Hagay 1 - Udél Dwata: Gna Kesfasad ne Lomi Kesfasad

Kdók Dwata kul bud hemdà yóm kun Gónô

¹ Tehe yu ekni, wen tau hol geta kmamal bè Pérsya boluyen Daryus. Bè yóm hol tanay kdaw bè gnemen bulón bè yóm gewuhen halay kmamal bè yóm benwu yó, wen udél Dwata hlanen bè yóm sotu tugoden boluyen Hagay. Yóm udélen yó, hwiten ebè yóm gubérnor bè prubinsya Juda boluyen Sirubabél yóm ngà Syaltil logi ne ebè yóm geta bè yó kem gel demsù ebè Dwata boluyen Juswa ngà Jihusadak.

² Yó udél Dwata ebè Hagay yóm Dwata laen dù là gbeken du, monen, “Gel mon ni kem tau nô bè ni, ‘Là deng ni du he yóm kdaw bud kehdà tekuy du yóm Gónô Dwata.’ ”

³ Duhen yó, wen udél hwit Dwata ebélê le hlanen bè Hagay yóm sotu tugoden, monen,

⁴ “Ó kem dou tau, moen de ke fen ye nô bè yóm tey gónô knóón deng hdà ye, igò yóm dou Gónô sana tolo kegbaen?

⁵ Là getnef ye du kô yóm kmò kógów klowil ye?

⁶ Tey bong bnék gel hla ye, okóm tek udì guta ye du. Wen se gel ken ye, okóm là kóen kóyów ne là kô ye gemtu du. Wen se gel ninum ye, okóm bud là se kóyówen. Wen se gel nes lesek ye, okóm sana gel ketnaw ye. Ne yóm tau gel mò nmò, là kóen kóyów yóm gel gutahen mò lowil le.

⁷ Là getnef ye du kô but nim kmò kógów klowil ye ni?

⁸ Na, mógów ye elem bulul dé na ye e mofok koyu mò ngom yóm dou Gónô anì bud hdà ye. Ke ni se nmò ye, tey kehyu nawaw. Ne angat ye bud stifun tmaba ebéléu bè yóm dou Gónô yó, lómón yóm deng tehe hlolou kuy.

⁹ Tey gel kehdón ye du ke bong yóm gel tbas ye, okóm tek udì uléken. Bè yóm gel kwit ye du eta yóm gel nuta ye yó, mom nyufu hlayuk. Tngón ye kô but gónóhu mò du yóm yó? Abay se sana tolo kegbà yóm dou Gónô, mom hegna hdà ye yóm kuy gónô ne tódô ket tau tendo lala mò du yóm kun gónô.

¹⁰ Yó gónóm mon, là kóen bud kmulón bè benwu ye ne laen kô dù hol tmowok du yó kem hulu ye.

¹¹ Deng hesutu lem benwu ye yóm tey kinì bong. Deng gefet bè yó kem bulul ne bè yó kem halay ye ne bè yó kem bungu grép hulu ye ne bè yó kem koyu ulib ye. Deng gefet ne bè kdê yó kem hulu tmowok bè tonok ye. Balù tau ne ógóf gotu gemnóm du nim tey kinì ni. Gotu glumfak yóm kdê hulu ye.”

Kimón kem tau du yóm dók Dwata

¹² Duhen yó, lemwót Sirubabél ne Juswa ne kdê yó kem tau deng mulék gu bè Babilun yóm benwu tehe megef kul, tódô gotu nimón le yóm dók Dwata kul. Tey klikò le, ne nimón le yóm udél Dwata ebélê le hlanen bè Hagay yóm tugoden.

¹³ Omin Hagay tmulón du yó kem tau yóm bud udél Dwata ebélê le, yóm monen, “Elese tendo gel nô bélê ye. Ni se yóm hol fasadu kuy.”

¹⁴ Yó nmò Dwata, gotu gendufen kdéen tau anì mò le nmò bè Gónóen. Gendufen Sirubabél yóm gubérnor bè Juda ne Juswa yóm tau geta bè yó kem gel demsù ebè Dwata, dalang se yóm kdéen tau deng mulék gu bè Babilun. Tódô nbut le mò nmò bè yóm kun Gónô Dwata yóm Dwata laen dù là gbeken du, yóm Dwata hol kul gónó mogot.

¹⁵ Yóm kmò le nmò yó, nbut le bè gewuhen folò fat kdaw bè gnemen bulón bè yóm gewuhen halay kogot Daryus benwu.