Dwata 10 - Udél Dwata: Gna Kesfasad ne Lomi Kesfasad

Ketles ksulat Dwata du yó kem hlauhen yó kem tau Israél

¹ Yó bud mon Musis bè yó kem tau Israél, “Bè yóm tehe kdaw yó, yó bud mon Dwata mò dou, ‘Budi mò lewu botu kufil lómón yóm gnan ne moi slungan koyu mò gónóm hemsù du. Ne budi mneged edini béléu ta bulul

² anì bud snulatu ta yó kem botu kufil nwitem yó kem tehe snulatu bè yóm gnan, yóm deng btuem. Ke deng deng ksulatu du, ominem hemyu du lem yóm slungan nmoem, duhen yóm Slungan Fasad.’

³ Tahu se, wen slungan nmou lemwót bè koyu akasya ne wen lewu botu kufil nmou lómón yóm gnan ne nwitu eta bulul bè Dwata.

⁴ Omin Dwata bud smulat du tahen yó kem udél tehe snulaten bè yóm gnan, duhen yóm sfolò kem hlauhen kuy bè tum tehe kudélen gu lem dilóf ofi bè yóm kdaw tehe gotu kesbung ye bè but Bulul Sinay. Deng ksulat Dwata du, bud blayen dou yóm lewu kem botu kufil yó

⁵ ne ominu bud mosol. Bè yóm deng kkólu bè kamfù, lemwót yóm lewu botu kufil yó suu lem yóm Slungan Fasad deng nmou lómón yóm deng mon Dwata mò do. Ne tódô hlós nô lemen efet nim kmoen ni.”

⁶ Bè tum kdaw tu, bud le lemwót yó kem tau Israél bè yó bè yóm kokol nfun yó kem tau Jakan, hlós le etu bè yóm benwu boluyen Musira. Bè yóm benwu yó gónó Aron matay ne bè yó gónó le lembeng du. Bè yóm katay Aron, yóm ngaen logi boluyen Ilisar bud tlesen bè yóm keseblóngen tau ebè Dwata.

⁷ Bud kewót le bè yóm benwu yó, mógów le etu bè yóm benwu boluyen Gudguda, bud le hlós etu bè Jubata, yóm benwu alì wen él mlelen.

⁸ Bè yóm kdaw yó kélék Dwata yó kem sfu Libay mò fen mit yóm Slungan Fasad ne mò fen gel blóng tau ebéléen ne mò fen gel muyag yó kem tau hlan le bè kun boluy. Ne yó se yóm hlós kul nmò efet nim kmoen ni.

⁹ Yó gónóm mon, laen dù kul ólól yó kem sfu Libay bè yóm tonok blay Dwata yó kem tau Israél, là lómón du yó kem dumu le. Yó kul ólól duhen yóm keseblóng le tau ebè Dwata lómón yóm deng fasad Dwata kul, yóm sana kuy Dwata hol gónó mogot.

¹⁰ “Botong fat folò butengu nô lem bulul lómón yóm deng gna nmou. Nahen na bud hnungol o Dwata bè yóm hnihu béléen ne là genlaen kuy.

¹¹ Ominen hewót do anì nalaku yu anì gnô ye tahen yóm tonok tehe fasaden mò blayen yó kem tehe fù ye.

Yóm kóyô Dwata bè yó kem tau Israél

¹² Duhen ni kem tau Israél, tedu se yóm hol nóyô Dwata bélê ye, yóm sana kuy Dwata hol gónó mogot? Yó nóyóen ke hol wen klikò ye du ne ke tendo nmò ye yó kem kun hlau kuy. Kóyóen ke kenbong nawa ye ne hewót ye bè nawa ye yóm klolò ye du

¹³ ne hol nimón ye yóm kdê kun hlau kuy, yóm tulónu kuy kemdaw ni. Yó se yóm mò kuy kehyu.

¹⁴ Ngem yóm longit hol geta ke Dwata funen. Ne bud kun snéen yóm tonok ne yóm kentihen nô tahen.

¹⁵ Balù yóm tey kegeta Dwata ewenem yó, kem kuy fù he yóm kenbong nawahen. Ne yu se yó kem tau semfu gu bélê le deng néléken yu senta yóm kdéen tau nô talak tonok. Yu se yó kem tau deng néléken efet ni.

¹⁶ Yó gónóm mon, hol hfun ye ke Dwata klowil ye, bê ye abay bud hgel kulu ye.

¹⁷ Abay se yóm sana kuy Dwata hol gónó mogot, du se hol Dwata dandónen geta bè kdéen dwata ne hol dandónen mfasang bè kdéen mfasang. Laen kô dù là gbeken du, du se hol knóón bang nimón. Laen dù mtukul nfihen ne là kóen ma mò wa nawahen.

¹⁸ Sal gel nfihen yó kem ngà hikit ne yó kem libun bolu. Kenbong nawahen se yó kem tólóng tau menwu lem blóng tekuy, benlayen lu ken ne nes.

¹⁹ Duhen yó bélê ye se kuy, hol kenbong nawa ye yó kem tólóng tau menwu lem blóng ye, yakà tehe ye tólóng tau menwu bè Idyip se kuy.

²⁰ Hol knikò ye yóm sana kuy Dwata hol gónó mogot ne olon du gónó ye e tmaba. Hol ye hteneb mimón du ne olon bè boluyen gónó ye gel hlan du ke wen fasad ye.

²¹ Hol gel dóyón ye yakà du se yóm kuy Dwata ne deng tódô kuy mata se mton du yó kem tey hentaw ton tehe nmoen mò gónón tmóbóng kuy.

²² Bè yóm tehe kógów le ebè Idyip yó kem tehe fù ye ekni, tek le hitu folò kwen le. Okóm ni tey kehból Dwata kuy, lómó kwen ye lómón yó kem tey blotik bè longit.” Là gomongen bè nili yóm tsaptér 11. Yó tulónen bè nim tsaptér ni yóm tey kubug Musis yó kem tau Israél anì hol nimón le Dwata. Tulón Musis kul yóm tey któbóng Dwata kul ke mimón le, okóm tey ktafaken kul yó kem tau là mimón du. Bud tulón Musis kul snéen yóm tey kehyuhen yóm tonok deng blay Dwata kul.