Hbakuk 1 - Udél Dwata: Gna Kesfasad ne Lomi Kesfasad

¹ Ni se udél yóm sana Dwata hol gónó mogot ebè yóm sotu tugoden boluyen Hbakuk. Yóm kudélen ebéléen hlanen bè yóm htonen du.

Ktakas Hbakuk bè yóm kwit le kukum là tedengen

² Ó Dwata yóm sana Dwata hol gónó mogot, deng hilu duléku ne tmaba ebéléem, okóm là kô hnungolem du. Yó monu mò kóm, “Tey kehsidek le kum,” okóm là kô lenwaem kum.

³ Moen de ke alì htonem do ni kem sidek gel nmò le ni, lel yóm tey keglayam yó kem tau hensidek le? Kihu gónów e temngel són yó kem deng gebà tonu ne són yó kem tau alì hemsidek dumu tau. Deng tódô slibut do yó kem tau tendo segled ne kem tau tendo sfatay.

⁴ Là buden mget yóm udin me ne laen dù bud muhen. Là bud tonem du ne yóm kukum tedeng. Laen dù bud gmò yó kem tau mit du yóm tedeng, bà mon yóm tey kekgis yó kem tau mò sidek. Yó gónóm mon, là tedengen yóm kkukum le.

Kbalà Dwata yóm ktakas Hbakuk

⁵ Yó balaen do yóm sana Dwata hol gónó mogot, monen, “Hnénég ye dé yó kem benwu hmilol kuy ne angat tey sidek ketnga ye bè yóm angat nmou. Angat wen nmou bè yóm hol kuy kdaw, baluen ke deng tulón le kuy là kô hentahu ye du.

⁶ Wen tey kfasang blayu bè yó kem tau Babilun kem tau alì lóbô, balù udì ke wen kodu le kem dumu tau. Lu se angat gmida yóm klamangen benwu na le e nled yóm sundu kul du.

⁷ Deng le tey tótól bè alì kmò le sidek. Laen kô dù udin lolò le, tódô nmò le balù kihu nóyô nmò le ne laen kô dù gembek hemseng kul.

⁸ Yóm alì kehlóng yó kem kudà le, botong kéng kehlóng yóm sotu ógóf lóbô lem bnes boluyen lipard. Ne yóm alì klóbô le, hol lómón klóbô yóm ohu lóbô lem bnes ke deng bitil. Yó kem tau gmida smakay kudà bélê le, lemwót le gu bè benwu mayuk. Tey kehlóy le yó kem kudà le, hol lómón ke dmauf banug ke wen kenfóen.

⁹ Bè yóm ksut le, tek sotu hendem le na le e kudung hmatay tau. Yóm kegdofì le hol lómón ke lenos gu bè yóm benwu là hyu menwu du, gotu gwit le yó kem tau negef le hol lómón ke yóm helek gel nwit lenos.

¹⁰ Tey kehnê le yó kem tau hol geta ne yó kem genlalen. Mom knuli le yóm kdê syudad mbegel beng hilolen. Mom yó nmò le muntud le tonok mò lan le mulé du.

¹¹ Ke deng gotu genbà le yóm sotu benwu, omin le tódô miwes lómón kbel lenos són ktonem kul. Okóm hono kem tau mò sidek, nmò le dwata le yóm kgis le.”

Bud ktakas Hbakuk

¹² Ó Dwata, yóm hol dou gónó mogot yóm laen dù belenen, uu se yóm sana Dwata laen dù buten ne laen dù sónen, là kói na a matay se kóm. Yó kem tau Babilun yó, yó kô oluhem kul lu gemlà kum? Là. Là kô gbekem du yó, abay se uu yóm Dwata gel mofin kum. Okóm yó nmoem deng nélékem lu mò tmafak kum ne mò hemtedeng kum.

¹³ Ne hyu se yóm nmoem yó. Okóm tódô bayaem kul ne kô yóm tey sidek nmò le bélê me ni? Deng tngónu lemwót bè yóm klaen dù belenem là kô nam e gbek tódô tenngel du kóm yóm sidek. Là móyói mton du kóm yó kem tau mò du yóm là tedengen. Ke lómón yó yóm kóm kmò, moen de ke tódói henek bè yóm igò le alì hemsidek kum, mi kem tau tedeng kmoen senta le?

¹⁴ Ilóem heskélem mi bè utón él lem mohin kô mò nalu ne mò hnatay? Ilóem heskélem mi bè yó kem kmadaw laen dù mdengen malak kul mò mofin kul?

¹⁵ Tódô me kem téwéng ne kô bè dulé kem hohon me, gedyol elem huket le igò le fen alì hligal se kul?

¹⁶ Omin le yó tmaba dwata bè yó kem huket le ne mtem le insinsu bélê le, yakà mon le du lemwót bè huket le kun yóm kwen kendengen le ne ktilob yóm gel ken le.

¹⁷ Ó Dwata, tódô hlós lusem kul ne kô yóm nmò le ni efet kól bè sónen? Tódô lusem kul ne kô yóm tendo keglà le tau, balù udì ke wen kodu le?