Danyél 12 - Udél Dwata: Gna Kesfasad ne Lomi Kesfasad

Sfu yóm tulón yóm hógów Dwata ke Danyél

¹ Yó bud udél yóm hógów Dwata mnes bukay, monen, “Bè yóm kdaw yó, angat msut lem blóng ye Maykél yóm geta bè yó kem hógów Dwata, mò mofin kuy kem tau Israél. Bè yóm kdaw yó, hol keglayam bong yóm angat glumfak yó kem tau Israél, keglayam là deng sulék gnóm tau du lemwót bè kbut benwu. Okóm bè yó kem kdaw yó, angat le gewà yó kem dumuhem Israél ke deng snulat lem yóm bok Dwata yóm kul boluy.

² Wen se bè yó kem tau deng matay angat bud btik, wen se bélê le gmuta du yóm klowil laen dù sónen ne wen se bélê le gmuta du yóm tey sidek kyak laen dù sónen.

³ Yó kem tau hulung hedem, kem tau nit le kem dumu le ebè yóm lan tedeng, angat tey keslinang le hol lómón yó kem blotik bè longit ne laen dù sónen yóm keslinang le yó.

⁴ Okóm kóm, Danyél, hol bunihem yóm deng tngónem ni. Hol nmoem dketen yóm lenulun deng gónóm smulat du efet nan ne kól yó kem hol són kdaw. Tey dê kem tau elem hulin kdaw sónmò le mógów na le e smólók anì temnù yóm gel tngón le bè yóm gel sut e lem blóng le.”

⁵ Ominu bud mkay ketngelu, ou se Danyél mon du yóm ni ne wen lewu hógów Dwata tonu mdà sfatà kilil yóm él mlel.

⁶ Lemwót yóm sotu, snólóken yóm sotun lómón tô tau kmoen mnes bukay deng mdà te kmawang seblà ta yóm él, monen mò du, “Mò kegenen du ni kem tey sidek sut ni, ominen deng?”

⁷ Ominen lemwót yóm tau mnes bukay mdà te kmawang fi ta yóm él yó koni, hdaen eta bè longit yóm lewu sigelen ne gungolu yóm udélen smafà bè yóm Dwata laen dù tul katayen, monen, “Yó kegenen, tlu halay bud sóól. Ke deng gesón yóm alì keglayam yó kem kun tau Dwata deng gotu dohò eta le ne ni kem ni.”

⁸ Gungolu yóm udélen, okóm là hol getnefu du yóm monen. Yó gónóhu smólók du, “Ó Sér, tedu gónón e kól du yóm kdéen ni?”

⁹ Okóm yó balaen do, monen, “Yó ne, Danyél, henlósem mò du yóm gel nmoem. Là tagaden dohò he ni kem ni ke là nan na sut yó kem hol són kdaw.

¹⁰ Lemwót bè yóm tey keglayam yó kem tau bè yóm kdaw yó, yó gónón dê tau baling mólós, laen dù bud belen le. Okóm yó kem tau mò sidek tódô hlós yóm kul kmò sidek, là getnef le du kul yóm deng sut lem blóng le. Tek són yó kem tau hulung hedem temngón du.

¹¹ Tódô lemwóten bè yóm kdaw kwen hemseng du yóm gel kedsù ye ebè Dwata, yóm kdaw kehdà le lem yóm kun Gónô Dwata yóm dwata kéng alì sidek bè yó, yó kegen ye alì mò du glayam botong lemibu lewu latu syóm folò (1,290) kdaw.

¹² Tey hligal kun yóm tau ke hol hfuhen imaken mangat efet lemibu tlu latu tlu folò lewu (1,332) kdaw.

¹³ Bong kóm du, Danyél, tódô henlósem mò du yóm gel nmoem efet kól bè sónen. Baluen ke matayi, angati bud btik bè yóm hol són kdaw ne gutahem yóm ofol deng hentifes Dwata béléem.”