Glasya 4 - Udél Dwata: Gna Kesfasad ne Lomi Kesfasad

¹ Ni mò tnuen yóm monu yó koni. Ke matay yóm tau, tebelen bè ngaen yó kem kimuhen. Bè yóm tolo kudien, hol lómón ke hesek bè yóm kimónen yóm tau semgyok du, balù yóm kfunen du yóm kendengen yó.

² Yóm igoen hanà ngà, wen gel semgyok du, ne bud wen se fen mogot yó kem kimuhen efet kól bè yóm kdaw deng eles katul maen du bè yóm kogoten du yó kem kimuhen yó.

³ Hol lómón yó se yóm kmò tekuy. Yóm gu laan tekuy là deng gulit bè kehtahu tekuy, lómón ke tolo tekuy ghesek bè yó kem dê hlolò le tekuy yó kem tau lem benwu.

⁴ Okóm yóm kehto yóm buteng deng tehe fét Dwata, tódô hógówen yóm hol kun Ngà mò na a hbaling ngà tau, bede nan sut bè libun. Bè yóm deng kbongen nim Ngà ni, tódô gotu loloen yóm kum hlau kem tau Ju.

⁵ Yó gónón mò du yóm yó mò lanen msok yó kem tau deng gfét du yóm hlau yó anì wen lan tekuy baling ngà Dwata.

⁶ Wen lan Dwata hdilô du bélê tekuy yóm kngaen tekuy, duhen yóm ksuen du bélê tekuy yóm Tulus yóm Ngaen. Lemwót bè yóm knóen bélê tekuy yóm Tulusen yó, yó se gónó tekuy là bud lengayà tmaba du, “Mà.”

⁷ Duhen yó, là bud tekuy tau hesek ne, deng tekuy baling kun ngà Dwata. Lemwót bè yóm deng kngaen tekuy, guta tekuy yóm kdê gel blayen bè yó kem ngaen.

Kónó nawa Pol yó kem tau hemtahu bè Glasya.

⁸ Tehe yu ekni, yóm là deng ketngón ye ke Dwata, tey keghesek ye bè yó kem dwata kéng.

⁹ Okóm ni, deng tngón ye Dwata, o, monu dé, deng tngón Dwata yu. Ke lómón se ni kmoen, moen se ke bud ye ghesek bè yó kem dê hlolò le kuy lem nim benwu ni? Igoen laen dù kgis le tmóbóng kuy yó kem yó, balù udì.

¹⁰ Gotu tô lolò ye kdê yó kem gel hlolò le kuy bè kdaw ne bè bulón ne bè halay.

¹¹ Tey mónó nawahu kuy, kô mulék kafa yóm deng tehe toloku kuy.

¹² Yó hol sen-galuhu bélê ye, kem dumuhu setwoli, ke hol dnalang ye yóm dou kmò. Bè ktahuhen, balù yóm ktauhu Ju là kóe gfét du yó kem hlau yó kem Ju. Yóm tehe knóu dyó lem blóng ye, laen selen yóm kehyu nawa ye ebéléu.

¹³ Hentulón ye nawa dé yóm but gónóhu tmulón du kuy yóm Tulón Hyu, hol lemwót bè yóm tehe kwen desu.

¹⁴ Balù yóm tey keglala ye béléu bè yóm tehe kwen desu dyó, là kô hnisik ye dou, là kô kenbê ye do. Mom yó nmò ye, tey khódó ye do, hol lómón ke ou yóm hógów Dwata gu bè longit, ne lómón ke ou Krays Jisas.

¹⁵ Ya tey kligal ye bè yóm kdaw yó. Tódô dilóu ke nawa ye tehe gbek lemsit du yóm mata ye mò tles yóm dou, botong gmò ye. Tedu se buten yóm deng kili nawa ye ni?

¹⁶ Yó kô tô gónó ye hmohon do lemwót bè yóm deng ktulónu du kuy yóm ktahuhen?

¹⁷ Bong yó kem tau tmolok sekban bélê ye bè yó, hol lómón tô tey hendem le yu, okóm là hyuhen yóm nô lem hendem le. Yó hol kóyô le ke knogol ye ou, ne són lu baling bud lolò ye.

¹⁸ Tey hyu ke hol hendem le yu, syan ke là sideken yóm nô lem hendem le. Bong tahu se nim monu ni, yake tódô senflósen wen hemdem kuy, là olon bè yóm knóu lem blóng ye.

¹⁹ Ó kem ngà gónón mogot nawahu, gu laan ye là deng gmulit yóm kun kmò Krays, tey sidek kegnómu du. Lómón kegnómu du, lómón yóm libun kmuleng blututen.

²⁰ Hyu ke tódóe suyó kuy anì hol tekuy stulón. Tey sidek kónó nawahu kuy.

Yóm henléd yó kem lewu libun, Sara ne Hagar

²¹ Wen snólóku bélê ye, yu kem tau alì móyô lemolò yóm hlau Musis. Deng hol tngón ye kô yóm nô lemen yóm tô lolò ye yó?

²² Bè yóm hlau yó, wen tulónen gbak ebè yó kem lewu ngà Abraham logi. Yóm sotuhen, ngaen bè yóm tehe libun heseken. Ne yóm sotuhen, ngaen bè yóm yehenen là hesek du.

²³ Bè yóm kun keblutut yóm libun hesek, laen dù gónón stólóng se bè yó du kem dumu libun mlutut. Okóm yóm kun keblutut yóm libun là hesek du, tódô lemwót bè yóm fasad Dwata ke Abraham.

²⁴ Ni kem lewu libun ni, sal wen henléden. Yó henléden, duhen yóm lewu kesfasad nmò Dwata mò lan tau hloni ebéléen. Yóm libun hesek boluyen Hagar, hono hesek yó kem kun ngà. Yó henléden yóm Hagar, duhen yóm hlau tehe blay Dwata ke Musis bè bulul Sinay.

²⁵ Nim Hagar ni, bud henléden yóm bulul Sinay bè benwu Arabya. Ne sotu bud henléden, duhen Jirusalim ne yóm kdéen tau nô lemen gel lemolò yóm hlau Musis, yóm hlau gónó le ghesek.

²⁶ Okóm yóm libun là hesek du, boluyen Sara. Yó kun henléd, duhen yóm lomi Jirusalim. Hol lómón ke du se yóm yê tekuy kem tau hemtahu.

²⁷ Wen monen bè Sulat Dwata gbak ebè Sara, yó monen, “Holi hligal dé, libun atil. Baluen ke là deng gnómem du yóm kkuleng ngà, holi hngawê dé. Anien ke deng tnagaken uu yóm tuha logihem, kaem bud semfulék ebéléem he. Ne mom dê he kóm ngà senta yóm libun là tnagak yehenen du.”

²⁸ Duhen yó, kem dumuhu setwoli, deng tekuy baling ngà Dwata ne lemwót bè yóm deng kdohò yóm tehe fasad Dwata. Deng tekuy hol mkél bè Isak, yóm ngà Sara, yóm ngà lemwót bè fasad Dwata ke Abraham.

²⁹ Bè yóm kdaw yó, yóm ngà twogu boluyen Ismaél, yóm ngà lemwót bè kesyehen tau, gel hensideken yóm twolihen boluyen Isak, yóm ngà lemwót bè Tulus Dwata. Efet nim kmoen ni, senged se kmoen.

³⁰ Okóm wen monen bè Sulat Dwata, yó monen, “Hdó ye ne yóm libun hesek, hmung ye du ngaen. Abay se là knóónen ke du tles mogot du yóm kun nogot maen. Yake yó dém ngaen bè yóm libun là hesek du bud temles du.”Duhen yó, kem dumuhu setwoli, yóm kdê tekuy deng hemtahu bè Krays, hol lómón ke tekuy se yóm kun ngà yóm libun là hesek du. Là kô tekuy ngà yóm libun hesek.

³¹ Duhen yó, kem dumuhu setwoli, yóm kdê tekuy deng hemtahu bè Krays, hol lómón ke tekuy se yóm kun ngà yóm libun là hesek du. Là kô tekuy ngà yóm libun hesek.