Dwata 17 - Udél Dwata: Gna Kesfasad ne Lomi Kesfasad

Yóm hlolò Musis kul bè yóm angat kélék le yóm tau hol geta mò mogot benwu le

¹⁴ Yó bud mon Musis, “Ke deng ye nô ta yóm tonok blay Dwata kuy yóm sana kuy Dwata hol gónó mogot, ne ke deng ye henek tahen, omin ye yó he semsatul du yóm kmò kélék ye yóm tau hol geta bélê ye mò mogot benwu ye, hol lómón yóm kul gel nmò yó kem dumu but tau hmilol kuy.

¹⁵ Yó kmò kélék ye du yóm tau yó, hyu ke hol du yóm tau deng kun nélék Dwata. Sotuhen, là hyuhen ke là lemwóten bè kuy kwen. Hol bê ye abay mélék bè yó kem tau milo menwu lem blóng ye ke mò mogot benwu ye.

¹⁶ Yóm tau nélék ye, hyu ke là hwenen du kem kudaen mò snakay yó kem sendaluen ne là se hyuhen ke wen tau hógówen mò na a bemli kudà bè Idyip, abay se deng tehe mon Dwata mò kuy hol bê ye abay bud mulék ebè Idyip.

¹⁷ Yóm tau nélék ye, là hyuhen ke dê yehenen déke mom dalil gónón glayuk bè Dwata. Là se hyuhen ke hdengen bè tahu blówón ne bè blówón bukay.

¹⁸ Ne ke deng baling tau hol geta mogot benwu, hyu ke hol hsulaten yó kem hlau Dwata ne yó kem dumu tolok Dwata anì wen nô béléen. Yóm hlau hsulaten yó, lemwót bè yóm Hlau Dwata henyu yó kem sfu Libay, yó kem tau gel blóng ebè Dwata.

¹⁹ Hyu ke hol tendo nô béléen nim snulat ni ne tendo senfalahen bè yóm klawihen mowil anì yó wen klikoen ke Dwata ne hotuhen nawahen mimón du yóm kdê hlolò Dwata nô lemen.

²⁰ Lemwót bè yóm gel kesfalahen du, là kô gbeken du ke hegetahen knóen senta yó kem dumuhen Israél ne là se gbeken mulé du yó kem hlolò Dwata kul balù yó kem olo leneken. Ke ni se nmoen yóm tau hol geta, angat tahà kogoten benwu efet kól bè yó kem angat sfuhen. Balù hilu bud lugod le, tódô seflós kogot le yóm benwu Israél.”