Danyél 10 - Udél Dwata: Gna Kesfasad ne Lomi Kesfasad

Yóm hógów Dwata hton bè Danyél

¹ Bè yóm getlu halay Sirus mogot yóm benwu Pérsya yóm tau hol geta smakuf yóm benwu Babilun, bud wen hton Dwata ke Danyél (yóm bnoluy le Béltisasar). Yó hnigad yóm hton béléen yó, hono gbak ebè yóm gida bong angat dohò sut bè benwu le elem hulin kdaw. Tódô tngón Danyél tennefen yóm hton Dwata béléen yó.

² Ou Danyél mon du yóm ni. Bè yóm kdaw ktonu du yóm hton Dwata béléu yó, deng tlu fedyanu ne tendo langag.

³ Balù udì ke mkene yó kem ken mnóm, dalang se utón là kóe mutón, laen se dù tifas grép glo bè sumóngu ne laen se dù hboo tilob lunolu bè lówóhu lem yóm tlu fedyan yó.

⁴ Bè yóm gewuhen folò fat kdaw bè yóm tanay bulón, mdae bè kilil yóm él bong boluyen Tigris.

⁵ Bè yóm igou temngel tódô tonu yóm tau mnes bukay, hmilet tahu blówón.

⁶ Yóm lówóhen, hol lómón keslinangen yóm botu alì mebtes. Yóm lem uyóhen, hol lómón keslinangen kal silà. Yóm lem matahen hol lómón ke dilóf solok. Yóm sigelen ne tihen hol lómón ke tembaga deng hló. Yóm udélen, hol lómón kbuleng udél yó kem tey tau sbung.

⁷ Tek sotuhu Danyél mton du yóm hton Dwata béléu ni. Yó kem dumuhu mung do là ton le du se kul, okóm wen gnóm le ne tey sidek klikò le botong le mlóy mebel gónó le hebnos.

⁸ Duhen yó, són ou tebel ditu temngel yóm tey tennga hton Dwata béléu. Balù udì ke bud wen kgisu, botonge bukós laen kô dù bud gelu.

⁹ Ominu mungol du mudél. Yóm khungolu yóm udélen, botong là bude temngón tódóe glokob bè tonok.

¹⁰ Ominen tódô wen mogot do, nkayen o efet gtudu bukolu ne hólólu bè tonok igou kenkel.

¹¹ Yó udélen ebéléu yóm tau yó, monen, “Ó Danyél, yóm tau alì kenbong nawa Dwata, hol hentilobem hemklingu du ni kem tulónu kóm ni. Mdai ne, abay se wen hógów dou ebéléem.” Yóm kmonen du mò do yóm yó, tódóe mdà igoen tolo setbol kkelu.

¹² Ominen bud mon du mò dou, “Béi abay hlikò, Danyél. Tódô lenwóten bè yóm hol tanay kdaw keheglaanem knóem bè Dwata anì hulungi temnef, deng sana gungolen bè longit ne yóm hnihem. Ni nógówu edini naw e tulón kóm balaen yó kem hnihem yó.

¹³ Okóm là géhéle sut edini, bà mon botong lewu folò sotu butengen tendo hemseng do yóm geta bè yó kem htulus Seitan mogot bè Pérsya. Ominen sut Maykél yóm sotu geta bè yó kem hógów Dwata, mò tmóbóng do. Tódô tebelu bè yó, tolo le sfatay yóm htulus Seitan mogot yóm benwu Pérsya.

¹⁴ Ni nógówu edini naw e tulón kóm yóm angat sut bè yó kem dumuhem tau Israél e lem hulin kdaw, abay se gbak e lem hulin kdaw yó kem hton Dwata kóm ni.”

¹⁵ Yóm igoen mudél ebéléu, tódóe kudung ebè tonok, là kóe gudél.

¹⁶ Ominen lemwót yóm lómón tô tau ktonu du nduen sumóngu, ominu yó gudél. Yó udélu ebè yóm mdà bè soluhu yó, monu, “Ó Sér, tey sidek klikou du yóm deng hton Dwata do, botonge lenmek.

¹⁷ Là knóónen béléu ke tóe stulón kóm, Sér, yakà olohu tau tóbóng lówóhem. Là bude mgel, botong tô lana nawahu.”

¹⁸ Ominen bud mogot dou yóm lómón tô tau yó koni, tódô gnómu bude mgel.

¹⁹ Yó bud monen mò do, “Béi abay hlikò, Danyél, yakà tey kbong nawahen kóm Dwata. Dwata he henek nawahem, hekgisi ne hgelem nawam.” Tahu se, yóm igoen mudél ebéléu yó, bud mulék kgisu ne monu mò du, “Yó ne Sér, henlósem yóm tulónem do, yakà deng hekgisem o.”

^20-21 Yó balaen do, monen, “Tngónem kô yóm nógówu ni? Yó nógówu edini naw e tulón kóm yóm deng snulat lem yóm Bok Gónóhen Nô yóm Ktahuhen. Ke deng ktulónu du kóm, bude semfulék naw e bud mit sfatay bè yóm geta htulus Seitan bè Pérsya. Sok deng yó, ominu bud sfatay bè yóm geta htulus Seitan mogot bè benwu yó kem tau Grik. Laen dù dumu gembek tmóbóng do mit sfatay bélê le tek sónen Maykél yóm hol geta bè yó kem hógów Dwata, mò gel mofin kuy kem tau Israél.” Là gomongen bè nili yóm tsaptér 11. Ni se sfu yóm hton Dwata ke Danyél bè tsaptér 10, duhen yóm angat msut elem hulin kdaw. Yó tulón yóm hógów Dwata ke Danyél, angat hilu latu halayen yóm tendo kessatù le yóm tau hol geta fi leged yóm tau hol geta fi bwak. Senfatay le ke mahil du bélê le mogot yóm klamangen. Tódô senflós le sgida yóm lewu benwu lembang ni, blaem gomong meflayam lemen benwu Israél. Yó angat nmò yóm sotu tau hol geta fi bwak, angat hensengen yóm gel kedsù le ebè Dwata yó kem tau Israél. Tulón yóm hógów Dwata ke Danyél yóm angat kehlayamen yó kem tau Israél yóm sotu tau hol geta fi bwak.