Dwata 12 - Udél Dwata: Gna Kesfasad ne Lomi Kesfasad

Tulón Musis yóm angat kwen sotu benwu htólóng Dwata mò gónó le tmaba ebéléen

¹ Yó bud mon Musis bè yó kem tau Israél, “Ni se yó kem hlau Dwata mò angat nimón ye bè yóm klawi ye mowil ta yóm tonok deng blay Dwata kuy, kun hlau yóm sana kul Dwata hol gónó mogot yó kem tehe fù ye.

² Bè yóm tonok nwa ye, gotu genbà ye lu yó kem gónó le gel tmaba ebè yóm kul dwata kéng yó kem tau bè yó, yóm deng hdà le ta tfusù yó kem bulul geta ne ta yó kem bulul lemnek ne laan yóm kdê koyu lembang.

³ Genbà ye yó kem gónó le gel demsù ne gotu lenusok ye yó kem hehek botu deng hetfing le ebè yóm kul dwata. Nlób ye yó kem hehek nmò le ilô yóm dwata libun le boluyen Asira ne gotu nofok ye yó kem dwata lennged le anì laen dù bud gónó le e tmaba.

⁴ Bè yóm gel ktaba ye ebè yóm sana kuy Dwata hol gónó mogot, hol bê ye abay dnalang yóm kul kmò ktaba ebè yóm kul dwata kéng yó kem tau bè yó.

⁵ Bè klamang yóm benwu gónó ye angat nô kem tau Israél, wen sotu benwu angat nélék Dwata mò gónó ye hloni ebéléen ne mò gónó ye tmaba ebéléen.

⁶ Bè yó gónó ye gel demsù yó kem dsù gel hkekeb ye ebéléen ne yó kem dumu gel dsù ye. Bud bè yó snéen gónó ye mit du yóm gesfoloen gel bad ye du ne yó kem dumu tódô gel basa ye du ne yó kem basa deng fasad ye du ne yó kem basa tódô kuy nawa du. Kkólen bè yóm tanay ngà yó kem safì ye ne tanay ngà yó kem ubiha ye, bud bè yó gónó ye e mit du.

⁷ Bè yó snéen bè solu yóm sana kuy Dwata hol gónó mogot, yóm Dwata tendo gel tmóbóng kuy, gónó ye hligal mken du yó kem hyu deng leniteg ye, mung kuy yó kem fes lówó ye.

⁸ Bè yóm gel ktaba ye ebè Dwata ni kmoen ni, ket tau mò du yóm kun kóyô. Okóm ke deng ye kól ta yóm tonok blay Dwata kuy, bê ye abay bud nmò yóm kuy kóyô yó. Ni kmoen ni sana tolo kmò ye du yóm kuy kóyô

⁹ abay se monem là deng ye kól tahen he yóm tonok blay Dwata kuy, yóm tonok mò gónó ye henek nô.

¹⁰ Ke deng nifal ye yóm Él Jurdan, angat tódô blay Dwata kuy yóm tonok yó mò hlós gónó ye henek nô. Du he tendo kemlung kuy bè kdê yó kem hohon ye anì menek kbenwu ye.

¹¹ Ne bè yóm tonok yó, wen sotu benwu angat nélék Dwata mò gónó ye gel tmaba ebéléen. Ne bè yó gónó ye mit du ebéléen yóm kdê deng hlauhu kuy, duhen yó kem dsù gel hkekeb ye ne yó kem dumu dsù ye ne yóm gesfoloen gel bad ye du ne yó kem tódô gel blay ye du ne dalang se yóm dumu basa deng hol fasad ye du.

¹² Ne bè yó bè solu Dwata hol ye hligal, mung kuy kem ngà ye ne yó kem tóbóng lówó ye ne yó kem sfu Libay menwu lem blóng ye. Hol bê ye abay hnuda lu yó kem sfu Libay, laen dù tonok le se kul.

¹³ Bè yóm angat kkól ye ta yóm tonok blay Dwata kuy, là gbek ye du tódô demsù yóm dsù gel hkekeb ye ebè Dwata bè yóm kuy kóyô gónó demsù.

¹⁴ Tek són yó gónó ye demsù són bè yóm benwu angat kun nélék Dwata bè tonok yóm sotu kuy dumu ból Israél. Sónen bè yó gónó ye demsù du yóm dsù gel hkekeb ye ne yó kem dumu dsù deng hlauhu kuy.

¹⁵ Okóm bè yó kem dumu ógóf ye, balù kihu gónó ye nô hyu kétê ye kul mò utón ye. Ne balù nô kbongen kóyô utón ye bè yó kem ógóf deng blay Dwata kuy, hyu kken ye kul lómón yóm gel kutón ye uhu ne yóm sotu uhu boluyen antilop. Kdê ye se hyu kken ye du, tau deng hólós bè solu Dwata duhen ke tau là dengen hólós.

¹⁶ Són yóm litô le, hol bê ye abay ken. Tódô kok ye ete tonok lómón kkok ye él.

¹⁷ Okóm yó kem ógóf gel dsù ye ebè Dwata, hol bê ye abay ken bè yó kem benwu gónó ye nô. Balù yóm bad ye ke Dwata bè yó kem halay ye ne bè yóm tifas grép gel ninum ye kkólen bè hnolo ulib ye, hol bê ye abay ken bè yó kem benwu gónó ye nô. Ne balù yóm tanay ngà yó kem safì ye ne tanay ngà yó kem ubiha ye, hol bê ye abay ken bè yó. Ne yó kem dumu basa deng fasad ye ke Dwata ne yó kem basa tódô kuy nawa du ne kihu yó kem dumu gel basa ye du, hol bê ye abay ken bè yóm kuy benwu.

¹⁸ Ken ye ni kem monu ni koni bè yó bè solu Dwata bè yóm sotu benwu angat néléken mò gónó ye tmaba ebéléen, mung kuy kem ngà ye ne kem tóbóng lówó ye ne yó kem sfu Libay menwu lem blóng ye. Gotu ye hligal bè yó, hnigal ye yóm kdê deng gendeng ye.

¹⁹ Bè yóm klawi ye mowil ta yóm tonok ye, hol bê ye hnuda lu yó kem sfu Libay menwu lem blóng ye.

²⁰ Ke deng bang Dwata hlamang du yóm tonok ye lómón yóm deng fasaden kuy ne ke móyô ye mutón, gbek ye tmétê balù kihu nóyô utón ye.

²¹ Ke alì mayuk bélê ye yóm benwu gónó ye tmaba ebè Dwata na a demsù ebéléen, là sideken ke tódô tnétê ye bè gónó ye yóm safì duhen ke ubiha deng blay Dwata kuy, syan ke ógóf là dsù du yóm tnétê ye lómón yóm deng hlauhu kuy.

²² Kihu tau mken du yóm deng tnétê ye yó, tau deng hólós bè solu Dwata duhen ke tau là dengen hólós, lómón kutón ye du uhu ne yóm sotu kay uhu boluyen antilop nim kmoen ni.

²³ Són là ken ye du són yóm litóen, abay se bè litóen gónóhen nô klowilen ne hol bê ye abay ken yóm utón ke tolo nô du klowilen.

²⁴ Hol bê ye abay ken yóm litô. Yó kmò ye du, tódô kok ye ete tonok lómón kkok ye du él.

²⁵ Bê ye abay ken, anì hyu kógów klowil ye dalang se yó kem ngà ye, abay se nmò ye yóm hyu bè kton Dwata du.

²⁶ Okóm yó kem ógóf gel dsù ye ebè Dwata dalang se yó kem basa deng fasad ye du, hol nwit ye ebè yóm sotu benwu angat nélék Dwata mò gónó ye gel tmaba ebéléen.

²⁷ Dsù ye ebéléen bè yó bè yóm kun gónó demsù yóm dsù gel hkekeb ye. Bud dsù ye ebéléen bè yó snéen yóm dsù gel ken ye ungeden, bede fen kok ye bè tonok klohok yóm gónó gel demsù yóm litóen.

²⁸ Hol ye hteneb mimón du yóm kdê deng hlauhu kuy anì laen dù sónen yóm kehyu kógów klowil ye dalang se yó kem ngà ye. Yó gónón laen dù sónen abay se nmò ye yóm tedeng ne yóm gónón hyu nawa Dwata bélê ye, yóm sana kuy Dwata hol gónó mogot.

Eles hetgama Musis kul yóm là ktaba le ebè yó kem dwata lenbù nmò

²⁹ Yó angat nmò yóm sana kuy Dwata hol gónó mogot, angat gotu genlaen yó kem hohon ye bè yóm igò ye mled yóm tonok le ne angat tles gfun ye yóm tonok yó ne angat ye henek menwu tahen.

³⁰ Kogol yóm keglà Dwata kul yó kem dumu but tau yó, hol bê ye abay lolò yóm kul kmò ktaba ebè yó kem kul dwata abay se bè yó gónó ye gholot. Hol bê ye abay hménég bè yóm kul kmò ktaba ebè yó kem kul dwata kéng ke tô dnalang ye.

³¹ Hol bê ye abay heskél bè yóm kul kmò gel ktaba ebè yó kem kul dwata yóm kuy kmò ktaba ebè yóm sana kuy Dwata hol gónó mogot. Yakà yóm kul ktaba ebè yó kem kul dwata, gotu nmò le yó kem sidek alì kenbê Dwata. Balù ngà le, gbek le demsù du ta yóm ofi nô bè yó kem gónó le gel demsù.

³² Hol gotu nmò ye yóm kdê deng hlauhu kuy ne béen abay wen tnù ye du ne béen abay wen se kó ye du.