Amus 8 - Udél Dwata: Gna Kesfasad ne Lomi Kesfasad

Yóm bungu koyu deng mélél hton Dwata ke Amus

¹ Bud wen htonen dou yóm Dwata hol dandónen geta. Htonen do yóm abì hnok bungu koyu mélél nô lemen.

² Snólók Dwata ou, monen, “Amus, tedu de tonem?” Bnalau se, monu, “Abì hnok bungu koyu deng mélél.” Omin Dwata bud mon du mò dou, “Yóm bungu koyu deng mélél ni, hnigaden yó kem dou tau Israél deng tey tógó tmafak kul. Là bud gnolunu du ne yóm ktafaku kul.

³ Bè yóm kdaw yó, yóm kesngal le lem Gónô Dwata angat baling ngawóy le. Tódô hgasà tau matay bè gida. Tódô bot le lu bè lewà yóm syudad, balù sekteb ke wen mudél. Ou se yóm Dwata hol dandónen geta nim mudél ni.”

⁴ Ni mò hol hnungol ye, yu kem tau gel hemgnok yó kem tau élél ne gembà klowil yó kem tau laen dù kwa le lem nim benwu ni.

⁵ Gel hendem ye, “Hyu ke géhél deng yóm kestifun tekuy bè yóm lomi bulón ni anì géhél tekuy bud hembalù halay. Hyu ke géhél deng yóm Kdaw Kehegnô anì géhél tekuy bud hembalù. Omin tekuy hol hebtes du yóm hbalù tekuy ne gmantang tekuy bè yóm gantang kmulang ne tmimbang tekuy bè yóm timbang lemugì.

⁶ Hebtes tekuy yóm halay wen bolen kafa. Nmò tekuy hesek yóm tau mutóng là gbeken mayad, yóm tau mutóng tek sbotù blówón bukay ne snilas.”

⁷ Deng safà Dwata yóm Dwata gónó le gsalù yó kem tau Israél, monen, “Là kóen mkó bè nawaw yó kem sidek gel nmò le.

⁸ Angat megsinsig yóm benwu le lemwót bè yóm sidek gel nmò le ne gotu le langag yó kem tau menwu tahen. Lemwót bè yóm tey linol, tódô lemnok eta yóm tonok bè klamangen benwu le, lómón yóm Él Nayl bè Idyip ke bangen dmunuk. Bè yóm bud kegsinsig yóm tonok yó, ominen bud mnà elaan.

⁹ Bè yóm kdaw yó,” mon yóm Dwata hol dandónen geta, “hesdefu kdaw anien ke tolo gtungó ne hkifuhu talak tonok anien ke tolo kemdaw.

¹⁰ Yóm gel kehligal ye mken bè dou Gónô, angat henbalingu klangag ye ne yóm gel kehligal ye semngal, henbalingu kik ye. Lemwót bè klangag ye gónó ye lemsek nes sakù ne gotu tenbulud ye wek ye, lómón yó kem tuha nodung le yóm tek sotu ngà le logi. Ya tey sidek khééten yóm kdaw yó.”

¹¹ Yó bud udél yóm Dwata hol dandónen geta, monen, “Là gbeken du ke là dohoen yóm kdaw kehbelu bitil bong lem nim benwu ni. Là kô bitil bè ken du ne là kô bè kleeng du, okóm bitil ye bè udél Dwata.

¹² Angat le gotu lóngón yó kem tau, tendo nebel le udél Dwata, lenwót le bè Mohin Héét mebel efet kól bè Mohin Miditiranyan, omin le lemibut lenwót le fi debwak kól fi dmata kdaw, okóm là kô ton le du.

¹³ Bè yóm kdaw yó, balù kem libun lomi lemnok alì knóón kkólen bè yó kem logi lomi lemnok alì kemgis, gotu le lenmek bè kleeng le yóm udél Dwata.

¹⁴ Yó kem tau gel smafà hlan le bè boluy yó kem dwata lennged bè Samarya, yóm gel mon du, ‘Hlanu bè kun klowil yóm dwata Dan,’ duhen ke mon le, ‘Hlanu bè kun klowil yóm dwata Birsiba,’ yó kem tau gel mon du yó angat le gotu masà, là kô le bud gebtik.”