Danyél 3 - Udél Dwata: Gna Kesfasad ne Lomi Kesfasad

Yóm klambaden lennged blówón hmò Nibukadnisar

¹ Yó nmò Nibukadnisar wen lennged blówón hmoen, botong lewu folò hitu mitru kegetahen ne mukas lewu mitru sóól kbong lówóhen. Hdaen bè prubinsya Babilun bè yóm datal boluyen Dura.

² Ominen hemwit udél ebè yó kem tau genlal ne ebè yó kem tau malak yó kem sendalù ne ebè yó kem gubérnor ne ebè yó kem tau gel hemlan béléen udél ne ebè yóm tau gel hemyu filak ne ebè yó kem tau gel kmukum ne ebè yóm kdéen genlal bè prubinsya Babilun anì gotu le mógów ebè yó na le e hnigal yóm lennged blówón deng hdaen.

³ Tikóng le gotu kól bè yó yóm kdéen genlal tinoken ni, gotu le mdà bè solu yóm lennged deng hdà Nibukadnisar,

⁴ ominen lemwót yóm tau gel mò heglalag bè yóm tau hol geta hgelen udélen, monen, “Ó kem tau, balù kihu kuy gónó gu semfu, balù kihu benwu ye, balù kihu kay udél ye, hol hnungol ye yóm hlolò yóm tau hol geta.

⁵ Kesok gungol ye yóm tey uni féw sguyun mung du yóm kdê dumu huni le, hol tud ye uyó ye bè tonok bè yóm lennged blówón hdà Nibukadnisar, tmaba ye ebéléen.

⁶ Ke wen tau là loloen du nim hlolò ni, tódô henmung bot elem tum tey dilóf ofi.”

⁷ Tahu se, tikóng gungol le yóm tey uni féw sguyun mung du yóm kdê dumu huni le, gotu tud le uyó le bè tonok yóm kdéen tau, balù kihu gónó le gu semfu, balù kihu benwu le, balù kihu kay udél le, gotu le tmaba ebè yóm lennged blówón hdà Nibukadnisar.

⁸ Okóm wen bè yó kem tau hemgawang mógów ebè yóm tau hol geta, tifù le yó kem tau Ju.

⁹ Yó mon le mò ke Nibukadnisar yóm tau hol geta, “Hol tahà he ktauhem.

¹⁰ Deng wen udin nmoem anì kdéen tau gotu mtud uyó bè tonok ke sok gungol le yóm tey uni féw sguyun mung du yóm kdê dumu huni le ne tmaba le ebè yóm lennged blówón deng hdaem.

¹¹ Ke wen tau mulé du yóm udin yó, tódô henmung bot elem tum tey dilóf ofi.

¹² Okóm, wen kem Ju là mimón du yóm deng monem. Yó boluy le Sadrak ne Misak ne Abidnigu, hono kem tau deng wen hogotem kul bè ni bè prubinsya Babilun. Là kô nimón le kóm, là kô le hemtahu bè yóm kóm dwata ne là kô le tmaba bè yóm lennged blówón deng hdaem.”

¹³ Uni Nibukadnisar mungol du yóm tifù le yó, ya tey sidek kebuten, tódô kendel htabahen le Sadrak ne Misak ne Abidnigu. Tikóng le kól bè yó

¹⁴ yó udél Nibukadnisar ebélê le, monen, “Tahu kô, Sadrak ne Misak ne Abidnigu, là kô hentahu ye du kun yóm dou dwata ne là kô ye tmaba ebè yóm lennged blówón deng hdau?

¹⁵ Okóm ni, benlayu yu sulék duen. Ke bud gungol ye yóm tey uni féw sguyun mung du yóm kdê dumu huni le ne ke mtud ye uyó bè tonok, laen kô dù gfà ye. Okóm ke là mimón ye, tódô henmung tudà le yu elem tey dilóf ofi tuu. Ke lómón yó, dwata du de tô gembek lemwà kuy lem hólólu?”

¹⁶ Yó balà le Sadrak ne Misak ne Abidnigu du, mon le, “Ó Nibukadnisar, laen mu me malà kóm bè yóm udélem yó.

¹⁷ Ke botem se mi elem tum tey dilóf ofi, kaem yóm Dwata kum gónó hemtahu gembek lemwà kum. Lenwaen mi lem hólólem.

¹⁸ Okóm baluen he ke là tnóbóngen kum, là kô me móyô hemtahu bè yóm kóm dwata duhen ke tô me tmaba ebè yóm lennged blówón deng hdaem.”

Kbot le kul elem yóm tey dilóf ofi yóm tlu kem wè Danyél

¹⁹ Ya tey sidek kebut Nibukadnisar kul le Sadrak ne Misak ne Abidnigu, tódô sedlu hulô lem uyóhen. Ominen mdók yó kem tau gel dóken anì hol hendlà le dmutung ofi hitu duléken mkay kkinien.

²⁰ Ominen mdók yó kem sendalù alì kemgis bè yó kem sendaluen mò mfét kul le Sadrak ne Misak ne Abidnigu mò mbot kul elem ofi.

²¹ Tahu se, nfét le lu okóm sana knóen bélê le nes le ne uléw le, omin le mbot kul elem yóm tey dilóf ofi.

²² Lemwót bè udél yóm tau hol geta, ya tey sidek kkinì dilóf ofi hdutungen, botong diluten yó kem sendalù mbot kul le Sadrak ne Misak ne Abidnigu, gotu le mlób.

²³ Lemwót kul le Sadrak ne Misak ne Abidnigu, tódô le btang elem yóm tey dilóf ofi igoen tolo nô bélê le fét le.

²⁴ Bè yóm igoen temngel Nibukadnisar, tódô kendel hebkó mdà ya tey sidek ketngahen, monen mò yó kem tau gel hemlan béléen udél, “Là tek tlu tau du kô yóm bot tekuy elem ofi koni?” Mon le se, “El, tlu le.”

²⁵ “Tenngel ye dé,” mon Nibukadnisar, “deng le mom fat liwà gu lem tum ofi ne là kô le dog mlób. Yóm gfat le, hol lómón tô sotu ngà dwata logi.”

²⁶ Omin Nibukadnisar tô hloni ebè bak tum tey ofi dmilóf mung du yóm tey ketgamahen, tmaba monen, “Ó Sadrak ne Misak ne Abidnigu kem tau tóbóng lówó yóm Dwata hol geta bè kdéen hewà ye edini.” Tahu se, hewà le gu lem ofi le Sadrak ne Misak ne Abidnigu.

²⁷ Mung kton le kul yó kem tau genlal ne yó kem genlal bè sendalù ne yó kem gubérnor ne yó kem fen gel hemlan udél bè yóm tau hol geta, ya tey ketnga le yóm klaen dù hemen le. Balù sbalu wek le ke mlób ne là se mlób nes le. Balù boo kebel, là kô gungef le du bélê le.

²⁸ Omin Nibukadnisar mon du, “Hol dóyón tekuy yóm kul Dwata le Sadrak ne Misak ne Abidnigu. Deng wen hógówen gu bè longit mò lemwà yó kem tau tóbóng lówóhen smalig béléen. Là nimón le du yóm hlolou kul, mom hyu bélê le he ke matay le olo ke tô le tmaba ebè yó kem tólóng dwata. Tek són kul Dwata nimón le.

²⁹ Yó gónóm mon, wen udin mget nmou. Bè nim benwu knamalu, ke wen tau balù kihu gónó le gu semfu ne balù kihu benwu le ne balù kihu kay udél le, ke mudél sidek eta yóm kul Dwata le Sadrak ne Misak ne Abidnigu angat nufóku lu, gotu genbau gónô le. Laen kô dù dumu dwata tngónu ke lómón ni kehewaen yó kem kun tau.”

³⁰ Ominen lemwót yóm tau hol geta yó, hegetahen glal le Sadrak ne Misak ne Abidnigu bè yó bè prubinsya Babilun.