Hbakuk 2 - Udél Dwata: Gna Kesfasad ne Lomi Kesfasad

Kbalà Dwata yóm ktakas Hbakuk

¹ Ni mkafe eta yóm gónô mentey geta, bè yó gónóhu mangat du yóm udélen ebéléu yóm sana Dwata hol gónó mogot ne yóm kmò kbalaen du yóm tnakasu.

² Ominen malà do Dwata, monen, “Snulatem bè botu kufil yóm htonu kóm ni, bede hbongem ksulatem du ne htatawem anì mahil kesfalahen du yóm tau mlóy mit tulón anì tulónen bè kihu tau.

³ Okóm yóm htonu kóm ni, olohem na smulat du abay se là deng ni du he ksuten, bede angat hol dohò. Ke malù legen ksuten, nahem hol nangat, abay se ke deng kól yóm kdawen, là kóen ganggà.

⁴ Yó snulatem, Ngem yó kem tau là tedeng kmò le, laen dù gónón e kól yóm klowil le. Okóm kul yó kem tau tedeng kmò le, lemwót bè yóm kehtahu le bè Dwata wen gónón e kól yóm klowil le.

⁵ Hol gónó gtundug yóm kendengen tau ne yó kem tau heklabak laen dù kenek nawa le, mkél le bè hatay laen kô dù gónón gsengel nawa le. Tendo mled benwu seflós mò nfun le ne negef le yó kem tauhen.

⁶ Okóm angat kól yóm kdawen tey sidek udél le ebélê le yó kem tau tehe negef le yó, mon le mò kul, ‘Hatay ye kuy kem tau ma yóm sundu kul du. Hatay ye kuy kem tau wen kendengen ye lemwót bè kgaga ye yó kem tau mutóng bélê ye. Kegenen de tendo bud kmò ye du yóm yó?’

⁷ Angat le tódô mekto sut yó kem tau tehe mutóng bélê ye yó, mung du lebut le. Gotu bud nwa le yóm kdê deng nô bélê ye yóm igò ye mdà bè yó tódô setbol kkel ye ne laen kô dù gmò ye.

⁸ Deng tey dê benwu nuku ye kimuhen. Okóm ni, yó kem tau dù mowil bè yó kem benwu yó, gotu bud nuku le yu se kuy lemwót bè yóm deng kbonok ye ne lemwót bè yóm deng keglà ye yó kem tau bè ket benwu ne deng gotu genbà ye yó kem syudad le snéen.

⁹ Hatay ye se kuy kem tau wen kendengenen mlan bè là ktedengen. Ofo kuy mon du ke lemwót bè kendengen ye gónón wen kenek kbenwu ye, lel ye hlayuk yó kem fes lówó ye bè yóm gónón wen gfà.

¹⁰ Okóm lemwót bè yóm deng kbonok ye, deng henyak ye knô ye ne deng genbà ye ktau ye.

¹¹ Balù yó hem botu bè beng gónô ye sana kduón le kuy, dalang se yóm sfóyón gónô ye bud nuliten se kun yóm kduón le kuy yó.

¹² Hatay ye se kuy kem tau hefdà yóm syudad mlan bè yóm filak lemwót bè gel kbonok ye ne lemwót bè yóm gel kmò ye sidek.

¹³ Yóm tey kliteg le yó kem tau hefdà du yóm benwu yó, okóm wen dumu benwu angat bud gmida du gotu ntem le, gotu baling kohù yóm kdéen. Tey kehmò le du, okóm laen kô dù uléken. Yó se deng fasad yóm Dwata laen dù là gbeken du.

¹⁴ Okóm angat wen kdawen tódô kdéen tau talak tonok angat gotu temngón du yóm tey kun keklóón Dwata. Yóm ketngón le du yó, tódô lenngeben klamangen tonok lómón mohin, tódô lengeb él.

¹⁵ Hatay ye se kuy kem tau gel nwit le hlengel kem dumu le sebét. Nubug ye lu minum efet le lengel anì ton ye yóm klaen dù nes le ne yóm kyak le.

¹⁶ Okóm yu se bud angat mulék myak tles yóm tehe któtól ye. Yu se tles bud lengel ne heglénggé. Angat wen hinum Dwata kuy, duhen yóm tafaken kuy. Ne yóm tey tehe któtól ye, angat bud mulék yak ye.

¹⁷ Deng gotu nofok ye yó kem koyu dlag bè Libanun. Ne ni, bud yu tles nofok le. Ne yóm tehe gotu keglà ye yó kem ógóf lem bnes ne ni bud lu tles hmikò kuy. Ni se gfà ye lemwót bè yóm tey dê tau hnatay ye ne tey dê benwu genlà ye gomong yó kem syudaden ne yó kem tau nô lemen.

¹⁸ Tedu se guta ye du yó kem dwata lennged nmò tau? Tey nungel yóm tau smalig bè yó kem nmò tdok tau. Tedu se mu ye hemtahu du yó kem lennged là mudél yó?

¹⁹ Hatay ye se kuy kem tau gel mudél bè yóm koyu lennged là mudélen. Gel mon ye, ‘Btiki,’ duhen ke bud mon ye bè yóm botu, ‘Mdai.’ Wen kô gbek htonen kuy yóm dwata lenbù nmò yó? Déke olo le lemafin du blówón bukay ne tahu blówón, okóm laen dù klowil nô du.

²⁰ Okóm kun yóm sana Dwata hol gónó mogot, deng nô bè yóm kun Gónô alì mólós. Yó kem kdéen tau talak tonok, bê ye abay bud mudél ke nô ye bè soluhen.”