Danyél 8 - Udél Dwata: Gna Kesfasad ne Lomi Kesfasad

Yóm ubiha ne kambing hton Dwata bè Danyél

¹ Bè yóm deng getluhen halay myón Bélsasar, bud wen hton Dwata do, ou se Danyél hol mton du. Ni se deng gewuhen dulék kwen htonen do.

² Bè yóm ktonu du, ditu kun gónóhu nô bè Susa yóm hol yéen syudad bong bè prubinsya Ilam, bede mdae bè tubé Él Ulay.

³ Yóm igou mdà bè yó, tódô tonu yóm tey ubiha logi bong mdà bè tubé yóm él, wen lewu hangahen bede tahà. Yóm sotu hangahen malù tahà senta yóm sotuhen, bede huli sut se kun yóm hanga tahà yó.

⁴ Yóm ubiha tonu yó, kihu glebeten gotu snukóten. Tódô lemwót mlóy smoduk nan e mundug etu fi desdef, ominen bud smoduk nan e mundug etu mool, ominen bud smoduk nan e mundug e subô. Yó kem nundugen yó, là kô le gemmò béléen ne là kô wen tô mlos tmóbóng kul yó kem hensideken. Tódô beyen mò du yóm kun knóyô, mom temnù kfasangen.

⁵ Yóm igou temngel, tódô tonu yóm sotu kambing logi tódô temfasù hesut fi gu desdef, là kóen gemdà bè tonok botong ketlasiken. Nim kambing ni, wen sotu hangahen bede bong, tódô mteg lem blóng uyóhen.

⁶ Yó nmoen, tódô dluhen yóm ubiha logi lewu hangahen mdà bè tubé yóm él yó koni.

⁷ Nan e tódô dlu snukót bnunù yóm ubiha, botong gotu tfok yóm lewu hangahen. Là kóen dog gemmò yóm ubiha yó, tódô lugod yóm kambing, ominen smóyów mdà du elem tonok. Là kô wen gembek tmóbóng du yóm ubiha, bà mon yóm tey klóbô yóm kambing.

⁸ Mom temnù kegbeken yóm kambing yó. Okóm bè yóm tey kegbeken yó, tódô tfok yóm tey hanga bongen. Bè yóm gónón mteg yóm hangahen tfok yó, tódô bud wen hesut du fat hanga bede tey móntóng. Ket hanga sal stólóng gónóhen e temdok, sotu temdok e mool, sotu temdok e subô, sotu temdok e dmata kdaw ne sotu e desdef.

⁹ Lemwót bè yóm sotu bè nim fat kem hanga ni, wen sotu ngà hanga udì sut du ne tey kegbeken, tenfengen e subô ne fi dmata kdaw, lenngeben etu bè benwu Israél yóm benwu alì knóón.

¹⁰ Ngangen temnù yóm kegbeken efet gefet bè yó kem blotik, yó kem kun sendalù Dwata. Wen se bè yó kem blotik yó tudaen ete tonok, gotu snóyów ndaen lu.

¹¹ Balù Dwata, yóm gel malak yó kem sendaluen bè longit, sana katuen du. Yó nmoen, hetefloken yóm gel kedsù le ebè Dwata ket kdaw ne kóhen yóm gel ktaba le du bè yó bè Gónóen.

¹² Lemwót bè yóm sidek alì nmò yóm hanga yó, wen se bè yó kem dumu tau Dwata hnatayen. Kkólen bè yóm gel kedsù le ebè Dwata ket kdaw, gotu kóhen. Tódô gotu nmò yóm hanga yó yóm kun knóyô. Ndaen elaan yóm ktahuhen.

¹³ Ominu mungol yóm lewu hógów Dwata stulón. Snólók yóm sotu, “Ke deng dohò yóm hnigad ni kem deng hton Dwata ni, mò kegenen yóm ketefloken du yóm gel kedsù le ket kdaw? Kegenen se yóm kehegnok le du yóm Gónô Dwata lan le gel hemsù bè yó yóm alì sidek? Kmò kegenen yóm kdaen du e laan yóm Gónô Dwata ne yó kem tau Dwata?”

¹⁴ Bnalà yóm sotu, monen, “Yó kegenen, ke deng lewu libu tlu latu dulék le angat msó du yóm udas tehe gel kedsù le, sotu hlafus, sotu kimel. Ominen yó he mulék bè sana kehyuhen yóm Gónô Dwata.”

Ktulón Gabrél hnigad yóm hton Dwata ke Danyél

¹⁵ Duhen yó, ou se Danyél. Bè yóm hanà tolo lelu hemdem du lanen yóm hton béléu yó, tódô tonu yóm lómón tô tau kmoen mdà bè soluhu.

¹⁶ Ne tódô gungolu se yóm taba tau gu bè yóm Él Ulay, monen, “Ó Gabrél, géhél tulónem du hnigaden yóm tonen.”

¹⁷ Yóm igò Gabrél hloni ebè yóm gónóhu mdà, ya tey sidek klikou, botonge gefen bè tonok. Ominen mudél ebéléu, monen, “Ó Ngà Tau, ni hol tennefem. Yó kem deng tonem yó, hnigaden yóm angat kmoen bè hol són kdaw.”

¹⁸ Yóm igoen mudél, botong là bude temngón sana kefenu bè tonok. Okóm leninggil Gabrél ou ne tnóbóngen ou, ominu yó bude mdà.

¹⁹ Ominen mon du, “Ni nógówu naw e tulón kóm yóm angat kmoen yóm kdaw angat ksut yóm lebut Dwata. Yó kem deng tonem, hnigaden yóm angat kmoen yó kem hol són kdaw.

²⁰ Yóm ubiha logi lewu hangahen, duhen yóm lewu kem tau hol geta mogot yó kem kul benwu nogot yó kem tau Mid ne yó kem tau Pérsya.

²¹ Yóm kambing logi, duhen yóm benwu kul nogot yó kem tau Grik. Yóm hanga bong mteg lem blóng matahen, duhen yóm hol tanay tau hol geta kmamal yóm klamang benwu nogot yó kem tau Grik.

²² Yóm fat kem hangahen alì móntóng ktegen, yó kem tles mteg bè gónón tehe mteg yóm hanga bong deng tfok, hnigaden yóm kólólen bè fat yóm klamang benwu nogot yó kem tau Grik ne fat se tau hol geta mogot kul, okóm laen dù bélê le ke tô gemsenged yóm kun kfasang yóm hol gna tau hol geta mogot kul.

²³ Ke deng moni yóm hol són yóm kul kyón yó kem tau hol geta yó ne ke deng gulé yó kem salà gel nmò le, wen sotu tau hol geta alì lóbô bud sut, yóm tau hol geta alì hulung smukat, du bud tles myón.

²⁴ Tey kemgis, okóm sundu hol kun tahu kegbek du. Angat tey wen genbaen ne kihu nóyô nmoen gbeken. Angat gotu genlaen yó kem wen kegbek le malak dalang se yó kem kun tau Dwata.

²⁵ Tey hulung smukat, yó se gónón gel gemmò bè dumu tau. Tey kehegetahen knóen. Ofo kul mon du yó kem tau ke deng menek kbenwu le, anì monem yó se kdawen alì gemlà kul. Angat nwiten sgida yóm Geta bè yóm kdéen tau hol geta, okóm bè yó hol gónón meglà. Ne yóm keglaen, là lemwóten bè kul kgis yó kem tau.

²⁶ Tey tahu se yóm kdê hton Dwata kóm yó bè yóm kkó le yóm udas gel kedsù le hlafus ne kimel. Okóm béem tagad tulón he ni kem ni, abay se tolo mima he ksuten elem hulin kdaw.

²⁷ Duhen yó, ou se Danyél hol mton du nim ni ne tey sidek kegbeng lemu, botong hilu kdawu tódô htedek, wen desu. Timbow deng hyu kegnómu du, bud henlelu mò du yóm nmou bè yóm tau hol geta. Okóm là kóen mkó bè nawahu yóm deng tonu ne tey sidek kegbeng lemu, tolo là kô hol tngónu du he ke tedu tennefen tu kem tonu tu.”