Hagay 2 - Udél Dwata: Gna Kesfasad ne Lomi Kesfasad

Yóm angat keklóón yóm gónô Dwata

¹ Bè yóm gewuhen folò sotu kdaw bè ghituhen bulón bè yóm halay yó, bud wen udél Dwata htugoden ke Hagay.

² Bud hógówen Hagay ebè Sirubabél yóm gubérnor bè Juda ne ebè Juswa yóm geta bè yó kem gel demsù ebè Dwata ne ebè kdéen tau. Yó udél hwit Dwata ebélê le, monen mò kul,

³ “Wen kô bélê ye gemtulón du nawa yóm tey tehe keklóón yóm dou Gónô? Kmò kton ye du se nim Gónô hdà ye ni? Lómón ke là gsengeden du yóm gnan.

⁴ Okóm ni, béen abay sidek kegnóm ye du. Tódô henlel ye mò nmò, yakà tendohe eles nô bélê ye.

^5-6 Bè yóm tehe kehewà yó kem fù ye gu bè Idyip, tehe fasadu kul yóm tendo eles knóu bélê le. Senged se nim kmoen ni, elese tendo gel nô bélê ye. Yó gónóm mon, hol bê ye abay hlikò. Là buden legen ne yóm angat ksinsigu longit ne tonok ne mohin.

⁷ Angat genbau kdéen dumu benwu. Ne yóm kdê kendengen le, gotu nit le ebè ni mò heklóón yóm dou Gónô. Angat tódô hnok kendengen lem yóm dou Gónô.

⁸ Hono dou yóm kdéen tahu blówón ne kdéen blówón bukay bè klamangen benwu.

⁹ Nim lomi Gónóu ni, angat tey knóón senta yóm gnan. Lemwót bè yóm bud kehdà ye du, yó se gónón lemwót yóm keblayu kuy kehyu klowil ne kenek kbenwu.” Ni se udél yóm Dwata laen dù là gbeken du, yóm Dwata hol gónó mogot.

Ksólók Hagay bè yó kem tau gel demsù ebè Dwata

¹⁰ Bè yóm gewuhen folò fat kdaw bè gesyómen bulón bè yóm gewuhen halay kogot Daryus benwu, bud mudél ebè Hagay Dwata yóm Dwata laen dù là gbeken du,

¹¹ monen, “Ni snólóku bè yó kem gel demsù ebéléu, monem mò kul.

¹² Mò kmoen ke wen bélê ye wen nahen bè yóm utón deng dsuen ebéléu ne bensongen nesen yóm utón deng mólós yó. Mò kmoen ke wen mambang gónón gló duhen ke ken duhen ke ninum duhen ke tóbô kihu bè yó kem dumu kay gel ken le? Gomong mólós kô yóm gónón gló yó?” Timbow snólók Hagay bè yó kem tau gel demsù ebè Dwata yóm sólók yó, yó balà le du, mon le, “Là, là kóen mólós.”

¹³ Sotu bud sólók Hagay kul, monen, “Mò kmoen se yóm tau deng gholu lemwót bè kogoten lówó yóm tau deng matay, ke wen gogoten bè yó kem ken yó koni, gomong gholu kô yóm ken deng gogoten yó?” Ne yó balà le du yó kem tau gel demsù ebè Dwata, mon le, “El, gomong gholu.”

¹⁴ Yó bud udél Hagay, monen, “Hol lómón yó se kmò kehlingón Dwata kul yó kem tau bè nim benwu ni ne yóm kdê gel nuta le. ‘Lemwót bè yóm là kimón le, bud gomong là mólós kton Dwata du yóm kdê gel dsù le ebéléen.’ ”

Fasad Dwata kul yóm któbóngen kul

¹⁵ Yó bud udél Dwata ebélê le, monen, “Là ton ye du kô yóm kmò kógów klowil ye? Gu laan ye là deng mbut hdà du he yóm dou Gónô,

¹⁶ gel ye mógów ebè yóm gónó ye gel kmusu, ofo kuy ke angat lewu folò sakù guta ye du. Okóm là, tek sfolò. Ke mò ye tifas grép, ofo kuy ke angat limu folò galun guta ye. Okóm là, tek lewu folò.

¹⁷ Hbelu tey lenos kinì ne hetbóhu bulók kulón eta yó kem hulu ye anì sidek. Okóm baluen ke lómón yó kmoen, là kô ye dog hegsel.

¹⁸ Nim kemdaw ni,” mon Dwata, “gewuhen folò fat kdaw bè yóm gesyómen bulón, kdaw kehdeng ye du yóm gónón mteg yó kem hehek yóm dou Gónô. Lenwóten ni, nénég ye yóm kmò kógów klowil ye.

¹⁹ Anien ke laen dù bud halay ye ne anien ke là deng le mungu yó kem grép ye ne yó kem koyu fig ye ne yó kem koyu ulib ye ne yó kem dumu koyu mungu ye, tódô lenwóten ni ne yóm któbóngu kuy.”

Yóm fasad Dwata ke Sirubabél

²⁰ Bè yóm kdaw yó, bè gewuhen folò fat kdaw bè yóm bulón yó, bud wen udél hwit Dwata ke Hagay

²¹ ebè Sirubabél yóm gubérnor bè Juda. Yó udél hwiten, monen, “Móyón kninsigu longit ne tonok.

²² Angat genbau yó kem dumu benwu ne nmou sónen yóm kfasang le. Gotu hensideku yó kem klitun gel nit le sgida ne yó kem tau gel mit kul. Ne gotu matay yó kem kudà le ne yó kem tau tehe smakay kul, gotu le matay lan le tódô sfatay honon lu.

²³ Bè yóm kdaw yó, angat néléku uu, Sirubabél yóm tau tóbóng lówóhu, mò mogot yó kem dou tau ne hlanem bè dou boluy yóm kogotem kul. Uu se yóm hol dou nélék.” Dwata se mon du nim ni yóm Dwata laen dù là gbeken du, yóm Dwata hol gónó mogot.