Dwata 34 - Udél Dwata: Gna Kesfasad ne Lomi Kesfasad

Katay Musis

¹ Kewót Musis bè yó bè Datal Muab mneged eta yóm Bulul Nibu, hlós etu ta tfusù yóm Bulul Pisga fi dmata kdaw yóm syudad Jiriku. Bè yó gónó Dwata tmolok du béléen yóm klamang benwu Kanan. Toloken du yóm klamang Gilyad efet kól bè tonok Dan, yóm hol fi debwak.

² Bud toloken du yóm klamang tonok angat nfun Naftali ne klamang tonok angat nfun Ifraim ne Manasi. Bud toloken du yóm klamang tonok angat nfun Juda efet kól fi desdef bè yóm Mohin Miditiranyan.

³ Bud toloken du yóm fi leged yóm tonok angat nfun Juda ne yóm datal lemwót bè Sur efet kól bè Jiriku, yóm syudad gónón nô yó kem tey lefò wen.

⁴ Omin Dwata mon du mò ke Musis, “Ni se yóm tonok tehe fasadu ke Abraham ne Isak ne Jakub mò angat blayu bè yó kem sfu le. Olohu hton du kóm tahen yóm tonok tu okóm là heflósu kóm etu.”

⁵ Tahu se, matay Musis bè yó bè Muab yóm tau tóbóng lówó Dwata, hol lómón yóm deng mon Dwata mò du.

⁶ Bè yó gónó Dwata lembeng du bè yóm sotu datal bè Muab sfatà yóm benwu Bitfur. Okóm efet ni kmoen ni, laen dù temngón du yóm seblà gónón lebeng yó.

⁷ Bè yóm katay Musis, deng lematu lewu folò ne halayen, bede sana tolo kekgisen ne sana tolo kehyu ketngelen.

⁸ Yó kegen kem tau Israél lemangag ke Musis bè yó bè Datal Muab, botong tlu folò butengen.

⁹ Yó tles Musis duhen Juswa yóm ngà Nun. Tey tau hulung hedem abay se deng tehe nnok Musis ta kuluhen bè yóm kéléken du mò tlesen. Tey kimón le ke Juswa yó kem tau Israél ne lolò le yóm kdê hlau Dwata hlanen bè Musis.

¹⁰ Laen dù dumu tugod Dwata bè yó bè Israél ke mkél ke Musis, yóm tódô kessuyó le Dwata ke gel le stulón.

¹¹ Laen dù dumu tugod Dwata ke deng mò du yó kem tey dê hentaw ton deng hmò Dwata ke Musis ditu bè Idyip bè solu Faro ne bè yó kem genlalen ne bè klamangen benwu le.

¹² Laen dù dumu tugod Dwata ke gbek le mò du yó kem tey knikò deng nmò Musis lem blóng yó kem tau Idyip. Ne gotu ton yó kem tau Israél yóm nmoen yó.