Amus 5 - Udél Dwata: Gna Kesfasad ne Lomi Kesfasad

Kubug Amus yó kem tau Israél anì hegsel le

¹ Ó kem tau Israél, ni mò hnungol ye. Hol hnungol ye yóm lanuhu bélê ye.

² “Deng btang ne Israél, yóm sawang libun ne là buden gebtik. Deng gbayà, tódô masà bè tonok, laen kô dù bud hdà du.”

³ Yó udél yóm Dwata hol dandónen geta, monen, “Ke wen sotu bè yó kem syudad ye hógów lemibu sendalù ebè gida, tek lematu bud gulék du. Ne ke wen lematu sendalù hógówen ebè gida yóm sotu benwu udì, tek sfolò bud gulék du.”

⁴ Yó bud udél Dwata ebè yó kem tau Israél, monen, “Semfulék ye ebéléu anì mowil ye.

⁵ Bê ye abay bud mógów ebè Bétél ne ebè Gilgal duhen ke ebè Bér-siba ke na ye e demsù ditu. Abay se yó kem tau bè Gilgal, angat gotu negef le lu mayuk ne yó kem tau bè Bétél, angat le gotu meglà.”

⁶ Semfulék ye ebè Dwata anì mowil ye. Ke là semfulék ye, hol lómón ke mken ofi kmoen kuy kem tau Israél. Tódô himot hotuhen yó kem tau bè Bétél ne laen kô dù tau tonem mò hmatay du yóm ofi yó.

⁷ Nawaw yu kem tau kmukum, deng mom henbaling ye héét yóm kukum tedeng, là kô ndà ye du yóm kul ktahu yó kem dumu ye tau.

⁸ Igoen Dwata se mò kul yó kem blotik, yóm sotu bung blotik boluyen Pliyadis ne yóm sotuhen boluyen Urayun. Gbeken hembaling du mwas yóm kifu. Ne gbeken hembaling du kifu yóm kdaw. Du se ma du yóm él mohin ne henbalingen kulón ete tonok. Dwata yóm kun boluy.

⁹ Tek sudof keglaen yó kem tau wen genbeken ne gotu lenusoken yó kem gónó le gel heklung.

¹⁰ Tey kutó nawa ye du yóm tau gel tedeng kukumen. Bud knutó nawa ye snéen yóm tau gel tmulón tahu bè kukum.

¹¹ Gel ndà ye yó kem tau élél ne hennagaw ye yó kem ngà nuta le lemwót bè yóm dê hbayad ye kul. Yó gónóm mon là kô ye na a gnô lem yó kem gónô botu alì tilob deng hdà ye. Là se ginum ye du yóm tifas grép lemwót bè yó kem tey tilob gónó ye hmulu kul.

¹² Abay se deng gotu tngónu yóm alì kwen yó kem salà ye ne gotu tngónu yó kem dumu sidek gel nmò ye. Gel hen-gnok ye yó kem tau tedeng kmò le, lel ye gel ma mò wa nawa ye ne gel henseng ye bè kukum yóm kul ktahu yó kem tau élél.

¹³ Yó gónóm mon là bud le gudél yó kem tau hulung hedem, yakà ni du yóm kdawen alì sidek.

¹⁴ Hol sen-galu ye mò du yóm tedeng, hlayuk ye bè yóm sidek anì mowil ye. Ke yó nmò ye, tahu nô bélê ye yóm sana Dwata hol gónó mogot, yóm Dwata laen dù là gbeken du, lómón yóm deng gel mon ye nim kmoen ni.

¹⁵ Hol kenbê ye yóm sidek, ne hol henlom ye nawa yóm tedeng. Ne hol hentedeng ye kukum bè gónô skukum. Ngem, déke bud mulék kodu Dwata yó kem dù tauhen tolo mowil bè nim benwu ni, yóm Dwata laen dù là gbeken du.

¹⁶ Duhen yó, ni se udél yóm Dwata laen dù là gbeken du, monen, “Angat wen mngawóy bè yó kem plasa le ne mkik bè kdê yó kem lan lem syudad. Balù yó kem tau mò hulu, tódô tnaba le lu mò modung, slomong le bè yó kem tau gel bnayad mò modung.

¹⁷ Angat tey wen mngawóy bè yó kem gónó le gel mulu grép abay se angate mlan lem blóng le naw e gotu genlà lu. Ou se Dwata nim mudél ni.”

Eles ketgama yóm kdaw kkukum Dwata

¹⁸ Angat hatay ye kuy, kem tau tendo hemdón yóm kun kdaw Dwata. Tedu se angat guta ye du yóm kdaw yó? Yóm kdaw yó kdaw kmifu, sundu layag du.

¹⁹ Yóm kdaw yó hol lómón ke yóm tau hemlóy liyun, mom bud geslongen yóm ógóf lóbô boluyen bér. Duhen ke mulék ebè gónóen ne mnok bè beng, mom bud nékét ulal.

²⁰ Tahu se, angat tey kmifu yóm kdaw Dwata yó, sundu layag du. Kdawen alì mget kkifuhen, balù udì ke wen klayagen.

²¹ Yó udél Dwata, monen, “Tey sidek kekbéu du yó kem gel kehligal ye tmaba ebéléu. Là bud gbeku hembala du ne yóm gel kesbung ye.

²² Baluen ke mit ye ebéléu yó kem dsù gel hkekeb ye ne ke mit ye ebéléu yó kem halay ye, là kô henmóyóu kul. Là se henmóyóu du yó kem ógóf deng habù ye mò blay ye ebéléu.Blà ye ne hebnes semngal. Là bude móyô hmungol du ne yó kem gel kenbit ye.

²³ Blà ye ne hebnes semngal. Là bude móyô hmungol du ne yó kem gel kenbit ye.

²⁴ Okóm yó hol nóyóu bélê ye ke henlel ye mit du yóm kukum tedeng. Kehlingónu du yóm kehyuhen yóm kukum tedeng nwit ye yó, hol lómón yóm él tódô senflósen mlel.

²⁵ Ó kem tau Israél, bè yóm fat folò halayu mit kuy hlalak lem yóm benwu laen hol wen tauhen, ebéléu kô yóm gónó ye e gel demsù? Là gi.

²⁶ Okóm deng mom yó gel nkay ye yóm geta bè yó kem dwata kéng boluyen Sakut ne yóm dwata blotik boluyen Kaywan, hono dwata deng nmò tdok ye.

²⁷ Yó gónóm mon, angat hegefu yu mayuk etu bè benwu sentu Damaskus,” mon Dwata. Yó kun boluy, Dwata laen dù là gbeken du.