Dwata 6 - Udél Dwata: Gna Kesfasad ne Lomi Kesfasad

Ktulón Musis du bè yó kem tau Israél yóm hlau Dwata alì bong muhen bè kdéen

¹ Yó bud mon Musis mò kul, “Ni se yó kem hlau htugod Dwata dou ebélê ye, yóm sana kuy Dwata hol gónó mogot. Yó gónón htugod du do ebélê ye ni kem hlau ni mò hol tendo nimón ye bè yóm knô ye ta yóm tonok mò gónó ye henek nô.

² Bè yóm klawi ye mowil dalang se yó kem semfu gu bélê ye hol knikò ye Dwata, yóm sana kuy Dwata hol gónó mogot ne hol nimón ye yóm kdê hlauhen tulónu kuy ni. Ke ni se nmò ye angat tahà ktau ye.

³ Yó gónóm mon, yu kem tau Israél, hol gel hnungol ye yó kem hlau Dwata kuy ne hol nimón ye. Ke ni se nmò ye angat hyu kógów klowil ye ne angat tey kból ye bè yóm knô ye ta yóm tonok alì hyu ne wen tey tebasen lómón yóm deng fasad Dwata kuy, yóm sana Dwata yó kem tehe fù tekuy.

⁴ Ó kem tau Israél, ni mò hol sù ye bè nawa ye. Yóm Dwata hol gónó mogot, tek són du yóm kut Dwata.

⁵ Hol hewót ye bè nawa ye yóm kbong nawa ye ke Dwata, hotu ye nawa ye ebéléen ne hotu ye gel ye mimón du.Hol bê ye abay klifót yó kem hlau Dwata deng tulónu kuy kemdaw ni.

⁶ Hol bê ye abay klifót yó kem hlau Dwata deng tulónu kuy kemdaw ni.

⁷ Hol bud tolok ye bè yó kem ngà ye. Tendo bud gel sensulit ye bélê le balù kihu gónó ye nô, ke nô ye bè gónô ye duhen ke mógów ye, ke hegnô ye duhen ke mò ye nmò, hol tendo sensulit ye bélê le.

⁸ Yó kem hlau Dwata yó, eles bkes ye te henmù ye ne sù ye lem uyó ye mò tendo heftulón du bè nawa ye.

⁹ Snulat ye bè hehek bak dól gónô ye ne bè bak tikeb labat ye.

Yóm eles hetgama Musis kul anì mimón le

¹⁰ Bè yóm kwit Dwata kuy eta yóm tey tonok deng tehe fasaden yó kem fù ye le Abraham ne Isak ne Jakub, deng eles wen kem syudad glo ye tahen, kem syudad lembang ne mdengen, syudad là tehe kuy hdà du.

¹¹ Yó kem gónô bè yó kem syudad blayen kuy yó tódô hnok lemen yó kem kimu alì hyu, kem kimu là tehe yu du hemsù du bè yó. Ne wen se kem kokol bè yó, kem kokol là tehe yu du mokol du. Wen se kem tey grép lamang nô bè yó ne wen tey koyu ulib mowil bè yó snéen, kem hulu là tehe yu du mulu du. Ke deng nwit Dwata yu ebè nim tonok monu ni ne ke deng ye gemtu bè yó kem ken ye bè yóm tonok yó,

¹² hol ye eles temgama anì là klifót ye du yóm Dwata tehe hewà kuy gu bè Idyip, bè yóm benwu gónó ye ghesek.

¹³ Hol sù ye bè nawa ye yóm klikò ye du yóm sana kuy Dwata hol gónó mogot. Olon du gónó ye gel tmaba. Ke wen fasad ye, són bè kun boluy gónó ye hlan du.

¹⁴ Hol bê ye abay tmaba ebè yó kem dumu dwata lennged, balù kihu bè yó kem dwata yó kem tólóng tau hmilol kuy.

¹⁵ Ke tmaba ye ebè yó kem dumu dwata kéng, lenbuten yu Dwata. Ne yóm kebuten kuy yó hol lómón ke mken ebélê ye yóm tey ofi, gotu sulék genlaen yu. Abay se yóm Dwata tendo gel nô bélê ye, du se yóm sana kuy Dwata hol gónó mogot ne tey sidek kélés nawahen du ke wen dumu dwata lennged tnaba ye.

¹⁶ Hol béen abay wen bélê ye tô tmilów ke Dwata lómón yóm tehe nmò ye bè benwu Masa.

¹⁷ Tendo nimón ye yóm kdê hlauhen kuy.

¹⁸ Hol nmò ye yóm tedeng ne hyu bè kton Dwata du anì hyu kógów klowil ye. Ke ni se nmò ye, angat ye gemfun bè yóm tey tonok hyu deng fasad Dwata yó kem fù ye ekni

¹⁹ ne angat gotu lo ye lu yó kem hohon ye lómón yóm deng fasad Dwata kuy.

²⁰ Angat wen kdawen ksólók le kuy yó kem ngà ye, mon le, ‘Moen du ke gotu hlolò Dwata tekuy ni kem hlau ni?’

²¹ Yó tulón ye kul, mon ye, ‘Tehe me ghesek bè Faro bè Idyip okóm lenwaen mi Dwata mlan bè yóm tey kegbeken.

²² Tehe tódô kum mata mton du yó kem hentaw ton nmoen bélê me ne yó kem knikò ton nmoen bè yó kem tau Idyip ne bè Faro yóm tau hol geta bélê le ne bè yóm kdê genlalen.

²³ Yó nmò Dwata bélê me, lenwaen mi gu bè Idyip, anì nwiten mi edini ne anì blayen kum nim tonok ni lómón yóm deng fasaden yó kem fù tekuy ekni.

²⁴ Ne yó hloloen tekuy yóm sana Dwata hol gónó mogot ke hol nimón te yó kem kun hlau ni ne ke nô bè nawa tekuy yóm klikò te du. Ke ni se nmò tekuy, tendo tnóbóngen tu ne tendo hyu kógów klowil tekuy.

²⁵ Ke hol tekuy hteneb mimón du yóm kdê deng hlauhen tekuy, yó gónón hyu nawan ebélê te.’ Ni se hol tulón ye yó kem ngà ye.”