Dwata 27 - Udél Dwata: Gna Kesfasad ne Lomi Kesfasad

Ksulat le du bè kem botu yó kem hlau Dwata

¹ Omin Musis ne yó kem tuha gel malak yó kem tau Israél mon du bè yó kem tau Israél, “Hol nimón ye yóm kdê hlolò Dwata deng tulónu kuy kemdaw ni.

² Bè yóm kdaw kifal ye du yóm Él Jurdan na ye e husek ebè yóm tonok blay Dwata kuy, yóm sana kuy Dwata hol gónó mogot, yó nmò ye, semsodò ye eta yó kem botu lembang ne bnukay ye.

³ Omin ye smulat du tahen yóm kdê hlau Dwata ne yó kem toloken kuy. Bud sensulitu bélê ye. Ke deng ye husek ebè yóm tey tonok hyu ne mabù huluhen yóm deng tehe fasad Dwata kuy yóm Dwata yó kem tehe fù ye

⁴ ne ke deng ye nô fi fatu yóm Él Jurdan, bè yó ta yóm Bulul Ibal sensodò ye yó kem botu monu yó koni ne bnukay ye lómón yóm deng hlolou kuy kemdaw ni.

⁵ Sotuhen, semsodò ye botu bè yó mò gónó ye demsù ebè Dwata ne yó kem botu sensodò ye yó, là hyuhen ke deng wen lan bala tók du.

⁶ Abay se yóm botu sensodò ye mò gónó ye gel demsù ebè Dwata, là hyuhen ke deng wen lan bemtù du. Bè yó gónó ye demsù du ebè Dwata yó kem dsù hkekeb ye ebéléen.

⁷ Ne bè yó snéen gónó ye demsù du yóm dsù gel ken ye bè yóm gel kestifun ye hligal lemwót bè yóm deng kessotu ye bè Dwata ne bè dumu tau. Bè yó bè solu Dwata yóm sana kuy Dwata hol gónó mogot, hol ye hligal mken.

⁸ Bè yó kem botu deng bnukay ye, hol hentilob ye smulat du tahen yóm kdê hlau Dwata kuy.”

⁹ Omin Musis ne yó kem sfu Libay gel blóng ebè Dwata bud mon du bè kdê yó kem tau Israél, “Ó kem tau Israél, bê ye tagad hebnes na ye hol hnungol ou. Kemdaw ni deng ye baling kem kun tau Dwata yóm sana kuy Dwata hol gónó mogot.

¹⁰ Yó gónóm mon, hol nimón ye ne hol bê ye abay nulé yó kem kun hlau deng tulónu kuy kemdaw ni.”

Ktafak Dwata yóm tau là mimónen

¹¹ Yó bud udél Musis ebè yó kem tau Israél, monen,

¹² “Sok deng nifal ye yóm Él Jurdan yó nmò ye, wen bélê ye fen mdà ta Bulul Girisim mò hem-el du yóm hyu bè yó kem tau Israél lemwót bè kimón le ke Dwata. Yó kem tau fen mdà ta Bulul Girisim, duhen yó kem sfu Simyun ne Libay ne Juda ne Isakar ne Jusif ne Bindyamin.

¹³ Ne bud wen bélê ye fen mdà ta Bulul Ibal mò hem-el du bè yó kem tau Israél yóm tafak lemwót bè là kimón le ke Dwata. Yó kem tau fen mdà ta Bulul Ibal yó, duhen yó kem sfu Rubén ne Gad ne Asér ne Sibulun ne Dan ne Naftali.

¹⁴ Lemwót kul yó kem dumu sfu Libay fen hgel le udél le, mon le,

¹⁵ ‘Hol tnafak Dwata ke wen tau mò dwata lennged gu bè botu, duhen ke bè koyu, duhen ke bè yó kem gel tenwél le, ne ke lifuten yóm gel ktabahen ebéléen. Yóm nmoen yó, tey sidek kekbê Dwata du.’ Ne kdéen tau gotu hem-el du, mon le, ‘Tahu yó.’

¹⁶ ‘Hol tnafak Dwata yóm tau là nadaten ke maen ne yéen.’ Ne kdéen tau gotu hem-el du, mon le, ‘Tahu yó.’

¹⁷ ‘Hol tnafak Dwata yóm tau ke nilihen yóm blóng tonok yóm dumuhen sebét.’ Ne kdéen tau gotu hem-el du, mon le, ‘Tahu yó.’

¹⁸ ‘Hol tnafak Dwata yóm tau sekban kalaken yóm tau butô.’ Ne kdéen tau gotu hem-el du, mon le, ‘Tahu yó.’

¹⁹ ‘Hol tnafak Dwata yóm tau ke nongoen yó kem tau milo elem blóng le, ne yó kem ngà hikit, ne yó kem libun bolu.’ Ne kdéen tau gotu hem-el du, mon le, ‘Tahu yó.’

²⁰ ‘Hol tnafak Dwata yóm tau ke wen nugeten bè yó kem yehen maen.’ Ne kdéen tau gotu hem-el du, mon le, ‘Tahu yó.’

²¹ ‘Hol tnafak Dwata yóm tau ke hembô ógóf.’ Ne kdéen tau gotu hem-el du, mon le, ‘Tahu yó.’

²² ‘Hol tnafak Dwata yóm tau ke nugeten libunen.’ Ne kdéen tau gotu hem-el du mon le, ‘Tahu yó.’

²³ ‘Hol tnafak Dwata yóm tau ke snamuken tuónen libun.’ Ne kdéen tau gotu hem-el du, mon le, ‘Tahu yó.’

²⁴ ‘Hol tnafak Dwata yóm tau ke lenifut hnatayen kedumun.’ Ne kdéen tau gotu hem-el du, mon le, ‘Tahu yó.’

²⁵ ‘Hol tnafak Dwata yóm tau ma sukéy hmatay yóm tau laen dù salaen.’ Ne kdéen tau gotu hem-el du, mon le, ‘Tahu yó.’

²⁶ ‘Hol tnafak Dwata yóm tau là mimón du yóm kdê hlauhen ne yóm kdê toloken.’ Ne kdéen tau gotu malà du, mon le, ‘Tahu yó.’ ”