Glasya 2 - Udél Dwata: Gna Kesfasad ne Lomi Kesfasad

Kessotu le Pol yó kem dumu hógów Jisas

¹ Timbow deng sfolò fat halayen bè yó, ominu yó bud mógów ebè Jirusalim. Slomong me Barnabas, mung kum Taytus snéen.

² Yó gónóhu mógów lan Dwata hegfan béléu. Yóm kkól me ditu, gotu le stifun yó kem tau malak yó kem tau hemtahu bè yó, laen kô dù dumu tau gbool bélê me, són mi. Yó hol tulónu kul, duhen yóm Tulón Hyu gel hetngónu lem blóng yó kem tau là Ju le. Yó gónóhu mò du yóm yó, abay se là móyóe du ke laen dù gónón e kól yóm deng tehe nmou dalang se yóm tolo nmou ni kmoen ni.

³ Ne tahu se, gotu senkotuk le. Ngem yó dém Taytus, yóm ngà Grik dumuhu, là kô nubug tnulì le du yó kem Ju.

⁴ Okóm wen se móyô mò du. Lu se yó kem tau sut hlingu le tau hemtahu anì hnungol le yóm mò kmò me du ke wen tau là Ju le hemtahu bè Krays Jisas. Yó kóyô le ke hlolò me yó kem tau là Ju le yóm kum hlau kem tau Ju.

⁵ Okóm balù udì ke dog bninguy me yóm kul tulón. Yó hol sen-galu me ke béen wen bud tnù le du yóm ktahuhen deng tulón me kuy, duhen yóm Tulón Hyu gbak ebè Jisas.

⁶ Timbow gungol yó kem tau gel malak bè yó, bà udì ke wen tnù le du. Uma kóm yó kem tau yó, laen kô dù gónón stólóng béléu ke tau malak duhen ke là, abay se yóm Dwata, là knukumen du yóm olon gfan ta.

⁷ Bè ktahuhen, tódô dilô le yóm deng kélék Dwata dou mò fen tmolok yóm Tulón Hyu bè yó kem tau là Ju le, hol lómón se yóm deng kéléken ke Pitér mò fen tmolok bè yó kem tau Ju.

⁸ Yakà tódóen lemwót bè kfasang yóm Dwata khógówen dou ebè yó kem tau là Ju le, hol lómón yóm khógówen ke Pitér ebè yó kem tau Ju.

⁹ Yó kem tau fen gel malak bè yó, le Jim ne Pitér ne Jan, dilô le se kul yóm deng kwen sigang Dwata tahu. Omin le mkem lem hólól me lewu me Barnabas mò ilô yóm deng kessotu me bè yóm kmò me nmò bè Krays. Ne deng gotu senkotuk me snéen yóm kehlós me tmolok lem blóng yó kem là Ju le lewu me Barnabas, ne lu se fen tmolok lem blóng yó kem Ju.

¹⁰ Tek sotu tinok le kum, són yóm gel keblay bè yó kem tau élél hemtahu lem blóng le bè yó bè Jirusalim. Ne yó se sotu alì gel nô bè nawahu snéen dou.

Yóm kudél Pol ke Pitér bè syudad Antyok

¹¹ Sotu kdaw bè yó bè yóm kkól Pitér bè syudad Antyok, tey kudélu du lem blóng yó kem tau, abay se là kóen hyu yóm nmoen.

¹² Bè yóm tanay kkólen bè yó, tódô segduf mken bè yó kem tau là Ju le. Timbow sut yó kem tau Ju hógów Jim, hlós là dogen bud hegbool mken bélê le Pitér yó kem tau là Ju le, abay se likò yó kem kun dumu Ju alì megenek klolò le du yó kem hlau Musis.

¹³ Botong le gbót likò bè Pitér yó kem dumu Ju deng hemtahu gbót mken. Balù Barnabas, botong gbót se kun bè yóm kul klikò yó.

¹⁴ Timbow tonu yóm là bud klolò le du yóm ktahuhen lemwót bè yóm Tulón Hyu, yó gónóhu tódô mon du mò ke Wè Pitér lem blóng yó kem tau, monu, “Tauhi Ju se kóm, Wè, okóm bè yóm knóem bè ni, kéng tô là Juhi, deng nmungem yóm kul adat yó kem tau là Juhen. Ke yó se nmoem, tô kmò kehloloem du kul du yó kem tau là Juhen yóm hlau tekuy kem Ju?”

Són bè kehtahu le gónó le gewà yó kem tau Ju ne yó kem tau là Ju le

¹⁵ Bè ktahuhen, kesfu me Ju se kum. Là kô me semfu gu bè yó kem tau là Ju le, yóm gel bnoluy me, “tau gemsalà” lemwót bè yóm là ketngón le du yóm hlau Musis.

¹⁶ Okóm deng tngón me ne, tek sotu gónón tedeng kton Dwata du yóm tau, tek són bè kehtahuhen bè Jisas Krays. Là kóen lemwót bè yóm kloloen du yóm hlau Musis yó. Yó gónó me hemtahu bè Krays Jisas se kum kem Ju anì tedeng kton Dwata kum lemwót bè kehtahu me béléen. Là se kóen lemwót bè yóm klolò me du yó kem hlau Musis, abay se laen kô deng tau he ke tedeng kton Dwata du lemwót bè kloloen yó kem hlau.

¹⁷ Duhen yó, yó dé hol sen-galu me ke tedeng kton Dwata kum lemwót bè yóm kessotu me bè Krays, déke yó mon kem dumu tau, deng me baling tau gemsalà se kum, deng me mkél bè yó kem tau là Ju le, abay se là bud gel lolò me du yó kem hlau Musis kun. Ke tahu se yóm mon le yó, deng Krays dilóu mit kum mò salà, abay se deng du tles lolò me. Là kô yó du.

¹⁸ Ke tô bud lolou yóm hlau tehe tebelu, mom bè yó ne gónón gfan yóm kuléhu du, abay se là kô gbeku lemolò du.

¹⁹ Bong bè yó dum hlau yó, olohen mom mit dou elem hatay lanu gmulé du. Yó gónóhu tódô tmebel du anì glolou Dwata. Ne lemwót bè yóm deng kehtahuhu bè Krays, hol lómón ke denge gomong matay béléen bè kros.

²⁰ Yó gónóm mon, là kô ou du ne nim mowil ni, kaem Krays, yóm nô béléu. Són yóm kehtahuhu tendo gentud nawahu abay se tey kbong nawan dou, gloken fen hamà béléu yóm kun klowil.

²¹ Bede ke deng tedeng se kton Dwata du yóm tau bè kloloen yó kem hlau gnan, laen kô dù muhen yóm katay Krays. Okóm béléu dou, tey bong któbóng Dwata dou hlanen bè yóm katay Krays.