Dwata 1 - Udél Dwata: Gna Kesfasad ne Lomi Kesfasad

Yóm gna tulónen

¹ Nim bok ni gónóhen nô yó kem tehe udél Musis ebè yó kem tau Israél bè yóm tehe knô le bè yóm benwu laen hol wen tauhen fi dmata kdaw Él Jurdan. Tolo le kmamfù bè Datal Jurdan moni bè yóm benwu boluyen Suf. Yóm gónó le kmamfù yó, nô bè gónón sóól yóm benwu boluyen Paran ne yó kem benwu boluy le Tufél ne Laban ne Hasirut ne Disahab.

² Ke tnonokem lemwót bè Bulul Sinay kól bè yóm benwu boluyen Kadis Barniya lanem bè yó kem bulul lemnek bè Idom, olon sfolò sotu kdaw kegenem tmonok du.

³ Okóm botong fat folò halay le ne deng kegen le tmagak yóm benwu Idyip yó kem tau Israél. Ne bè yóm tanay kdaw bè yóm gesfoloen sotu bulón bè yóm gfaten folò halay yó, gotu tulón Musis yó kem tau Israél yó kem htulón Dwata du bélê le.

⁴ Yóm ktulónen du kul yó, kogol yóm kegmò Musis bè le Sihun yóm tau hol geta bè yó kem tau Amurayt mogot yóm benwu Hisbun ne Ug bè Basan yóm tau hol geta mogot bè yó kem benwu boluy le Astarut ne Idri.

⁵ Yóm kbut Musis tmulón du yó kem tau Israél yóm hlau Dwata kul ne yó kem toloken kul, tolo le nô fi dmata kdaw Él Jurdan he bè benwu Muab. Yó mon Musis mò kul,

Bud heftulón nawa Musis bè yó kem tau Israél yóm tehe kalak Dwata kul lem yóm benwu laen hol wen tauhen

⁶ “Bè yóm tehe knô tekuy bè Bulul Sinay, yó udél Dwata ebélê tekuy yóm sana Dwata hol gónó mogot, monen, ‘Geblaen ni ne knô ye bè nim bulul ni.

⁷ Lenkas ye kamfù ye ne bud ye lemwót. Mógów ye etu bè tu kem bulul lemnek bè benwu yó kem tau Amurayt ne etu bè tu kem benwu hmilol kul, bè Datal Jurdan ne bè yó kem bulul lemnek bè yóm benwu yó ne bè yó kem datalen. Mógów ye etu fi legeden ne etu bè kilil Mohin Miditiranyan. Mógów ye etu bè klamang benwu Kanan efet kól ditu sentu yó kem bulul bè Libanun, efet ye kól ditu bè yóm él bong boluyen Yufratis.

⁸ Yóm kdê benwu monu ni, ni se yóm tonok deng tehe fasadu yó kem tehe fù ye le Abraham ne Isak ne Jakub ne bè kdê yó kem semfu gu bélê le. Mógów ye etu ne henek ye tahen.’ ” Là gomongen bè nili yóm tsaptér 1:9 efet kól bè tsaptér 3:29. Yó tulónen bè ni kem tsaptér ni yóm ktutul Musis du bè yó kem tau Israél yóm tehe kewót le gu bè Idyip. Ke móyô ye semfala du bè Tboli yóm tulónen, gbek ye semfala du bè ni kem bok nii abay se senged yóm tulón le. Kehewà 18 Kélék le yó kem tau kmukum bélê le Lista Israél 11 Knô le lem yóm benwu laen hol wen tauhen Lista Israél 13 Yó kem tau na a hemkana bè Kanan Lista Israél 14 Ksonol le ke Dwata yó kem tau Israél Lista Israél 20 Là kehlus Dwata ke Musis hlós ebè Kanan Lista Israél 21 Kegmò le bè le Sihun ne Ug Lista Israél 32 Yó kem tau Israél fen menwu fi dmata kdaw Él Jurdan