Dwata 18 - Udél Dwata: Gna Kesfasad ne Lomi Kesfasad

Yóm kul ólól yó kem sfu Libay

¹ Yó bud mon Musis, “Yó kem sfu Libay gel blóng tau ebè Dwata ne yó kem dumu sfu Libay, laen dù kul ólól bè yóm tonok bè benwu Israél. Okóm yó kul lowil duhen yóm gel dsù le ebè Dwata yó kem dumu le Israél.

² Yó kem sfu Libay laen dù tonok le kul, là lómón du yó kem dumu le Israél. Yó kul ólól yó kem sfu Libay, duhen yóm keseblóng le tau ebè Dwata lómón yóm deng fasad Dwata kul.

³ Ke wen safì duhen ke ubiha dsù le ebè Dwata yó kem tau Israél, lemwót yóm abalen ne kakimen ne blututen mò blay le ebè yó kem tau gel blóng ebè Dwata.

⁴ Bélê le snéen gónón e solu yóm hol tanay gel bad yó kem tau ebè Dwata, yóm tanay nuta le bè halay ne bè yóm tifas grép gel ninum ne bè hnolo ulib ne bè yóm bul nóngós le bè ubiha.

⁵ Bè kdê yó kem ból Israél, fen nélék Dwata yó kem kun sfu Libay mò blóng tau ebéléen bè yóm kun Gónô efet kól bè laen dù tul sónen.

⁶ Kihu sfu Libay, balù kihu benwu bè Israél gónón gu lemwót, ke móyô mógów ebè yóm sotu benwu gónó le gel tmaba ebè Dwata yó kem tau Israél

⁷ na a mò nmò bè yó bè Gónô Dwata, tey hyu se yó. Yóm kun nmò bè yó, skél bè yóm kul gel nmò yó kem dumu sfu Libay tendo gel mò nmò bè yó.

⁸ Yóm kun ólól bè ken yóm tau yó, tódô bud senged bè yóm kul ólól yó kem dumu sfu Libay tendo gel mò nmò bè yó snéen, baluen he ke wen dumu gónón ma lemwót bè yó kem fes lówóhen.

Eles ketgama bè yó kem tau hemtahu bè dwata kéng

⁹ Ke deng ye kól ta yóm tonok blayen kuy yóm sana kuy Dwata hol gónó mogot, hol bê ye abay lolò yóm kul hlolò yó kem dumu but tau nô bè yóm benwu yó. Tódô hono sidek yóm gel nmò le.

^10-11 Yó sotu sidek gel nmò le, kóem hkekeb le yó kem ngà mò dsù le ebè kul dwata. Hol bê ye abay nmò kuy yóm yó. Hol bê ye abay nmò kuy yóm hemgawang ne yóm mimò ne mton bù. Bê ye abay tmaba ebè mogol.

¹² Ke wen bélê ye mò du nim ni, tey sidek kekbê Dwata du. Yó se duón Dwata hdó kul ta yóm tonok le yó kem dumu but tau gna menwu bè yó lan le mò du yó kem tey sidek kenbéen yó.

¹³ Okóm bélê ye kuy, hol bê ye abay hili nawa ye ebè Dwata.”

Eles fasad Dwata yóm angat khógówen yóm tugoden

¹⁴ Omin Musis bud mon du, “Yó kem tau nô ta yóm tonok móyón nfun ye, gel lolò le udél yó kem tau gel mimò ne yó kem tau hulung hemgawang. Okóm bélê ye kuy, là kóen móyô yóm sana kuy Dwata hol gónó mogot ke nmò ye yóm yó.

¹⁵ Yó angat nmò Dwata bélê ye kuy, wen tugoden mò hógówen elem blóng ye lemwót bè kuy kwen ne hol skél yóm nmò me. Ke deng kól lem blóng ye yóm tugod Dwata yó, hol nimón ye.

¹⁶ Abay se ni yóm tehe hni ye bè yóm kdaw tehe gotu kesbung ye bè but Bulul Sinay. Tey kehkodu ye béléu anì là bud gungol ye du yóm udél Dwata ebélê ye ne anì là bud ton ye du yóm tey kdilófen abay se likò ye, déke matay ye.

¹⁷ Ne yó gónó Dwata mon du mò dou, ‘Tey hyu se yóm hni le yó.

¹⁸ Angat wen tau mò tugodu hwitu elem blóng le lemwót bè kul kwen ne yóm kun nmò hol skél bè yóm kóm nmò. Angat tulónu yóm tugodu yó yóm mò angat monen ne angat gotu tulónen yó kem tau Israél yó kem dou hlau kul.

¹⁹ Sal hlanen bè dou boluy yóm gel tulónen ne angat tnafaku yóm tau là mimón du.

²⁰ Okóm ke wen tau tódô lembù tmugod dou, tódô hnatay kmò du. Senged se ke wen tau tmugod yó kem dumu dwata, tódô hnatay kmò du.’

²¹ Déke hendem ye, ‘Kmò kdilô me du yóm tulón ke là lemwóten bè Dwata?’

²² Yó mò ilô ye du ke wen tulónen yóm tau tmugod yó hlanen bè boluy Dwata, ne ke là dohoen yóm tulónen yó, bè yó gónó ye temngón du là lemwóten bè Dwata yóm tulónen. Yóm tau yó tódô lembù, bê ye abay likò béléen.”