Dwata 31 - Udél Dwata: Gna Kesfasad ne Lomi Kesfasad

Ketles Juswa ke Musis

¹ Tódô henlel Musis mudél ebè yó kem tau Israél

² ne yó bud monen mò kul, “Ni deng lematu bud lewu folò ne halayu, là bud gbeku du ne malak kuy. Lel Dwata deng mon du mò dou là kô gifalu du yóm Él Jurdan.

³ Dwata he fen tukô gna kuy yóm sana kuy Dwata hol gónó mogot ne gotu genlaen yó kem tau menwu ta yóm tonok blayen kuy anì gfun ye yóm tonok le. Yó mò bud tles malak kuy duhen Juswa, hol lómón yóm deng mon Dwata.

⁴ Angat gotu genlà Dwata yó kem tau menwu bè yó lómón yóm tehe keglaen kul le Sihun ne Ug yó kem tau hol geta bè yó kem tau Amurayt, gotu genbaen yó kem benwu le.

⁵ Angat blay Dwata lu elem hólól ye ne hol nmò ye bélê le yóm deng monu mò kuy.

⁶ Hol ye eles htigel ne hol hfól ye nawa ye. Bê ye abay hlikò bélê le. Kaem yóm sana kuy Dwata hol gónó mogot tendo nô bélê ye. Là kô tnagaken kuy ne là se bayaen kuy.”

⁷ Omin Musis tmaba ke Juswa, ne monen mò du bè yó bè solu yóm kdéen tau Israél, “Ó Juswa, holi eles htigel se kóm ne hol hfólem nawam. Uu mò fen bud tles malak kul ni kem tau ni ebè yóm tonok tehe fasad Dwata bè yó kem tehe fù le. Uu mò tmóbóng kul anì hlós kegfun le du yóm tonok yó.

⁸ Dwata he fen tukô gna kóm ne tendo nô béléem. Là kô tnagaken kóm ne là kô bayaen kóm. Yó gónóm mon, hol hfólem nawam ne béi abay hlikò.”

Yóm hlolò Dwata kul bè gel kesfala le yóm hlauhen bè gónón wen

⁹ Duhen yó, gotu snulat Musis yóm kdê hlau Dwata ne blayen bè yó kem sfu Libay gel blóng le ebè Dwata yóm fen gel mit yóm Slungan Fasad ne bè yó kem tuha gel malak yó kem tau Israél.

¹⁰ Yó hloloen kul, monen, “Bè ket són yóm hitu halay, yóm halay gel kehlifót ye utóng yó kem tau mutóng bélê ye, hol senfala ye ni kem hlau Dwata ni bè gónón wen ke deng le gotu stifun bè yóm Kehligal le bè Slung yó kem tau Israél,

¹¹ bè yóm kdaw le gel stifun tmaba ebè yóm sana kuy Dwata hol gónó mogot bè yóm benwu néléken mò gónó ye gel tmaba ebéléen.

¹² Gotu sentifun ye yó kem logi ne yó kem libun ne yó kem ngà ne yó kem tólóng tau menwu lem blóng ye anì tódô kdê le gotu mungol du. Ne lemwót bè yóm kungol le du, gónóhen wen klikò le mulé ke Dwata yóm sana kul Dwata hol gónó mogot ne hteneb le mimón du yó kem toloken kul.

¹³ Hol nmò ye nim ni anì angat gungol yó kem ngà ye là deng mungol du yó kem hlau Dwata ne anì wen klikò le mulé ke Dwata se kul. Hol nmò ye nim ni bè yóm igò ye mowil ta yóm tonok móyón nfun ye nô sentu Él Jurdan.”

Yóm hol són hlolò Dwata ke Musis

¹⁴ Omin Dwata bud mon du mò ke Musis, “Ó Musis, là buden té ne klowilem. Tnabahem Juswa ne nwitem elem yóm Gónô gónóhu nô lem blóng ye anì tulónu du yó kem mò hlolou du.” Tahu se, lemwót Musis lewu le Juswa elem Gónô Dwata

¹⁵ ne hegfan bélê le bè yó Dwata nô lem yóm lobun bè bak dól yóm Gónóen.

¹⁶ Yó mon Dwata mò ke Musis, “Bang kukol towokem ne. Kesoki deng matay, là kô le bud teneb béléu ne yó kem tau ne angat nulé le yóm deng senfasad tekuy. Tódô knogol le ou ne tmaba le ebè yó kem dwata kéng yó kem tau nô ta yóm tonok móyón hnusek le.

¹⁷ Bè yóm kmò le du yóm yó angat lenbutu lu. Tódô bayau lu ne tódô le meglà, ne tey dê glumfak sidek sut bélê le. Omin le yó he hetngón, yó gónó le gmumfak du nim ni abay se là bude nô bélê le, yóm sana kul Dwata.

¹⁸ Bè yóm kdaw yó, là kóe bud móyô tmóbóng kul abay se tey sidek yóm nmò le bè yóm ktaba le ebè yó kem dumu dwata.”

¹⁹ Bud mon Dwata mò ke Musis, “Ni snulatem nim lingón nii. Tolokem yó kem tau Israél mò angat gónóhu hewót mdà du yóm ktafaku kul.

²⁰ Nwitu lu ebè yóm tey tonok hyu ne wen tey tebasen, lómón yóm tehe fasadu bè yó kem tehe fù le. Bè yóm tonok yó, là bud le élél du bè ken ne mdengen klowil le tahen. Okóm angat knogol le ou ne tmaba le ebè yó kem dumu dwata. Kenbê le o ne nulé le yóm deng senfasad me.

²¹ Lemwót bè yóm deng kulé le do, tey dê gfà sidek sut bélê le. Ne nim lingón ni mò angat gónóhu hewót mdà du yóm ktafaku kul. Balù yó kem semfu gu bélê le, là kô klifót le du se kul nim lingón ni. Balù ni, gu laanu là deng mit kul eta yóm tonok fasadu kul, deng sana tngónu yóm nô lem hendem le.”

²² Tahu se, bè yóm kdaw yó tódô snulat Musis yóm lingón yó ne toloken yó kem tau Israél.

²³ Omin Dwata bud mudél ebè Juswa yóm ngà Nun, monen mò du, “Eles hfólem nawam ne elesi htigel. Uu se mò fen bud tles malak kul yó kem tau Israél ebè yóm tonok fasadu kul ne ou se tendo nô béléem.”

²⁴ Gotu snulat Musis bè bok yó kem hlau Dwata ne tey ketgamahen du anì laen dù gtebelen.

²⁵ Timbow deng ksulaten du, yó udélen ebè yó kem tau sfu Libay gel blóng ebè Dwata, yó kem tau mò fen gel mit yóm Slungan Fasad, monen,

²⁶ “Nwa ye nim Bok Hlau ni, yóm bok gónón nô yó kem hlau Dwata, sù ye klohok yóm kun Slungan Fasad yóm sana kuy Dwata hol gónó mogot anì tódô nô bè yó mò gemtanud kuy kem tau Israél.

²⁷ Deng eles tngónu yóm tey kgel kulu ye ne yóm là kimón ye ke Dwata. Balù ni hem tolo knóu lem blóng ye, sana là kimón ye ke Dwata. Ne milud he kmò ye du ke denge matay.

²⁸ Gotu sentifun ye lu edini yó kem tuha gónó ye gel galak ne yó kem genlal anì tulónu kul ni kem ni. Tnabahu longit ne tonok mò gemtanud yó kem tau Israél.

²⁹ Tódô eles tngónu, ke denge matay tey angat kmò ye sidek ne angat kenbê ye yóm deng toloku kuy. Angat wen kdawen wen tey glumfak ye abay se deng hebut ye Dwata lan ye mò yó kem sidek alì kenbéen.”

Lingón Musis

³⁰ Omin Musis lemingón bè yóm igò le hmungol yó kem tau Israél, yó lingónen,