Danyél 7 - Udél Dwata: Gna Kesfasad ne Lomi Kesfasad

Ktulón Danyél yóm fat ógóf lóbô hton Dwata béléen

¹ Bè yóm tanay halay kogot Bélsasar yóm benwu Babilun, wen kna Danyél ne wen hton béléen bè yóm igoen hlilil bè gónón tungô. Gotu snulaten yóm knahen yó ne ni se yóm tonen.

² Bè yóm kifu yó wen hton Dwata béléu, ou se Danyél hol mton du yóm tey mohin bong ne yóm hol yéen lenos bong mbel gu bè yóm fat gónón gu mbel nan e sentbulù yóm tey mohin bong yó.

³ Ominu mton fat yóm tey klambaden ógóf lóbô hesut gu lem yóm mohin yó, bede stólóng kmò le.

⁴ Yóm tanay ógóf lóbô tonu hol lómón ke liyun, bede wen hafaken lómón tô hafak banug. Yóm igou temngel, tódô wen kemtos kemdut du yóm hafaken ne tódô hdà le eta bè tonok yóm lewu tihen lómón kdà tau ne wen nawa tau blay le du.

⁵ Ominu bud mton yóm gewu ógóf lóbô mkél bè bér. Bè ktonu du hlilil, bede deng eles daen bè tonok yóm lewu tihen ne wen tlu tiol lohok nangaen. Ne wen mudél ebéléen, monen, “Yó ne, hol hwenem unged tau nsékem.”

⁶ Ominu bud mton kehesut yóm getlu ógóf lóbô mkél bè lipard. Fat hafaken lómón hafak onuk koyu. Yóm ógóf lóbô ni, botong fat kuluhen ne tey wen kwalis kmamal benwu blay le du.

⁷ Kogolen bè yó, ominu bud mton yóm hton Dwata béléu, bud hesut yóm gfat ógóf lóbô hol ógóf gónó likò, botonge kenkel mton du ne tey sidek kekgisen. Yóm nihihen hono bala tók lembang. Ya tey sidek kséken du yóm kenfóen ne yóm dù tebel gotu ndaen elem tonok. Tey stólóng bè yó kem dumu gna ógóf lóbô ne botong sfolò hangahen.

⁸ Yóm igou temngel yó kem hangahen, tódô tonu yóm sotu ngà hanga udì hesut gu lem blóng yó kem hanga yó. Gotu hekduten yóm tlu kem gna hanga mung du but le anì wen gónón mteg se kun. Yóm ngà hanga udì ni, wen matahen lómón mata tau ne wen sumóngen alì mudél heklabak.

Kehegfanen bè Danyél yóm Tuha Laen Dù Buten lewu le yóm Ngà Tau

⁹ Yóm igou temngel, wen kem bangkù gónó myón kmamal sù le bè yó ne myón tahen yóm Tuha Laen Dù Buten nan e kmukum. Yóm nesen ne yóm weken hol lómón kbukayen snu, hol bukay bè kdéen. Yóm bangkù gónón myón kmamal hono dilóf ofi, là skasen tendo dmilóf yó kem klilingen.

¹⁰ Wen ofi tendo mlel bè soluhen lómón klel él. Botong hilu katihen yó kem gel hógówen nô bè yó ne là gsóhem du katihen yó kem tau mdà bè soluhen. Nbuten bè yó kmukum ne lennal le bè yó se yó kem bok.

¹¹ Tódô henlelu temngel abay se gungolu yóm ngà hanga udì tendo mudél heklabak. Ngangu temngel efet tonu hnatay le yóm gfat ógóf lóbô yó koni ne bot le elem ofi yóm lówóhen, tódô gotu mkekeb.

¹² Ne yó nmò le bè yóm tlu kem dù ógóf, nwa le bélê le yóm kwalis le, okóm na le bud hlowil lu likót.

¹³ Bè yóm kifu yó, bud wen tonu lómón ke ngà tau kmoen mung bè lobun gu bè longit. Mógów ebè yóm Tuha Laen Dù Buten, bede wen mit du ebè soluhen.

¹⁴ Yó nmò yóm Tuha yó, benlayen kwalis ne tey kehegetahen du, mung du yóm kfasang mogot klamangen benwu anì tódô kdéen tau, balù kihu but ktau le, balù kihu benwu le, balù kihu udél le, gotu mimón du. Yóm kkamalen benwu, laen kô dù nan e són ne là kóen gbà yóm kogoten tau.

Hnigad yóm hton Dwata ke Danyél

¹⁵ Ou se Danyél yóm mudél ni. Tey sbeweg kegnómu du bè yó kem deng tonu, botonge likò bè yóm deng hton Dwata do.

¹⁶ Yó nmou, hlonihe ebè yóm sotu mdà klohok yóm bangkù gónón myón kmamal, snólóku béléen lanen yóm kdê tonu yó. Tahu se, gotu tulónen do yóm hnigaden, monen,

¹⁷ “Yóm fat klambaden ógóf lóbô yó, hnigaden angat wen fat sut mogot benwu te tonok.

¹⁸ Okóm bè hol sónen, yó nmò yóm Hol Geta, gotu blayen ebè yó kem kun tau yóm klamangen yóm nogot le ne laen kô dù sónen yóm kogot le du.”

¹⁹ Ominen yó snólóku anì hol tngónu ktahuhen yóm hnigad yóm gfat ógóf lóbô hesut, yóm tey stólóng bè yó kem dumuhen, ógóf hol gónó likò, yóm nihihen hono bala tók ne yóm knuguhen kgelen tembaga. Gotu nséken ke wen kenfóen ne yóm dù tebel gotu ndaen lem tonok.

²⁰ Bud snólóku hnigad yóm sfolò kem hanga yóm gfat ógóf lóbô yó ne yóm sotu ngà hanga udì hesut huli, yóm hekdut yóm tlu gna hanga, yóm hanga wen matahen ne wen sumóngen alì mudél heklabak. Bè ktonu du yóm ngà hanga hesut huli yó, alì hegetahen knóen bè yó kem dumuhen.

²¹ Yóm igou temngel, lemwót yóm ngà hanga udì yó mit sgida bè yó kem kun tau Dwata ne gemmò bélê le

²² efet kkólen bè yó yóm Tuha Laen Dù Buten nan e kmukum lem blóng le. Bè yóm kkukumen kul, nfihen yó kem kun tau yóm Dwata hol dandónen geta. Ominen yó he sut yóm kdaw khogoten du kul yóm klamangen benwu.

²³ Yó bud monen mò dou yóm hógów Dwata yó, “Yóm gfat ógóf lóbô yó, hnigaden yóm gfat angat sut mò mogot yóm klamangen benwu ne tey stólóng bè yó kem dumu mogot benwu. Gotu somoken yóm klamang benwu, gotu ndaen ne gotu lenunahen ke wen dù tebel.

²⁴ Yóm sfolò hangahen, hnigaden yóm sfolò kem tau hol geta fen mogot yóm benwu yó. Ominen hesut yóm sotu tau hol geta ne tey stólóng bè yó kem dumuhen gna sut. Ne tlu bè yó kem tau hol geta gna sut, gotu ndaen lu e laan.

²⁵ Tey sidek udélen eta yóm Hol Geta ne ket kdawen tendo hmayam kul yó kem kun tau. Tô tenlesen yóm kul kdaw gel kehligal tmaba ebè Dwata dalang se yó kem hlau Dwata gel lolò le. Tódô na bayà Dwata lu béléen lem yóm tlu halay sóól.

²⁶ Okóm sut se yóm fen kmukum ne gotu kóhen bè yóm tau hol geta yó yóm kun kegbek mogot benwu ne sulék genlaen efet kól bè sónen.

²⁷ Ominen yó lemwót yóm Dwata Hol Geta, gotu hogoten yó kem kun tau yóm kdéen benwu talak tonok, benlayen lu kegbek mung du yóm tey kegeta le. Laen kô dù sónen yóm kogot le benwu ne tey kimón le kul yó kem genlal mogot benwu dini talak tonok.”

²⁸ Yó se sónen yóm hegfan Dwata béléu, ou se Danyél hol mton du. Tey sidek klikou du botonge bukós, okóm tódô suu lem hendemu yóm deng tonu ni.