Amus 6 - Udél Dwata: Gna Kesfasad ne Lomi Kesfasad

Keglà yó kem tau Israél

¹ Hatay ye kuy, kem tau mahil klowilen bè Sayun. Hatay ye se kuy, kem tau bè Samarya. Ofo kuy ke menek kbenwu ye, okóm là. Hatay ye se kuy, kem tau gónó le gel galak yó kem tau Israél, yu kem tau gónó le gel mni tóbóng yó kem dumu tau Israél.

² Lemwót ye na ye e tenngel yó kem syudad deng genbà le. Na ye e tenngel yóm syudad Kalni. Omin ye hlós etu bè yóm tey syudad bong Hamat, omin ye mool ebè Gat, yóm syudad yó kem tau Flistin. Hyu senta yó kem benwu yó kô yóm benwu Juda ne benwu Israél? Là gi! Lamang kô yóm kuy tonok senta yóm kul tonok? Là snéen.

³ Móyón kól yóm kdaw kegtafak ye, okóm balù udì ke olò hendem ye yóm kdaw yó. Okóm lemwót bè yóm sidek gel nmò ye gónón kendel hto yóm kdaw yó.

⁴ Hatay ye se kuy, yu kem tau hegléd bè yóm gónón myón alì mebtes, tódô slibut hono kem kimu heklóón gu hilolen, kem tau tendo gel mutón ngà ubiha ne ngà safì.

⁵ Tey ye móyô mò sngal mkél bè yóm tehe nmò Dabid, omin ye molò du bè yóm gel kenbit ye.

⁶ Minum ye tifas grép lem tukung ne lunol ye bè lówó ye yóm hboo alì minggel boohen, okóm là kô dog knangag ye du yóm móyón keglà yó kem tau Israél.

⁷ Yó gónóm mon, angat yu hol gna negef le ebè benwu mayuk. Angat gesón ne yóm kehguluk ye.

⁸ Yó eles safà yóm Dwata hol dandónen geta hlanen bè boluyen, yóm Dwata laen dù là gbeken du, monen, “Tey kenbéu yóm alì kehegeta le knô yó kem tau Israél. Tey sidek matahu mton du yó kem gónô lembang tilob hdà le. Angat gotu blayu elem tdok yó kem hohon le yóm syudad le ne kdê yó kem nô lemen.”

⁹ Ke wen sfolò tau tolo tebel bè yóm sotu gónô, angat kdê le gotu matay.

¹⁰ Ne ke wen sotu dumu le mógów elem gónô mò ma lówó yó kem deng matay anì ntemen bè lewà, tmaba yóm tau yó ebè yóm sotu tau tolo mowil lem gónô, monen, “Tolo wen dù tau nô béléem bè yó kô?” Ne yó balaen du yóm sotu dù mowil, monen, “Laen duen.” Ne yó angat mon yóm tau tmaba, “Béi mudél, hol bê te abay bnoluy yóm boluy Dwata.”

¹¹ Ke dók Dwata yó kem hohon ye, tódô gotu lenusok le yó kem gónô lembang kkólen bè yó kem gónô lemnek.

¹² Yóm kudà, gbeken kô legidù lem botu? Gbek tau kô hdadu safì lem mohin? Nungel. Okóm lómón yó se kungel ye, deng mom nmò ye mò gónó milu yóm kukum tedeng ne deng mom nmò ye sidek khééten yóm tedeng.

¹³ Tey kehligal ye bè yóm kled ye yóm benwu Lo-dibar. Yó udél ye heklabak, mon ye, “Balù Karnaim, botong gled me lemwót bè yóm tey kekgis me.”

¹⁴ Yó udél yóm Dwata laen dù là gbeken du, monen “Ó kem tau Israél, angat hwitu elem blóng ye yó kem hohon ye mò mled yóm benwu ye. Tey angat kehegnok le kuy bè klamang yóm kuy tonok lenwóten bè Lébo-hamat fi bwak efet kól ditu bè Datal Araba fi leged.”