Glasya 1 - Udél Dwata: Gna Kesfasad ne Lomi Kesfasad

¹ Ou se Pol gónóhen lemwót nim sulat ni, yóm tau fen gel hógów Jisas Krays. Là kóen lemwót bè tau yóm gel kógówu ni, ne là kóen mlan bélê le snéen. Okóm tódô lemwót bè Jisas Krays lewu le Dwata, yóm Mà tekuy, yóm tehe hlowil ke Jisas.

² Smulate edyó bélê ye, yu kem tau hemtahu bè Jisas Krays bè yó kem benwu bè prubinsya Glasya. Tódô kdê yó kem dumuhu hemtahu bè ni, gotu gbót mólóm kuy snéen yu kem tau hemtahu dyó.

³ Yó hem Dwata, yóm Mà tekuy, dalang se yóm gónó tekuy mogot Jisas Krays tendo tmóbóng kuy ne tendo henek nawa ye.

⁴ Yóm Krays, deng tódô hamaen yóm kun klowil bè salà tekuy anì wen lan tekuy gewà gu lem yó kem sidek gel nmò yó kem tau là hemtahuhen ni kmoen ni. Bè yóm katayen yó, tódô nmungen yóm kun kóyô Dwata, yóm Mà tekuy.

⁵ Hol bê tekuy abay nmò sónen yóm tendo kdóyón tekuy ke Dwata.

Tek sotu yóm Tulón Hyu

⁶ Ya tey sidek ketngahu kuy. Là kóen deng legen yóm kehtahu ye, deng sana mom bud knogol ye Dwata igoen du deng tehe tmaba kuy ebéléen, hlanen bè yóm kun tóbóng Krays. Deng mom henmóyô ye yóm mon le sotu tulón hyu kun.

⁷ Bè ktahuhen, là kô wen dumu “tulón hyu.” Yó gónóhu mon du mò kuy nim ni, abay se tngónu wen tau tendo gel sembeweg kuy bè yó. Tô tenles le yóm Tulón Hyu gbak ebè Krays.

⁸ Okóm ke wen tau tô temles du yóm tehe tolok me kuy, senged ke mi duhen ke wen bè yó kem hógów Dwata gu bè longit, ten-geeden hógów knóen elem lanaw ofi.

⁹ Deng tehe tulón me kuy nim ni, okóm ni bud nulitu bélê ye. Balù kihu tau ke tólóng toloken, ke là sengeden bè yóm kum tolok deng henmóyô ye, angat mógów elem lanaw ofi yóm tau yó.

¹⁰ Nim udélu ni koni, yó kô udél yóm tau ke hnebelen kdóyón le du yó kem dumuhen tau? Là kô yó du. Okóm yó dé hol hnebel nawaw, duhen yóm kdóyón Dwata dou. Là kô hnebelu du ke wen tau dmóyón dou. Ke yó tô nmou, là kóe tau tóbóng lówó Krays ilóu.

Kmò kbaling Pol tau hógów Krays

¹¹ Wen tulónu kuy, kem dumuhu setwoli. Yóm Tulón Hyu gel tulónu, là kóen lemwót bè tau,

¹² ne laen se kô dù tau tmolok du dou. Okóm tódô Jisas Krays yóm hol hetngón du dou.

¹³ Deng hónô gungol ye se yóm tehe dou gel nmò bè klolou du yó kem kum gel hentahu mi kem tau Ju. Tey tehe gel kehsideku yó kem tau hemtahu bè Dwata, balù udì ke wen koduhu kul, mom nóyóu he ke gotu genlau lu.

¹⁴ Bè kegenu lomi tau, là kô gsenged le dou yó kem dumuhu lemnok bè klolò me du yóm kum gel hentahu mi kem Ju. Tey megenek he dou klolò du yó kem tehe kul adat yó kem tehe fù me.

¹⁵ Okóm balù yóm tehe tey ksidek nmou bè yó kem tau hemtahu, ewenem tey nawa Dwata ebéléu. Yóm gu laanu là deng tau, deng eles néléken ou ne mò sotu bè yó kem gel hógówen. Bè yóm deng kehto yóm buteng tehe fét Dwata,

¹⁶ tódô hegfanen béléu yóm hol kun Ngà. Yó gónón hegfan du béléu anì naw e hetngón bè kem tau là Ju le yóm Tulón Hyu gbak ebéléen. Laen kô dù tau dumuhu deng semtulón du nim nmou ni,

¹⁷ ne là se kóe mógów ebè Jirusalim ke naw e stulón bè yó kem gna nélék Jisas mò hógówen gu laanen là deng mélék dou. Okóm mom yó nmou, hetsike ebè benwu yó kem Arab. Legen udì bè yó, ominu mulék ebè syudad Damaskus.

¹⁸ Deng tlu halayen bè yó, ominu yó mógów ebè Jirusalim, wen tô naw snólók bè Wè Pitér. Wen dô lewu fedyanu bè yó béléen.

¹⁹ Laen dù dumu tau tehe hógów Jisas ke tonu bè yó, tek són Jim, twoli yóm gónó tekuy mogot.

²⁰ Ni kem snulatu ebélê ye ni, hono tahu. Ton Dwata yóm klaen dù kéngu.

²¹ Timbow kogolen bè yó, ominu mógów ebè yó kem benwu snakuf prubinsya Sirya ne prubinsya Silisya.

²² Uma kóm bè yóm kdaw yó, là kô me deng setngón he yó kem tau hemtahu bè prubinsya Judiya.

²³ Són olo tngón le yóm gel tulón tau kul, yóm gel mon le, “Yóm tau tehe alì gel hemsidek kum, deng mom du baling tau hetngón du bè kem dumu tau yóm tolok tehe gel kenbéen.”

²⁴ Yó gónóm mon, tey kdóyón le ke Dwata bè yóm deng kbalingu hemtahu bè Jisas.