Dwata 26 - Udél Dwata: Gna Kesfasad ne Lomi Kesfasad

Yóm kmò kbad le ke Dwata bè yó kem nuta le

¹ Yó bud mon Musis, “Ke deng ye kól ta yóm tonok blayen kuy yóm sana kuy Dwata hol gónó mogot ne ke deng ye henek tahen,

² yó nmò ye yóm ket kuy na sotu ke wen nuta ye, mabì ye bè ket tanay bungu yó kem hulu ye ne hol nwit ye ebè yóm benwu angat nélék Dwata mò gónó ye tmaba ebéléen.

³ Mógów ye ebè yóm tau gel blóng ye ebè Dwata tolo mò nmò bè yó bè yóm kdaw yó ne mon ye mò du, ‘Nim nwitu ni mò gónów hetngón du bè yóm sana do Dwata hol gónó mogot, yóm deng kkólu ta yóm tonok tehe fasaden yó kem tehe fù tekuy mò blayen kut.’

⁴ Lemwót se kun yóm tau gel blóng ebè Dwata yó, nwahen yóm abì nwitem ne suen bè solu yóm gónó ye gel demsù ebè Dwata.

⁵ Ne bè yó bè solu Dwata, yó udélem monem, ‘Yóm tehe fuu, tau Aramiyan se kun laen dù mdengen gónón nô. Tehe nwiten yó kem fes lówóhen ebè Idyip ne ditu gónó le nô. Bè yóm tehe kógów le yó, là kô le wen okóm deng tey kból le bè yó bè Idyip ne baling sotu but benwu alì mbegel.

⁶ Lemwót yó kem tau Idyip, tey tehe kehsidek le kum ne tey kdanda kdók le kum mò hesek le.

⁷ Omin me yó tmaba ebè Dwata yóm sana Dwata hol gónó le mogot yó kem tehe fù me, mni me tóbóng béléen. Ne tahu se, gungolen yóm kni me yó ne tonen yóm tey keglayam me ne yóm tey kgelen bélê me ne yóm tey ksidek kegnóm me du.

⁸ Ne hewaen mi gu bè Idyip mlan bè yóm tey kegbeken ne bè yóm tey kgisen. Wen tey hentaw ton nmoen lem blóng me ne wen yóm tey knikò nmoen bè yó kem tau Idyip.

⁹ Yó nmoen, nwiten mi edini ne blayen kum nim tey tonok hyu ne tonok alì tembas.

¹⁰ Duhen ni, nwitu ebè Dwata dumuhen nim tanay nuta deng blayen dou.’ Omin ye hemsù yóm abì bè solu Dwata ne dóyón ye Dwata bè.

¹¹ Hol ye hligal bè yó kem hyu deng blay Dwata kuy dalang se yó kem fes lówó ye. Bè yóm kehligal ye, homong ye yó kem sfu Libay ne yó kem tólóng tau menwu lem blóng ye.

¹² Bè ket getluhen halay, hol blay ye yóm gesfoloen gel bad ye ke Dwata bè kem hulu ye bè yó kem sfu Libay ne bè yó kem tólóng tau menwu lem blóng ye ne bè yó kem ngà hikit ne bè yó kem libun bolu. Yó gónó ye mò du nim ni, anì yó ket tau bè ket benwu ye wen kun gónó ma mò ken le. Ke deng nmò ye nim ni,

¹³ yó mon ye mò ke Dwata, ‘Ó Dwata, laen dù badem ke bnosu bè gónóu. Deng gotu blayu yó kem sfu Libay ne bè yó kem tólóng tau menwu lem blóng me ne bè yó kem ngà hikit ne bè yó kem libun bolu lómón yóm deng hlauhem kum. Là gbeku du ke là nimónu du yó kem deng hloloem kum gbak bè keblay bad ebéléem, laen kô dù klifótu du.

¹⁴ Bè yóm tehe kodungu, laen kô dù naw e ken du nim badu kóm ni ne laen kô deng nwahu du bè yóm là deng khólósu bè soluhem. Laen se dù deng nwahu du ke mò blayu bè tau matay. Deng nimónu u Dwata ne deng gotu nmou yóm kdê hloloem kum gbak bè keblay bad ebéléem.

¹⁵ Temngeli edini laan lemwót gu dyó bè yóm gónóm nô bè longit, nuyagem yó kem kóm tau Israél. Knudungem snéen yóm tey tonok hyu ne tonok tembas deng blayem kum, lómón yóm deng fasadem yó kem tehe fù me.’

Yó kem hol kun tau Dwata

¹⁶ Kemdaw ni, yó hmoen kuy yóm sana kuy Dwata hol gónó mogot, hloloen kuy yóm hol kimón ye du yóm kdê hlauhen. Yó gónóm mon, hol hewót ye bè nawa ye yóm kehteneb ye lemolò du.

¹⁷ Kemdaw ni deng mon ye Dwata se yóm sana kuy Dwata hol gónó mogot. Ne deng fasad ye du yóm kimón ye yóm kdê hlauhen ne yóm klolò ye du.

¹⁸ Kemdaw ni deng henmóyô Dwata yu mò hol kun tau, lómón yóm deng fasaden kuy. Yó hloloen kuy, hol nimón ye yóm kdê hlauhen.

¹⁹ Ke yó se nmò ye, hegetahen yu senta yó kem dumu but tau deng nifilen ne tey kegdóyón yóm boluyen lemwót bélê ye. Yu se yó kem hol kun tau Dwata, lómón yóm deng fasaden kuy.”