Dwata 13 - Udél Dwata: Gna Kesfasad ne Lomi Kesfasad

¹ Ke wen tau sut lem blóng ye mon du, du kun sotu tugod Dwata duhen ke wen tau sut hulung tmulón lan kna ne ke yó nmoen wen hentaw ton eles tulónen, hol bê ye abay kenmón

² anien he ke dohò yóm tulónen yó. Ngem kà angat monen du mò kuy, ‘Géhél ye ne, tmaba tekuy ebè yó kem tólóng dwata.’ Blaem yó kem dwata lennged monen yó, kem dwata là deng hnikót kuy tngón du.

³ Hol bê ye abay kenmón yóm udélen ebélê ye yó. Yóm nmoen yó mò gónó Dwata tmilów kuy, yóm sana kuy Dwata hol gónó mogot, mò gónón hménég du ke hol lemwót lem nawa ye yóm kbong nawa ye du.

⁴ Són Dwata hol lolò ye yóm sana Dwata hol kuy gónó mogot, mung du yóm klikò ye du. Hol nimón ye ne lolò ye yó kem deng hlauhen kuy. Tmaba ye ebéléen ne hol ye hteneb mimón du.

⁵ Okóm tódô hnatay ye yóm tau gel tmulón lan kna yó duhen ke yóm tugod Dwata tô mit kuy là mimón ke Dwata yóm Dwata tehe hewà kuy gu bè Idyip bè yóm benwu gónó ye tehe ghesek. Yóm tau lómón yó kmoen, tau Seitan, tô niten yu hlayuk bè yóm lan deng hlolò Dwata kuy. Tódô hnatay kmò du yóm tau lómón yó anì mkó lem blóng ye yóm sidek tô nmoen.

⁶ Baluen he ke tô lifut stulón kóm yóm hol dumuhem setwoli logi, duhen ke ngaem logi ne ke ngaem libun, duhen ke yóm yehenem alì kenbong nawahem, duhen ke yóm wè hol dumuhem ston nawa, ke tô niten uu tmaba bè yó kem dumu dwata, yó kem dwata kéng là deng hnikót tnabahem du dalang se yó kem tehe fuem, hol béem abay kenmón.

⁷ Déke tô nubugen uu tmaba bè yó kem kul dwata yó kem tau menwu moni bélê ye duhen ke bè yó kem kul Dwata yó kem tau menwu mayuk bélê ye.

⁸ Okóm hol béi abay gmung béléen ne béem abay hnungol ke wen monen. Béem abay knodu ne béem abay nofin.

⁹ Tódô hnatay kmoem du. Uu gna tmudà du botu, ominem bud htudà du yó kem dumuhem.

¹⁰ Tódô hnatay sentudà ye botu. Yóm nmoen yó, tô niten yu hlayuk bè Dwata yóm sana kuy Dwata hol gónó mogot, yóm deng hewà kuy gu bè Idyip bè yóm benwu gónó ye ghesek.

¹¹ Duhe kóm, ke gungol yóm kdê tau Israél nim nmò ye ni, gotu le likò se kul ne laen dù bud mò du bélê ye ne nim nmò sidek ni.” Là gomongen bè nili yóm bérs 12 efet kól bérs 18. Yó tulónen yóm kmò kegbà le du yóm sotu benwu ke gotu le tmaba ebè yó kem dwata kéng yó kem tau nô lemen. Là gomongen bè nili yóm tsaptér 14 efet kól bè tsaptér 17:13. Yó tulónen bè tsaptér 14 yóm kmò le du ke wen tau nodung le. Bud tulónen snéen ke ógóf du yóm hken Dwata kul ne yóm ógóf là hkenen du kul. Tulónen snéen yóm mò kmò le du yóm gesfoloen gel bad le ke Dwata bè yó kem hulu le. Yó tulónen bè tsaptér 15, ke sok kól bè yóm ghituhen halay tódô hnifót le ke wen tau mutóng bélê le. Ne ke wen hesek deng benli le, tódô hefewà le ke deng deng yóm gnemen halay mò nmò. Bè yó kem ógóf le, sal htólóng le ebè Dwata yóm tanay sut bè yó kem ubiha le ne safì le. Yó tulónen bè tsaptér 16, yóm gel nmò le bè yóm Kdaw Khius ne bè yóm kehligal le bè kuta ne bè yóm kehligal le bè yóm bud gel kehtulón nawa le du yóm tehe knô le bè slung.