Amus 3 - Udél Dwata: Gna Kesfasad ne Lomi Kesfasad

¹ Ó kem tau Israél, yóm sotu kmuleng deng tehe nwit Dwata hewà gu bè Idyip, hol hnungol ye yóm udélen ebélê ye, yó monen,

² “Bè kdê yó kem kmuleng talak tonok tek sónen yu yóm dou nélék. Yó gónóm mon là kô gbeku du ke là tnafaku kuy bè kdê yó kem sidek gel nmò ye.”

³ Gbek le slomong mógów kô yóm lewu kem tau ke là deng eles sentngón le du gna yóm gónó le e solu?

⁴ Gel mngel gu lem dlag kô yóm liyun ke là deng tonen du yóm kenfóen? Ne yóm ngà liyun, gbeken mngaw lem solen kô ke là deng wen kenfóen?

⁵ Bkó holot kô yóm onuk koyu ke laen dù fanen? Gbeken tódô bkó hkawang kô yóm holot ke laen dù bkóhen?

⁶ Wen kô là likoen ke gungol le yóm féw gel huni le ke wen gida sut bè benwu le? Wen kô hlayam gefet lem syudad ke là lemwóten bè Dwata?

⁷ Okóm yóm Dwata hol dandónen geta, là kô wen tagad nmoen lem blóng ye ke là nan ne eles hegfan du bè yó kem tugoden, duhen yó kem tóbóng lówóhen yóm angat nmoen.

⁸ Ke mngel yóm liyun, tau du de tô là likoen? Ke mudél yóm Dwata hol dandónen geta, tau du se là tmugod du yóm udélen?

Kegtuled yóm syudad Samarya

⁹ Ni mò eles heglalag ye bè yó kem tau malak bè Idyip ne bè syudad Asdod, mon ye mò kul, “Hol ye stifun bè yó kem bulul bè Samarya, tenngel ye yóm tey kesbewegen bè yóm benwu yó ne yóm tey kmò le sidek lemen yó kem tau Israél bè yó.”

¹⁰ Yó udél Dwata, monen, “Ni kem dou tau ni, là hulung le mò du yóm tedeng. Deng tódô hennok le yóm gónô bong yóm kimu hennagaw le ne hnugus le.

¹¹ Yó gónóm mon,” udél yóm Dwata hol dandónen geta, “angat gotu snibut yó kem hohon le yóm tonok le ne gotu genbà le yó kem tô seng le ne gotu nled le yó kem kimu henyu le lem yó kem gónó le gel heklung.”

¹² Yó bud udél Dwata, monen, “Lómón yóm tau semgyok ubiha, bè yóm ubihahen deng nsék liyun tek lewu tihen ne sfu yóm sotu klinguhen bud gafiten du. Lómón yó se là kwen guta yó kem tau Israél gewà bè Samarya, olo tek bangkù deng gbà nwit le ne sufà gónó tungô.

¹³ Ni mò hol hnungol ye ne hol heglalag ye bè yó kem sfu Jakub,” udél yóm sana Dwata hol gónó mogot, yóm Dwata laen dù là gbeken du.

¹⁴ “Bè yóm kdaw bang ktafaku yó kem tau Israél bè yó kem sidek deng gel nmò le, angat gotu genbau yó kem gónó le gel demsù bè Bétél. Yó kem hanga yóm gónó le gel demsù, angat gotu kenleng ne gotu btang ebè tonok.Angat gotu genbau yó kem tey gónô tilob hdà yó kem tau wen kendengen le, yóm gónô gónó le nô bè yóm bulónen tnaw ne yóm gónô gónó le nô bè yóm bulónen kinì. Gotu genbau yó kem gónô alì tilob klóónen. Kdê yó kem gónô lembang deng hdà le, angat gotu genbau. Ou se Dwata nim mudél ni.

¹⁵ Angat gotu genbau yó kem tey gónô tilob hdà yó kem tau wen kendengen le, yóm gónô gónó le nô bè yóm bulónen tnaw ne yóm gónô gónó le nô bè yóm bulónen kinì. Gotu genbau yó kem gónô alì tilob klóónen. Kdê yó kem gónô lembang deng hdà le, angat gotu genbau. Ou se Dwata nim mudél ni.”