Danyél 6 - Udél Dwata: Gna Kesfasad ne Lomi Kesfasad

Kbot le ke Danyél lem yóm sol gónó le kmukub yó kem liyun

¹ Bè yóm deng kogot Daryus bè Babilun, yó nmoen, nólólen bè lematu lewu folò prubinsya yóm benwu nogoten, ominen mélék kem gubérnor mò mogot bè ket prubinsya snakufen, ket sotu bè ket prubinsya.

² Ominen bud mélék tlu tau mò hmalak yó kem gubérnor yó ne mò fen temngel yóm bad gel blay le du bè klamang yóm benwu nogoten. Yóm sotu bè yóm tlu kem tau néléken, duhen Danyél.

³ Bè kdê yó kem tau deng nélék yóm tau hol geta, són Danyél yóm tonen bong kenhulungen senta yó kem dumuhen ne yó gónón tô mélék du mò mogot klamang yóm benwu knamalen.

⁴ Bè nim ni, deng mom nélés nawa le Danyél yó kem dumuhen hmalak ne yó kem gubérnor. Yó nmò le, mebel le lan mò lewót gónó le dmuón du. Okóm laen kô dù ton le sidek nmoen, abay se tey teneb ne tey gulit, balù udì ke wen tô gónón salà yó kem gel nmoen.

⁵ Lemwót bè yóm klaen dù salà ton le béléen, yó atul ni kem tau ni, mon le, “Laen kô dù dumu lan tekuy dmuón ke Danyél ke là mlanen bè yóm kloloen yó kem hlau yóm kun Dwata.”

⁶ Tahu se, yó nmò yó kem tau yó slomong le mógów ebè yóm tau hol geta, mon le mò du, “Hol tahà he ktauhem, Daryus.

⁷ Deng wen sensatul me mi kem tau deng wen hogotem du, kem hmalak ne kem gubérnor ne kem tau sfu tau hol geta ne yó kem fen gel hemlan béléem udél ne yó kem dumu tau deng genlalem ne deng gotu senkotuk me yóm atul nmò me ni. Hyu ke moi kut lomi udin mò lolò yóm kdéen tau nogotem ne hol hgetem anì là gbek le mulé du. Yó udinem bè lem yóm tlu folò buteng, béen tagad wen dumu gónó le mni yó kem tau tek són ebéléem. Là hyuhen ke mni le bè dumu tau ne là se hyuhen ke mni le bè yó kem kul dwata. Ke wen tau là mimón du nim udin ni, tódô bot elem tum sol gónó le kmukub yó kem liyun.

⁸ Duhen ni, holi fema lemen nim udin ni anì là buden megetles ne anì laen dù tau gembek mkó du, mò hlós udin yó kem tau Mid ne kem tau Pérsya.”

⁹ Tahu se, fema yóm tau hol geta yóm udin yó.

¹⁰ Timbow tngón Danyél yóm deng kefema Daryus du yóm udin yó, tódô mulék ebè gónóen ne husek elem yóm sotu dfélen nô ta, uma kóm smolu ebè Jirusalim yóm tembó bengen ne tódô mtud bukol bè yó mni ebè Dwata. Ni se yóm sana kun gel nmò na tlu duléken sendaw mni bè Dwata, mung du yóm tey kdóyónen du.

¹¹ Lemwót se kul yó kem genlal yó, slomong le mógów ebè gónô Danyél ne glo le Danyél tolo mni ebè Dwata htóbóng béléen.

¹² Omin le bud semfulék ebè yóm tau hol geta, bud hefedem le du yóm udin lomi nmoen, mon le, “Là deng udinem du kô bè lem yóm tlu folò buteng béen tagad wen tau mni bè yóm kun dwata duhen ke bè dumuhen tau, tek són béléem gónón mni ne yóm tau smonol du nim udin ni, tódô bot elem tum sol gónó le kmukub kem liyun? Là yó du kô udinem?” Bnalà yóm tau hol geta se, monen, “Igò sem yó du udin kem tau Mid ne kem tau Pérsya, udin là gbek tenles du ne là bud gbek kó du.”

¹³ Omin le tmulón du yóm tau hol geta, mon le, “Yó se nmò Danyél yóm sotu tau negef lemwót gu bè Juda, là kô nimónen kóm dalang se yóm udin deng femahem. Tódô henlelen mni bè yóm kun Dwata na tlu duléken sendaw mò du.”

¹⁴ Timbow gungol yóm tau hol geta yóm tulón yó, ya tey sidek kegbeng lemen lemwót bè yóm deng kefemahen yóm udin yó. Tô hotuhen gelen mebel lanen lemwà ke Danyél efet deng sdef kdaw.

¹⁵ Lemwót yó kem genlal bud le slomong ebè yóm tau hol geta ne mon le mò du, “Deng tngónem se, yóm udin yó kem tau Mid ne kem tau Pérsya, ke deng fema yóm tau hol geta, là bud gbek tenles du.”

¹⁶ Yó gónóm mon, laen dù gmò yóm tau hol geta, tódô hekfóen Danyél ne bot le elem yóm sol gónó le kmukub yó kem liyun. Yó olo udél yóm tau hol geta ebéléen, monen, “Yó hem Dwata tendo nimónem fen lemwà kóm.”

¹⁷ Hyu wen botu seng le bè bak yóm sol liyun yó. Dket yóm tau hol geta tahen yóm kun ilô ne ilô yó kem genlalen anì laen dù tau hewà ke Danyél.

¹⁸ Ominen mulék ebè gónô bongen. Suloyen buteng là mken ne là se móyóen ke wen nuni le mò gónó le hefligal du. Suloyen se buteng là gtungô.

¹⁹ Hayahen bè yó hanà tolo minal mwas tódô btik yóm tau hol geta, kendel mógów ebè yóm sol gónó le nô yó kem liyun.

²⁰ Timbow kól bè yó, ominen tmaba ke Danyél igò yóm tey ktafa nawan, monen, “Ó Danyél yóm tóbóng lówó yóm Dwata là matayen, gbeken lemwà kóm bè yó kem liyun kô yóm kóm Dwata tendo nimón?”

²¹ Bnalà Danyél se, monen, “Hol tahà he ktauhem.

²² Deng wen hógów Dwata fen tmóbóng do anì là gebngat le du kakim le ni kem liyun ni ne là gehsidek le do, abay se laen dù salà ton Dwata béléu. Ne dalang se béléem, laen kô dù sidek deng nmou béléem.”

²³ Ya tey kligal yóm tau hol geta, ominen hewa ke Danyél lem yóm sol gónó le kmukub yó kem liyun. Lemwót bè yóm ksalig Danyél yóm kun Dwata, balù udì ke wen ton le halì bè lówóhen.

²⁴ Omin yóm tau hol geta gotu hekfô yó kem tau tehe alì tmifù ke Danyél. Gotu bud tles boten lu elem yóm sol gónó le kmukub yó kem liyun, mung kul kem yehen le ne kem ngà le. Là kô le deng gefet ditu laan deng sana sensegaf nsék le lu yó kem liyun, tódô gotu nkeb le kem tiol le.

²⁵ Omin Daryus hemwit sulat ebè kdéen tau bè klamang benwu ebè kdéen but tau, balù kihu benwu gónó le nô, balù kihu kay udél le, monen, “Hol tendo wen he kenek nawa ye.

²⁶ Wen udinu bè kdéen tau balù kihu gónó le nô lem nim benwu knamalu, kóyóu ke hol knikò ye yóm kun Dwata Danyél. Yakà du se yóm Dwata laen tul katayen, laen se dù sónen yóm kun klowil. Yóm kogoten tau, laen kô dù tau gembek gembà du ne laen kô dù sónen yóm kun kogot.

²⁷ Gel lenwaen yó kem kun tau. Wen tey hentaw ton gel nmoen ditu bè longit ne dini talak tonok. Deng lenwaen Danyél lem yóm tey klóbô yó kem liyun.”

²⁸ Duhen yó, tódô lemwót bè yóm kogot Daryus yóm benwu Babilun efet yóm bud kun kogot bè Babilun Sayrus yóm tau lemwót bè Pérsya, tey tilob klowil Danyél.