Dwata 19 - Udél Dwata: Gna Kesfasad ne Lomi Kesfasad

Yóm blóng bè tonok yóm dumu ye sebét

¹⁴ Yó bud mon Musis, “Ke deng ye kól ta yóm tonok blayen kuy yóm sana kuy Dwata hol gónó mogot, hol bê ye abay nili yóm sana ilô bè són tonok yóm dumu ye sebét, yóm tehe btesen là sekna.

Yóm tau mò tmanud

¹⁵ Bê ye tagad hensalà yóm tau ke tek sotu tau gemtanud du. Hyu ke lewu duhen ke tlu mò gemtanud du ke tahu se yóm salaen.

¹⁶ Ne ke wen tau dnelemen kéng kedumun,

¹⁷ hyu ke tódô le lewu mógów ebè yóm gónó le gel stifun tmaba ebè Dwata anì hkukum le bè yó kem tau gel blóng ebè Dwata ne bè yó kem dumu tau gel kmukum fen myón bè yó bè yóm kdaw yó.

¹⁸ Yó kem tau kmukum fen hol hemget smólók du yóm knukum le. Ne ke gfan yóm kdelemen du kéng yóm dumun Israél yóm tau tmifù yó,

¹⁹ tnafak kmò du. Yó tafaken, yóm tehe tô tafak yóm tau dnelemen. Bè yóm kmò ye du nim ni mò lan ye mkó du lem blóng ye yóm tódô lembù dmelem kéng.

²⁰ Ne ke gungol yóm kdéen tau nim nmò ye ni, gotu le likò ne laen dù bud mò du ne yóm sidek yó.

²¹ Bè yóm ktafak ye du yóm tau tmifù kéng yó, bê ye abay knodu. Yó kmò ktafak ye du, ke klowil nwahen bud kun klowil bayaden ne ke mata hensideken bud kun mata se bayaden. Ke nihi se hensideken bud nihihen se bayaden. Ke sigel hensideken bud kun sigel se bayaden ne ke ti bud ti se bayaden.” Là gomongen bè nili yóm tsaptér 20 efet kól bè tsaptér 23. Bè tsaptér 20 hono hlau bè kesgida le. Bè tsaptér 21 yóm tulónen bè kmò kkukum le du ke wen tau sbonok ne yóm kun ólól yóm ngà logi twogu. Bè tsaptér 22 tulónen yóm hlau bè khólós le. Bè tsaptér 23 tulónen yó kem dumu hlau Dwata kul ne yóm hlau bè ksutóng le.