Dwata 33 - Udél Dwata: Gna Kesfasad ne Lomi Kesfasad

Kuyag Musis yó kem tau Israél

¹ Ni se yó kem udél Musis yóm tau Dwata, bè yóm kuyagen yó kem tau Israél gu laanen là deng matay, yó monen,

² “Hesut gu bè Bulul Sinay yóm sana Dwata hol gónó mogot. Lómó khesuten lómón khesut yóm kdaw eta benwu Idom. Lenwóten bè Bulul Paran, mnóng ebè yó kem kun tau. Botong sfolò libu hógówen mung du ne wen yóm ofi tendo dmilóf fi bè sigel kwananen.

³ Yóm Dwata, tey kbong nawahen kul yó kem kun tau, gotu le nô lem hólólen yóm kdê le. Tódô lolò le yóm kun klan ne henmóyô le yó kem hloloen kul.

⁴ Deng hol hlolò Musis tekuy yó kem hlau Dwata. Nim hlau ni, hol lómón ke kimu alì mebtes nô bélê tekuy.

⁵ Bè yóm tehe gotu kestifun yóm sfolò lewu kem ktol yó kem tau Israél, gomong yó kem gel malak kul, yó se yóm kdaw kbaling Dwata mò hol geta bè yó kem tau Israél.”

⁶ Yó udél Musis gbak ebè yó kem sfu Rubén, monen, “Balù yóm là kwen le yó kem sfu Rubén, hol tódô senflós le mból he anì là lanahen yóm kul boluy.”

⁷ Ne yó udél Musis gbak ebè yó kem sfu Juda, monen, “Ó Dwata, hol hnungolem yóm kni le tóbóng béléem. Hol bud sensotuhem lu bè yó kem dumu le Israél. Mungi sfatay bélê le, Dwata. Hol tnóbóngem lu bè yó kem hohon le.”

⁸ Yó udél Musis gbak ebè yó kem sfu Libay, monen, “Ó Dwata, deng gel hegfanem yóm kóm kóyô bè yó kem sfu Libay mlan bè yóm atù boluyen Urim ne Tumim. Lu se yó kem tóbóng lówóhem là monol nawa le ebéléem. Deng tehe tnilówem lu ditu bè Masa ne bud tonem se yóm tey kgulit le ditu bè yó kem él bè Miriba.

⁹ Deng hegfan le yóm hol kget yóm kegfi le béléem senta yóm kegfi le bè yó kem tuha le ne bè yó kem dumu le setwoli ne bè kem ngà le. Deng gotu nimón le yó kem hlauhem kul ne tey kehteneb le lemolò du yóm deng senfasad ye.

¹⁰ Angat lu fen tmolok yó kem kóm tau anì nimón le yó kem hlauhem kul. Bud lu snéen demsù bè yóm gónó gel demsù ebéléem.

¹¹ Ó Dwata, hol tnóbóngem nim sfu Libay ni anì hol le mbegel. Hyu ke holi hligal du bè yó kem gel nmò le. Genlaem yó kem hohon le, béem bud hlowil lu.”

¹² Yó udél Musis gbak ebè yó kem sfu Bindyamin, monen, “Yó kem sfu Bindyamin, lu se yó kem tau kenbong nawa Dwata, kem tau tendo kenlungen. Tendo bnenteyen lu ket kdaw ne tendo hlós nô lem blóng le.”

¹³ Yó udél Musis gbak ebè yó kem sfu Jusif, monen, “Dwata he hol hkulón du eta yóm tonok le ne wen él hesuten gu laan tonok mò tendo hméfê du.

¹⁴ Hol tendo tnóbóng Dwata he yóm tonok le anì tendo gengón yó kem bungu koyu alì mnóm bélê le ne tódô ket bulónen tendo setgafit mungu yó kem koyu alì hyu bélê le.

¹⁵ Hol tódô tfeng koyu mungu he yó kem sana bulul legen le, yóm bungu koyu alì megélék.

¹⁶ Lemwót bè yóm tey tóbóng Dwata angat tódô tfeng he ta yóm tonok le yó kem alì hyu. Yóm Dwata yó, du se yóm sana Dwata hol gónó mogot tehe mudél gu lem yóm ngà koyu lefungu hono dilóf. Hol dohò eta yó kem sfu Jusif he ni kem tóbóng ni, yakà du se tehe gónó le galak yó kem twoguhen.

¹⁷ Yóm Jusif, hol mkél bè kgis safì tudu. Yóm hangahen, mkél bè hanga yóm safì tudu alì mayal nô lem bnes. Kehlingónu du yóm hangahen yó, yó se yó kem hilu libu sfu Manasi, yóm ngaen twogu ne yó kem hilu folò libuhen sfu Ifraim, yóm ngaen twoli. Mlan bè yó kem hangahen yó, gotu snukóten yó kem dumu but benwu, gotu lohen lu efet kól bè són tonok.”

¹⁸ Yó udél Musis gbak ebè yó kem sfu Sibulun ne sfu Isakar, monen, “Hol temnù he yóm kehyu klowil le yó kem sfu Sibulun lemwót bè yó kem udél swa gel nmò le bè yó kem dumu benwu fatu mohin. Dalang se yó kem sfu Isakar, hol temnù he yóm kul kehyu klowil lemwót bè yóm gel nmò le bè kul gónô.

¹⁹ Gotu tinok le yó kem tólóng tau ebè yóm kul bulul ne dsù le bè yó yóm hol bang knóón dsù ebè Dwata. Wen tey hyu klowil le lemwót bè mohin, lemwót bè yóm gel ton le lem yó kem helek bè kilil mohin.”

²⁰ Yó udél Musis gbak ebè yó kem sfu Gad, monen, “Hol dóyón tekuy Dwata, yóm deng hlamang yóm kul tonok yó kem sfu Gad. Ke hningónu lu, hol le skél bè yóm liyun fen mangat bè lan, mebel kenfóen. Msék le sigel, duhen ke sigu.

²¹ Yó kem sfu Gad yó, deng nwa le yóm tonok alì hyu mò kul. Yóm tonok nólól le bélê le, hol tonok knóón bè yóm tau fen malak kul. Bè yóm tehe kestifun yó kem malak bè yó kem tau Israél, tey klolò le du yóm kun kóyô Dwata ne yó kem hloloen kul bè yóm któbóng le yó kem dumu le Israél.”

²² Yó udél Musis gbak ebè yó kem sfu Dan, monen, “Yó kem kun ból Dan hol lómón ke liyun lomi lemnok hetò lemwót gu bè Basan.”

²³ Yó udél Musis gbak ebè yó kem sfu Naftali, monen, “Yó hem tonok fi desdef efet kól ditu bè yóm tonok fi leged yóm mò hol kul nfun.”

²⁴ Yó udél Musis gbak ebè yó kem sfu Asér, monen, “Yó kem kun ból Asér, tey któbóng Dwata kul senta yó kem dumu le. Hol kenbong nawa yó he kem dumun setwoli. Hol tódô mfól koyu ulib he yóm tonok le ne tey genged hnolo mebtes lemwót bè yóm koyu yó.

²⁵ Yó kem benwu le, hol hono bala tók he yóm bak tikeb le anì laen dù gembek husek elemen. Ne tendo menek he yóm kbenwu le.

²⁶ Ó kem tau Israél, laen dù dumu dwata mkél bè yóm kuy Dwata. Bè yóm gel któbóngen kuy, tódô kendel lemwót gu ditu bè longit mung bè lobun.

²⁷ Ebè yóm sana kuy Dwata se gónó ye e mlo. Laen kô dù nan e tul són yóm tendo ktuden kuy. Bè yóm kehlós ye elem yóm benwu fasad Dwata kuy, eles tukô gna kuy Dwata. Deng gotu lohen yó kem hohon ye ne heglaen kuy yóm kdê le.

²⁸ Yó gónóm mon, menek kbenwu le yó kem sfu Jakub. Gsengel nawa le du yóm tonok le tódô hono hulu tahen, dalang se yó kem grép gónón lemwót yó kem tifas gel ninum le. Yóm tonok le yó, tendo hnéfê yóm amù lemwót gu bè longit.

²⁹ Ó kem tau Israél, tey kligal ye kuy. Laen dù semnged kuy yu kem tau deng lenwà yóm sana kuy Dwata hol gónó mogot. Dwata se yóm kuy klung ne kuy sudeng mò mofin kuy ne hegmò kuy bè yó kem hohon ye. Yó kem hohon ye, angat le msut na le e hkodu bélê ye, okóm angat gotu genlà ye lu.”