mom smilà.

¹² Tey sidek kebutem igoem hlalak bè klamangen. Lemwót bè alì sidek kebutem kul, gotu snóyówem yó kem benwu.

¹³ Yó gónóm hesut nam e lenwà yó kem kóm tau, nam e lenwà yó kem tau deng nélékem. Botong bentuem kulu yóm tau malak gel mò sidek ne sulék genlaem yóm tau lemolò du.

¹⁴ Kul suk se hatayem kul yó kem tau alì mebetik mundug kum. Yóm kebetik le, hol lómón ke lenos bong. Ofo kul mon du ke mahil gemwa kul yó kem tau Israél.

¹⁵ Tódô gotu hsóyówem yó kem kudaem yóm mohin ne tódô gotu setbulù yóm tey él nelem.

¹⁶ Bè yóm kungolu du yó kem deng tehe nmoem yó, botonge kenkel. Tódô setbol kkel sumóngu, botong klikou. Tódóe lenmek, botonge gluduk lemwót bè alì klikou. Okóm naw hfu imaku mangat du yóm kdaw bud kehwit Dwata du ebè yó kem tau mled benwu me yóm tey glumfak yó ekni.

¹⁷ Baluen he ke là bud le mulók yó kem koyu fig ne là bud le mungu yó kem grép ne baluen ke là bud le mungu yó kem koyu ulib ne là bud wen hulu yó kem dnadu ne baluen ke gotu le matay yó kem ubiha ne laen dù bud safì tonem bè yóm gónó le hemsù kul,

¹⁸ okóm sana yó ne kligalu ebè yóm sana Dwata hol gónó mogot, abay se du yóm hol Dwata yóm fen lemwà do.

¹⁹ Tendo hekgisen o yóm Dwata hol dandónen geta. Là bude tlokob, lómón yóm là ketlokob yó kem uhu ke mlóy le. Là kóe tlokob baluen ke mlane gu lem bulul. (Yóm tau gel malak sngal, yake hmung le bè yóm gel kenbit le yóm klingón le du nim ni.)