Dwata 7 - Udél Dwata: Gna Kesfasad ne Lomi Kesfasad

Yó kem kun tau Dwata

¹ Yó bud mon Musis, “Ke deng nwiten yu yóm sana kuy Dwata hol gónó mogot ebè yóm tonok hfunen kuy mò gónó ye henek nô, tey angat dê but tau lohen gu tahen, yó kem tau Hitayt ne yó kem tau Girgasayt ne yó kem tau Amurayt ne yó kem tau Kanan ne yó kem tau Pirisayt ne yó kem tau Hibayt ne yó kem tau Jibusayt. Nim hitu kem but tau lohen gu tahen ni, hono kem but tau alì wen ne tey le gembek senta ye.

² Ke deng blay Dwata lu elem hólól ye ni kem tau ni ne ke deng ye gemmò bélê le, tódô gotu himot hnatay ye lu. Bê ye abay mit sbilà bélê le ne hol bê ye abay knodu lu.

³ Bê ye abay myehen bélê le, dalang se yó kem ngà ye bê ye abay hyehen lu ebélê le.

⁴ Abay se angat nit le lu hlayuk bè Dwata ne mo le mom tmaba ebè yó kem dumu dwata. Ke ni se nmò ye, lenbuten yu Dwata ne tódô henmung genlaen yu.

⁵ Yó gónóm mon, gotu genbà ye lu yó kem kul gónó demsù, lenusok ye yó kem hehek botu deng hetfing le ebè yóm kul dwata lennged. Nofok ye yó kem hehek deng hdà le ilô yóm dwata libun le boluyen Asira ne gotu dnutung ntem ye lu yó kem dwata lenbù deng nmò le.

⁶ Hol nmò ye nim ni, abay se yóm sana kuy Dwata hol gónó mogot mfun kuy. Bè yóm kdéen tau nô talak tonok, deng néléken yu mò hol kun tau.

⁷ Là kóen lemwót bè yóm tey kwen ye yóm gónó Dwata kembong nawa kuy ne mélék kuy. Bè ktahuhen, yu se yóm but tau tehe là holen wen bè kdéen but tau talak tonok.

⁸ Okóm kenbong nawa Dwata yu ne là gbeken du ke là hendohoen du yóm tehe fasaden yó kem tehe fù ye. Yó se gónón lemwà kuy mlan bè yóm tey kegbeken, lenwaen yu bè yóm keghesek ye bè Faro bè Idyip.

⁹ Yó gónóm mon, hol sù ye lem hendem ye nim ni. Yóm sana kuy Dwata hol gónó mogot, tek sónen du Dwata ne là kóen monol nawahen. Là kô klifóten du yóm tehe senfasad ye ditu bè Bulul Sinay ne gel hegfanen bè yó kem tau kembong nawa du ne mimón yó kem kun hlau yóm kbong nawahen kul efet kól bè hilu libu bud lugod le.

¹⁰ Okóm là kô gbeken du ke là géhél tnafaken kul yó kem tau kmutó nawa du.

¹¹ Yó gónóm mon, hol nimón ye yó kem hlau Dwata deng toloku kuy kemdaw ni.

Tulón Musis yóm ofol le mimón ke Dwata

¹² Ke hol hnungol ye yó kem hlau Dwata yó koni ne ke teneb ye mimón du, yó se gónó Dwata dmohò du yóm fasaden kuy ne hegfanen bélê ye yóm kbong nawahen kuy, yóm nawa là monolen lómón yóm deng fasaden yó kem tehe fù ye.

¹³ Yó nmoen bélê ye, kenbong nawahen yu ne tendo tnóbóngen yu ne hbólen yu ne hwenen kem ngà ye snéen. Angat hbunguhen yó kem hulu ye, yóm halay ye ne yóm grép ye ne yóm koyu ulib ye. Angat hwenen yó kem safì ye ne kem ubiha ye snéen. Angat gotu blay Dwata kuy ni kem kdéen ni ke deng ye kól ta yóm tonok blayen kuy, yóm tonok deng tehe fasaden yó kem tehe fù ye mò blayen kuy.

¹⁴ Laen dù tau bè klamangen benwu ke tnóbóng Dwata mkél bè yóm któbóngen kuy. Laen dù bélê ye logi duhen ke libun ke là mngaen, dalang se yó kem ógóf ye laen dù bélê le ke là mngaen.

¹⁵ Angat hlayuk Dwata bélê ye yó kem des. Là kô hwiten du ebélê ye yóm des alì knikò deng glan ye bè Idyip, okóm mom hwiten ebè yó kem hohon ye.

¹⁶ Gotu genlà ye lu yó kem but tau deng sù Dwata lem tdok ye ne hol bê ye abay knodu lu. Ne hol bê ye abay tmaba ebè yó kem dwata le abay se bè yó gónó ye gholot.

¹⁷ Ni kem but tau knikò ye ni, hol bê ye abay hendem là gbek ye mlo kul abay se tey le wen senta ye.

¹⁸ Bê ye abay hlikò bélê le. Yó dé hentulón ye nawa yóm tehe nmò yóm sana kuy Dwata hol gónó mogot bè Faro bè Idyip ne bè kdê yó kem tauhen.

¹⁹ Hentulón ye nawa yóm tey dê knikò tehe ton mata ye deng nmò Dwata bè yó kem tau bè Idyip. Bud hentulón ye nawa yó kem hentaw ton ne yó kem tey tennga nmò Dwata bélê ye bè yóm kehewaen kuy gu bè Idyip mlan bè yóm tey kfasangen ne bè yóm tey kekgisen. Yóm tehe keglaen yó kem tau Idyip, hol bud lómón yó se angat bud nmoen bè yó kem tau knikò ye ni kmoen ni.

²⁰ Ne sotuhen, hol lómón ke wen yê nuhag hwit Dwata elem blóng le mò mékét kul yóm kdê dù tau mowil tô hebnos efet gotu genlà ye lu.

²¹ Yó gónóm mon, hol bê ye abay hlikò bélê le ni kem tau ni, yakà tendohen nô lem blóng ye yóm sana kuy Dwata hol gónó mogot. Du se yóm Dwata alì gembek, yóm Dwata hol knikò.

²² Ke deng ye kól ta yóm tonok blayen kuy, angat fen ninut lohen lu bélê ye yó kem tau gel knikò ye. Là hyuhen ke tódô sulék genlà ye lu abay se ke sulék genlà ye lu, ngem, gotu le mból yó kem ógóf lóbô lem bnes ne bè yó se gónó ye glayam.

²³ Angat gotu blay Dwata lu elem hólól ye yó kem hohon ye yó ne angat gotu hesbewegen lu efet le gotu meglà.

²⁴ Balù yó kem tau hol geta bélê le, bud gotu hnatay ye lu ne laen dù bud hemtulón kul nawa. Laen kô dù tau gembek hemseng kuy, gotu himot hnatay ye lu yóm kdê le.

²⁵ Gotu dnutung ntem ye yó kem dwata lennged le. Bê ye abay tô niwol yó kem dwata lennged nmò le bè tahu blówón ne bè blówón bukay ne hol bê ye abay tô nwa ke mò kuy. Ke nwa ye, bè yó ne gónó ye gholot abay se tey kenbê Dwata yóm tau tmaba ebè yóm dwata kéng.

²⁶ Hol béen abay wen bè yó kem dwata kéng yó ke nwit ye ebè gónô ye. Ke yó se nmò ye, yóm keglà Dwata kul angat bud heglumfaken kuy snéen. Hol kenbê ye yó kem dwata kéng yó abay se deng le golu elem tafak Dwata.”