Amus 7 - Udél Dwata: Gna Kesfasad ne Lomi Kesfasad

Yó kem tlangas hton Dwata bè Amus

¹ Wen htonen dou yóm Dwata hol dandónen geta. Tonu yóm tey tlangas mfól deng eles hentifesen mò hwiten ete tonok. Yóm ktonu du ni, deng kogol kuta le bad yóm tau hol geta ne deng bud nbuten tmowok yóm mò kul nuta.

² Bè yóm hton Dwata do yó, tonu yó kem tey tlangas mfól, gotu ken le yóm kdéen tmowok te tonok. Ominu mon du, “Ó Dwata hol dandónen geta, hkoduhe béléem, hol hnifótem mi yó kem tauhem. Ke hógówem yó kem tey tlangas wen yó, tedu se tô klowil me du? Igò me là bud hol wen.”

³ Tahu se, là hdohò Dwata du, monen, “Là dohoen yóm deng tonem yó.”

Yóm ofi hton Dwata bè Amus

⁴ Ominen wen bud htonen dou yóm Dwata hol dandónen geta, tonu deng eles wen ofi hentifesen mò tafaken yó kem tauhen. Yóm ofi yó, deng hektihen sokol mohin ne tolo lelen mken yóm klamang tonok.

⁵ Ominu mon du, “Ó Dwata hol dandónen geta, hkoduhe béléem, béem hwit kut yó. Là mowil me du yó kem tauhem. Igò me là hol bud wen.”

⁶ Tahu se, là hendohò Dwata du, monen, “Là dohoen snéen yóm deng tonem yó,” udél yóm Dwata hol dandónen geta.

Yóm tuntun hton Dwata ke Amus

⁷ Bud wen hton Dwata dou. Tonu Dwata mdà bè kilil yóm beng deng hlan le bè tuntun yóm tehe kehdà le du. Ne wen tuntun nogoten lanen hménég du ke deng hol tedeng.

⁸ Ne snólók Dwata o, monen, “Amus, tedu se tonem?” Bnalau se, monu, “Tuntun.” Omin Dwata bud mon du mò do, “Ngem, nim tuntun ni mò lanu milô yó kem tauhu Israél. Ke là tedengen yóm ktonu kul, angat dohò yóm ktafaku kul.

⁹ Yóm gónô gónó le gel tmaba ebè yó kem dwata kéng yó kem ból Isak, angat gotu hegbau yó kem hohon le. Yó kem gónô deng hetfing le ebéléu yó kem tau Israél, angat gotu hegbau. Naw na hnotok yóm kul kogot benwu yó kem ktol Jirubuam, bede hlanu bè sudeng yó kem hohon le.”

Amus ne Amasaya

¹⁰ Timbow gungol Amasaya, yóm tau gel blóng le ebè Dwata bè Bétél yóm tulón Amus yó, tódô kendel hemwit udél ebè Jirubuam yóm tau hol geta bè Israél, monen, “Deng natul Amus uu bè ni lem blóng yó kem tauhem. Yó kem udél deng lemwà gu lem baken hono sidek mit hguluk bè nim benwu ni.

¹¹ Yó udélen, ‘Móyón matay bè gida Jirubuam. Lemwót yó kem tau Israél, angat des le negef ebè benwu mayuk.’ ”

¹² Omin Amasaya mon du mò ke Amus, “Mdóhi bè ni, tau gel dê tonen. Muléki ebè kóm benwu bè Juda, ditu gónóm tmulón du ke wen gel tulónem. Hbayadem yó kem tau bè yó yóm gel ktugodem.

¹³ Béem abay bud hnala mi bè ni bè Bétél bè yó kem dê gel tulónem yóó. Abay se bè ni kun gónó tmaba Dwata yóm tau hol geta ne kul gónó tmaba Dwata yóm kdéen tau Israél.”

¹⁴ Yó balà Amus du, monen, “Là tugode Dwata ne là se ngae tugod Dwata dou. Là kô ni du ebelu filak. Tauhe semgyok ógóf se dou ne tauhe fen hemgifat koyu fig.

¹⁵ Okóm yó nmò Dwata, tnabahen ou yóm igou semgyok ógóf, monen mò dou, ‘Mógówi ebè yó kem dou tau bè benwu Israél, wen htugodu kóm bélê le.’

¹⁶ Duhen ni, hol hnungolem yóm udél Dwata. Gel monem, ‘Béen wen tugodem gbak ebè benwu Israél. Béen wen tulónem gbak eta yó kem tau Israél yóm kun sfu Isak.’

¹⁷ Yó gónóm mon, Amasaya, ni se udél Dwata ebéléem yó monen, Lemwót bè yóm là kóyóem hmungol, angat baling libun hdóyón yóm yehenem lem nim syudad ni ne yó kem ngaem logi ne kem ngaem libun, tódô le gotu matay bè gida. Ne gotu sensólól le yóm tonokem ne blay le bè yó kem dumu tau. Lemwót kóm, feni matay bè tólóng benwu. Angat gotu negef le lu etu yó kem tau Israél ebè benwu mayuk.”