Amus 4 - Udél Dwata: Gna Kesfasad ne Lomi Kesfasad

Yóm là khulung le dmalang yó kem tau Israél

¹ Ni mò hnungol ye, yu kem libun bè Samarya, kem libun alì mabù lómón tô safì alì metlomò bè benwu Basan. Yu se yó kem libun alì hemsidek yó kem tau wen gónó le élél ne hemgnok yó kem tau laen dù gónó le ma. Són yó nmò ye gel dók ye tuha logi ye, gel mon ye, “Budi mit ebélê me yóm mò ninum me.”

² Deng safà yóm Dwata hol dandónen geta hlanen bè yóm tey klaen dù belenen, monen, “Angat kól yóm kdaw hegef le kuy mayuk, lómón kmò le kuy ke gkebeng ye bè dulé. Hol lómón kekteng le kuy utón él tawan dulé yóm ket kuy sotu.

³ Kteng le yu ebè yóm gónón gbà beng bè syudad ye, omin le mbot kuy ebè lewà. Ou se Dwata nim mudél ni.

⁴ Yó ne, henlel ye mógów ebè Bétél anì bud ye mò salà. Ne bud ye mógów ebè Gilgal anì bud temnù yóm kegsalà ye béléu. Ket hlafus ye demsù ditu ne ket blóngen tlu kdaw nwit ye yóm gesfoloen gel bad ye.

⁵ Nwit ye etu yóm mambang wen bulung henoken mò gónó ye dmóyón dou. Omin ye bud mit yóm basa tódô lemwót bè nawa ye mò gónó ye smalù knô ye. Tey, kem tau Israél, ni se yóm tendo nóyô nmò ye,” udél yóm Dwata hol dandónen geta.

⁶ Yó bud monen, “Ou se yóm tehe heglumfak bitil bong bè ket syudad ye. Ewenem yó he sana là kóyô ye semfulék ebéléu,” mon Dwata.

⁷ “Là kô hkulónu du bè yóm kdaw alì kwen muhen bè yó kem hulu ye ne gotu sidek yó kem hulu ye. Deng hkulónu bè yóm sotu syudad, okóm là hkulónu du bè yó kem dumu syudad. Kmulón ebè sotu tonok gónó mò hulu, fen là bè yó kem dumuhen, hlós tódô mékéng.

⁸ Yó nmò yó kem tau, tódô ket le benwu malu mógów na le e mebel él ninum, okóm là kóen kóyów yóm él ton le. Ewenem sana là kóyô ye semfulék ebéléu,” mon Dwata.

⁹ “Denge se hemwit yóm tey lenos alì kinì anì gotu menes yó kem hulu ye. Ne bud wen dumu hwitu mò hemsidek kul. Ne gotu ken tlangas yó kem hulu ye ne yó kem lefà grép ye ne yó kem koyu fig ye ne yó kem koyu ulib ye. Ewenem sana là kóyô ye semfulék ebéléu,” mon Dwata.

¹⁰ “Deng hwitu elem blóng ye se yóm tey hlayam, lómón yó kem hlayam tehe hwitu ebè yó kem tau Idyip ekni. Deng hfatayu bè gida se yó kem ngà ye logi hanà lomi lemnok ne gotu hfatayu se yó kem kudà le. Deng tódô hono boo bolok tau matay gungef ye bè kamfù ye. Ewenem sana là kóyô ye semfulék ebéléu,” mon Dwata.

¹¹ “Deng wen genlau bè yó kem syudad ye lómón yóm tehe ksulék keglau yóm benwu Sodom ne Gumura. Yó kem dù mowil bélê ye, hol lómón ke yóm koyu deng ken ofi dolihen bè yóm keskot le du lem ofi. Ewenem sana là kóyô ye semfulék ebéléu,” mon Dwata.

¹² “Yó gónóm mon, kem tau Israél, angat bud wen he sidek nmou bélê ye. Lemwót bè yóm angat nmou bélê ye ni, kem tau Israél, eles ye htifes bè yóm angat kdà ye bè solu yóm Dwata ye.”

¹³ Yakà Dwata se mò kul yó kem bulul ne dmimun du yóm lenos. Ne eles gel hetngónen bè tau yóm gel hendemen. Gbeken hembaling du kifu yóm layag hlafus. Du se gel mógów ta yó kem tey bulul bè klamangen benwu. Yó boluyen, duhen yóm sana Dwata hol gónó mogot, yóm Dwata laen dù là gbeken du.