Danyél 4 - Udél Dwata: Gna Kesfasad ne Lomi Kesfasad

Kekna Nibukadnisar yóm tey koyu tahà

¹ Bud wen sulat hwit Nibukadnisar ebè yóm kdéen tau bè klamangen benwu, balù kihu gónó le gu semfu ne balù kihu benwu gónó le gu lemwót ne balù kihu kay udél le, monen, “Yó hol kóyóu bélê ye ke wen kenek nawa ye ne ke hyu kógów klowil ye.

² Kóyóu ke kdê ye temngón du yó kem hentaw ton deng nmoen béléu yóm Dwata alì geta bè kdéen.

³ Tey tennga yóm ilô nmò Dwata ne tey kegbeken mò yó kem hentaw ton. Angat laen kô dù sónen yóm kogoten tau, balù hilu lugod le sana yó ne yóm kun kogot.”

⁴ “Ou se Nibukadnisar, bè yóm kdaw yó nóe bè gónô bongu ne tey menek kegnómu du, lelen tey hyu klowilu.

⁵ Okóm sotu kifu kemnahe ne tey sidek klikou. Yóm igou hlilil bè yóm gónóhu tungô wen hton béléu gónóhu alì likò.

⁶ Yó gónóhu htaba yóm kdéen tau alì temngón bè Babilun anì tulón le dou hnigad yóm knahu.

⁷ Tikóng le gdek yó kem tau demwata ne yó kem tau mton bù ne yó kem tau gel hemgawang tulónu kul yóm knahu, okóm là gbek le tmulón du dou yóm hnigaden.

⁸ Ngangen efet kól béléu Danyél ne tulónu du yóm knahu. (Yóm Danyél bnoluyu Béltisasar, hadénu bè yóm dou dwata, sotu tau deng htulus yó kem dwata hol mólós.)

⁹ Yó monu mò du, ‘Ó Béltisasar, yóm alì hulung bè yó kem tau demwata, tngónu deng htulus le uu yó kem dwata hol mólós ne laen dù gebnos ke là gbekem du. Ni hol tulónem do hnigad yóm knahu.

¹⁰ Bè yóm igou hlilil bè gónóhu tungô wen hton béléu, tonu yóm tey koyu bong mteg bè gónón sóól tonok. Tey koyu tahà.

¹¹ Ngangen lemnok yóm koyu yó efet gesduk bè longit ne tey mbegel kdaen. Tódô gfan bè kdéen tau bè klamangen benwu.

¹² Tey knóón ton yó kem dounen ne tey kbunguhen anien ke kdéen tau talak tonok gotu mken du. Són laanen gónó le hgolung yó kem ógóf lem bnes ne yó kem onuk koyu gotu le smala ta hangahen. Tódô kdê yó kem mowil te tonok, gotu mken bunguhen nim koyu ni.

¹³ Bè yóm igou temngel du yóm koyu yó, tódô tonu se htuntun gu tta bè longit yóm sotu hógów mit tulón, yóm alì mólós.

¹⁴ Hgelen udélen, monen, “Nofok ye nim koyu ni, gotu nlós ye hangahen. Gotu kó ye dounen ne gotu bulét ye kem bunguhen. Gotu lo ye lu yó kem ógóf hgolung laanen ne hlikò ye lu yó kem onuk koyu smala tahen.

¹⁵ Okóm tebel ye bè tonok tuhoden ne hol benkes ye bala tók ne tembaga futì buten. Tódô bayà ye bè yó lem bnes anì sónmoen wos bè amù ne anì slomong bè yó kem ógóf lem bnes.

¹⁶ Angat lana béléen kehedem tau ne baling kehedem ógóf lem bnes ne hitu halayen gembunù du nim ni.Nim tulónu ni hol kukum lemwót bè yó kem hógów mit tulón, kul kehedeng du yó kem alì mólós. Yó muhen nim kukum ni anì tngón kdéen tau bè klamang benwu tek són yóm Dwata hol geta bè kdéen kmamal du yóm kdê benwu nogot tau ne ket benwu wen tau néléken mò hfogoten du anien ke tau lukoten ke kun kóyô.”

¹⁷ Nim tulónu ni hol kukum lemwót bè yó kem hógów mit tulón, kul kehedeng du yó kem alì mólós. Yó muhen nim kukum ni anì tngón kdéen tau bè klamang benwu tek són yóm Dwata hol geta bè kdéen kmamal du yóm kdê benwu nogot tau ne ket benwu wen tau néléken mò hfogoten du anien ke tau lukoten ke kun kóyô.”

¹⁸ Yó se yóm deng knahu, ou se Nibukadnisar mon du nim ni. Ne ni, Béltisasar, tulónem dou yóm hnigaden, abay se laen dù dumu tau temngón bè nim benwu nogotu gembek tmulón du dou. Okóm tngónu là mgelen béléem tmulón du do lanen, abay se deng htulus le uu yó kem dwata alì mólós.’ ”

Ktulón Danyél hnigad yóm kna Nibukadnisar

¹⁹ Bè yóm kungol Danyél du yóm kna yóm tau hol geta, (yóm Danyél bnoluy le Béltisasar) nan tódô neb bà sekteb ke mudél, botong likò bè yó kem deng sut lem hendemen. Yó udél yóm tau hol geta ebéléen, monen, “Ó Béltisasar, béem heblat nawam mlan bè yóm knahu ne bè yóm hnigaden.” Bnalà Béltisasar se, monen, “Yake ebè yó dé kem hohonem gónón e gbak hnigad yóm knahem, bè yó kem tau kmutó nawa kóm béen mom ebéléem.

²⁰ Wen koyu tonem mteg kun, ne ngangen lemnok efet gesduk bè longit ne tey mbegel kdaen, tódô gfan ebè kdéen tau bè klamang benwu.

²¹ Tey knóón mton du yó kem dounen ne tey mungu anien ke tódô kdéen tau talak tonok gotu mken du. Són laanen gónó le hgolung yó kem ógóf lem bnes ne yó kem onuk koyu gotu le smala ta hangahen.

²² Tum koyu tonem mteg tu, uu se hnigaden. Deng tey kbegelem ne tey kegetahem. Yóm kegetahem, lómón ke gesduk bè longit ne yóm kkamalem benwu deng gefet bè són tonok.

²³ Ominem mton yóm sotu mit tulón, yóm alì mólós htuntun gu bè longit. Yó udélen, monen, ‘Nofok ye nim koyu ni, hol gotu nufók ye. Okóm tebel ye yóm tuhoden, benkes ye bala tók ne tembaga futì bè buten, omin ye tódô mayà du lem bnes anì sónmoen tendo wos bè amù. Hitu halayen tendo slomong bè yó kem ógóf lem bnes.’

²⁴ Yó se hnigaden yóm knahem, ne angat hdohò Dwata etahem nim kukumen kóm ni, yóm Dwata hol geta bè kdéen.

²⁵ Angat lo le u anì là budi nô lem blóng tau, tódói nô lem bnes slomong bè yó kem ógóf lem bnes. Segbóti mótób bélê le mkél kótób safì ne sónmoem tendo wos bè amù. Hitu halay kegenem gembunù du nim ni efet nam gtukul són Dwata yóm hol geta kmamal yóm kul nogot yó kem tau ne hfogoten benwu yó kem tau deng kun nélék.

²⁶ Okóm yóm tuhod tebel bè tonok, yó lanen angat bud gogotem he yóm benwu ni ke sok deng gtukulem tek són yóm Dwata nô bè longit kmamal yóm klamangen.

²⁷ Ó Nibukadnisar, ke yó dum hyu béléem, hol hnungolem ou. Hol tenflokem ne yóm kmoem sidek, tlesem du yóm nmò hyu. Knogolem ne yó kem salà gel nmoem, tlesem du yóm koduhem yó kem tau élél. Ke yó nmoem, déke hlós yóm kehyu klowilem.”

Kdohoen eta Nibukadnisar yóm knahen

²⁸ Okóm tódô kdê ni kem ni, gotu dohò eta Nibukadnisar.

²⁹ Timbow deng sfalayen bè yó, lemwót Nibukadnisar lindan mógów te ketef datal yóm gónô bongen bè Babilun.

³⁰ Yóm igoen temngel eta yóm syudaden, yó udélen, monen, “Ngem dé nim tey syudad Babilun ni, ke là se lemwóten bè yóm tey kegbeku, là kóen na a mdà mò gónóhu nô ne mò gónóhu hegfan yóm tey kegetahu.”

³¹ Yóm igoen tolo mudél, gungolen se yóm mudél gu bè longit, monen, “Ó Nibukadnisar, wen tulónu kóm. Là bud uu du ne mogot du yóm benwu nogotem.

³² Wen tódô mlo kóm anì là budi nô lem blóng tau. Tódói nô lem bnes slomong bè yó kem ógóf lem bnes, mungi mótób bnes mkél bè safì. Hitu halayem he gembunù du yóm ni efet nam gtukul Dwata yóm hol geta bè kdéen kmamal du yóm kdê benwu nogot tau ne tles hfogoten benwu yó kem tau deng kun nélék.”

³³ Tódô bè yó sem udas yó, kdohoen eta Nibukadnisar yóm monen yó. Tódô lo le bè yó anì là buden nô lem blóng tau. Tódô mótób lem bnes mkél bè safì ne sónmoen wos bè amù. Ngangen gembunù du nim ni efet ktahaen bul banug weken ne yóm knuguhen lómón ktahaen knugu onuk koyu.

Kdóyón Nibukadnisar ke Dwata

³⁴ Yó udél Nibukadnisar, monen, “Timbow deng yóm hitu halay, lengalae ebè longit. Tódô mulék ebéléu yóm sana kehedemu ne tey kdóyónu ke Dwata, tmabahe ebéléen yóm Dwata hol geta bè kdéen ne tey kadatu du yóm Dwata laen dù sónen yóm kun klowil. Laen dù sónen kogoten tau, balù hilu bud lugoden, sana yó ne yóm kun kogot.

³⁵ Kdê yó kem tau talak tonok, le hilu he yóm kul kegbek ke hesengedem bè yóm kun. Wen kegbeken mò du yóm kun kóyô lem blóng yó kem hógówen gu bè longit, dalang se bè kdê yó kem tau nô dini talak tonok. Laen dù gembek hemseng du ne laen kô dù mlos smólók du yóm kun nmò ke mon le, ‘Na, tedum nmoem ni du?’

³⁶ Bè yóm bud kuléken ebéléu yóm sana kehedemu, bud mulék ebéléu snéen yóm kadat le do yó kem tau nogotu ne bud mulék ebéléu yóm kegetahu ne yóm benwu nogotu. Bud le mógów ebéléu yó kem tehe genlalu ne yó kem fen gel hemlan béléu udél na le e hmungol udél béléu. Ne bud hulék Dwata ebéléu yóm kegetahu bè yóm benwu nogotu ne mom temnù kfasangu senta yóm gnan.

³⁷ Ne ni ou Nibukadnisar, dóyónu yóm Dwata hol geta bè longit ne henlelu hol hegeta du, mung du yóm tey kadatu du. Kdê yó kem gel nmoen, sal tedeng ne hono hyu. Hulung heglaan du yóm tau hegetahen knóen.”