Dwata 9 - Udél Dwata: Gna Kesfasad ne Lomi Kesfasad

Bud heftulón Musis bè nawa yó kem tau Israél yóm tehe là kimón le ke Dwata

¹ Ó kem tau Israél, ni hol hnungol ye. Kemdaw ni ne bang kifal ye du yóm Él Jurdan ne bang knô ye ta yóm tonok nfun yó kem tau alì wen ne wen genbek le senta ye. Tey lamang yó kem syudad le ne yó kem beng hmilol kul botong tô gefet bè longit.

² Yó kem tauhen, tey le tahà ne tey le kemgis, hono kem tau lembang. Ne deng gel gungol ye se yóm gel mon le, laen kô na a gembek kul.

³ Okóm ni deng tódô ton mata ye, fen tukô gna kuy yóm sana kuy Dwata hol gónó mogot. Hol lómón kmoen ke dmilóf ofi, gotu himoten kdéen. Laen kô dù gmò le. Duhen yó bè yóm kógów ye, mahil bélê ye mlo kul ne kendel gemlà kul lómón yóm deng fasad Dwata kuy.

⁴ Ke deng gotu lo Dwata lu bélê ye yó kem tau yó, hol bê ye abay tô hendem ke yó gónó Dwata mit kuy ebè yóm tonok yó nan e hfun kuy lemwót bè yóm tey ktedeng nmò ye. Là kô yó du. Kaem yó gónó Dwata mlo kul yó kem tau yó abay se hono kem tau mò sidek.

⁵ Là kô yó du gónó Dwata hemlus du kuy nim tonok ni ke mlan bè kehyu kmò ye ne bè kmò ye yóm tedeng. Yó dé gónón mlo kul lemwót bè yóm tendo kmò le sidek ne lemwót bè yóm tehe fasaden yó kem tehe fù ye le Abraham ne Isak ne Jakub.

⁶ Ni mò hol hendem ye, là kô yó du gónó Dwata bemlay du kuy yóm tonok yó ke mlan bè ktedeng nmò ye. Bè ktahuhen, yu se yó kem tau alì mgel kuluhen.

⁷ Bê ye abay klifót yóm tehe kehefebut ye ke Dwata yóm kuy Dwata hol gónó mogot, ditu bè yóm benwu laen hol wen tauhen. Tódô lenwóten bè yóm kdaw ktebel ye yóm benwu Idyip efet ye gefet dini, yó ne yóm tendo ksonol ye ke Dwata.

⁸ Balù ditu bè Bulul Sinay tey kehebut ye ke Dwata, yóm lebut bang gónón gemlà kuy.

⁹ Yó se yóm kdaw tehe knóu ta Bulul Sinay bè yóm naw e kangay yó kem botu kufil gónó Dwata smulat yó kem hlauhen kuy, yóm deng senfasad ye Dwata. Botong fat folò butengu nô bè yó, balù udì ke mkene duhen ke minume.

¹⁰ Omin Dwata bemlay du dou yóm lewu kem botu kufil deng gónón smulat du yó kem hlauhen tekuy gu lem tum dilóf ofi bè yóm kdaw tehe kestifun ye bè but Bulul Sinay. Yó kem kun hlau yó, tehe hol kun snulat.

¹¹ Bè hol són yóm fat folò butengu nô ta Bulul Sinay, blay Dwata dou yóm lewu botu kufil deng gónón smulat yó kem hlauhen tekuy, yóm deng senfasad ye Dwata.

¹² Omin Dwata mon du mò dou, ‘Géhéli mosol abay se yó kem tauhem deng nalakem gu bè Idyip, deng le gotu mò sidek. Deng sana knogol le yóm dou hlau kul ne deng wen dwata lenbù nmò le mò gónó le e tmaba.’

¹³ Ne yó bud udél Dwata ebéléu, monen, ‘Deng eles tngónu yóm alì kgel kulu le ni kem tau ni.

¹⁴ Béem tô henseng ou bè nim nmou bélê le ni abay se deng nô bè nawahu ne yóm keglau kul anì laen dù bud hemtulón kul nawa. Okóm kóm, nmou uu mò mà yóm sotu but tau alì genged ne alì mbegel senta le.’

¹⁵ Tahu se, mosole, nwitu yóm lewu botu kufil gónóhen nô yóm deng senfasad tekuy Dwata. Lel yóm tey dilóf ofi mkal ta yóm bulul yó.

¹⁶ Bè yóm kkólu bè kamfù tódô tonu yóm là bud kimón ye du yó kem hlau deng hlolò Dwata kuy yóm sana Dwata hol gónó kuy mogot. Deng ye gemsalà béléen lemwót bè yóm kmò ye ngà safì tudu tenwél mò gónó ye tmaba.

¹⁷ Ne tódô tudau bè solu ye yóm lewu botu kufil nwitu ne gotu lemusok.

¹⁸ Ominen yó, bude mneged ebè Dwata ne fat folò butengu lemfen bè soluhen, balù udì ke mkene duhen ke minume. Yó gónóhu mò du yóm yó lemwót bè yóm deng kegsalà ye bè yóm kmò ye du yóm kenbê Dwata ne deng mom hebut ye Dwata.

¹⁹ Botonge likò bè yóm tey sidek kebut Dwata yó, yóm lebut hol bang gónón gemlà kuy. Okóm yóm Dwata nahen na bud hnungol ou.

²⁰ Balù Aron tey kebut Dwata du se kun, deng tô hnatayen. Ne yó nmou bè yóm kdaw yó, bude mni bè Dwata bè Aron se kun.

²¹ Bè yóm bud kosolu, tódô nwahu yóm ngà safì blówón tehe nmò ye, yóm gónó ye alì gemsalà bè Dwata ne botu elem ofi. Ominu gotu lemusok du, gotu ndeku efet meblibù ne gotu hkonulu bè yóm lel él lemwót gu lem bulul.

²² Sotuhen, bè yóm tehe knô ye bè Tabira ne bè Masa ne bè Kibrut-hataba, bud tey kehebut ye ke Dwata.

²³ Ne bud bè yóm tehe tô kehewót Dwata kuy bè Kadis-barniya, yóm na ye e tô kwa yóm tonok blayen kuy, tey bud ksonol ye du. Là kô dog snalig ye du ne là se kô nimón ye du.

²⁴ Tódô lenwóten bè yóm hol kbut kdilóu kuy yóm ksonol ye ke Dwata.

²⁵ Yó gónóm mon, botong tehe fat folò butengu lemfen bè solu Dwata abay se deng tulón Dwata dou, deng eles hendemen ne yóm keglaen kuy.

²⁶ Yó nmou, mnihe bè Dwata, monu, ‘Ó Dwata, yóm hol dandónen geta mogot yóm klamangen, hol béem abay genlà lu yó kem kóm tau, yó kem tau deng hewaem gu bè Idyip mlan bè yóm tey kgisem ne bè yóm tey kegbekem.

²⁷ Béem abay bud hendem bélê le ne yóm alì kgel kulu le ni kem tau ni ne yóm tey kmò le sidek. Yó dé hendemem yóm le tehe Abraham ne Isak ne Jakub, yó kem tau tóbóng lówóhem.

²⁸ Ke genlaem lu, ngem kà mon le du yó kem tau Idyip, là gbek Dwata mit kul ebè yóm tonok deng fasaden kul yó kem kun tau. Duhen ke mon le, yó gónó Dwata mit kul ebè yóm benwu laen hol wen tauhen yó kem kun tau anì gotu hnatayen lu bè yó abay se tey kutó nawahen kul.

²⁹ Okóm bè ktahuhen, igò sem lu du yó kem tau deng nélékem mò hol kóm tau ne deng hewaem lu gu bè Idyip mlan bè yóm tey kegbekem ne bè yóm tey kgisem.’ ”