Amus 1 - Udél Dwata: Gna Kesfasad ne Lomi Kesfasad

¹ Bè yóm tehe kogot Usiya yóm benwu Juda, yó fen mogot yóm benwu Israél duhen Jirubuam yóm ngà Jihuas logi. Bè yóm kdaw yó, wen hton Dwata ke Amus yóm tau gel semgyok ubiha bè yóm sotu benwu boluyen Tikwa. Yóm hton Dwata du gbak ebè yó kem tau Israél. Yóm kwen htonen du ni, lewu halay he duen gu laanen là deng mbel linol bong bè benwu le.

² Ni se kmò ktulón Amus du yóm deng tonen ne yóm deng gungolen, monen, “Yóm udél Dwata gu lem yóm Gónóen bè Bulul Sayun, hol lómón ke ngel liyun ne hol lómón ke lemték lemwót gu bè Jirusalim. Bè yóm kudélen yó tódô baling mékéng yó kem gónó gel hótób ubiha ne gotu menes yó kem bnes ta bulul Karmél.”

Kkukum Dwata yó kem benwu hmilol Israél ne yóm udélen eta benwu Siriya

³ Ni se udél Dwata, monen, “Deng tendo sensulit le mò sidek yó kem tau bè Damaskus, là gbeku du ke là tnafaku kul. Tey alì kehsidek le yó kem dou tau bè Gilyad, lómó kmò le kul lómón yóm halay knusu bala tók.

⁴ Yó gónóm mon, angat wen tey ofi hwitu ebè yóm gónô bong deng hdà Hasaél, gomong kenen yóm kdê gónó le gel heklung deng hdà Bin-hadad yóm tau mò tlesen.

⁵ Angat lenusoku yóm bak tikeb syudad Damaskus ne gotu hfatayu yó kem tauhen efet kól etu bè Datal Abén. Ne gotu genlau yóm tau malak kul bè Bét-édén. Yó kem tau bè Siriya gotu negef le lu mayuk etu bè Kir mò hesek le. Ou se Dwata nim mudél ni.”

Yóm udél Dwata ebè benwu Flistya

⁶ Yó bud udél Dwata, monen, “Deng tendo sensulit le mò sidek yó kem tau bè syudad Gasa, là gbeku du ke là tnafaku kul. Deng mom sulék hegef le lu mayuk yó kem dou tau tódô henek nô bè yó kem kul benwu lemnek, hbalù le lu mò hesek ebè yó kem tau Idom.

⁷ Yó gónóm mon angat wen tey ofi hwitu ebè yó kem beng yóm syudad Gasa, efet gotu kenen yóm kdê gónó le gel heklung bè yó.

⁸ Angat hnatayu yó kem tau bè syudad Asdod ne genlau yóm tau hol geta bè syudad Askilun. Angat tnafaku yóm syudad Ikrun efet le gotu matay yó kem dù Flistin tebel. Ou se yóm Dwata hol dandónen geta nim mudél ni.”

Yóm udél Dwata eta benwu Tayal

⁹ Yó bud udél Dwata, monen, “Deng tendo sensulit le mò sidek yó kem tau bè Tayal, là gbeku du ke là tnafaku kul. Deng mom genbà le yóm deng kesbilà le bè yó kem tau Israél. Mom hensulék hbalù le lu mò hesek etu bè Idom yóm kdê tau Israél tódô henek nô bè yó kem kul benwu lemnek.

¹⁰ Yó gónóm mon angat wen tey ofi hwitu ebè yó kem beng bè syudad Tayal ne gotu kenen yóm kdê gónó le gel heklung bè yó.”

Yóm udél Dwata eta benwu Idom

¹¹ Yó bud udél Dwata, monen, “Deng tendo sensulit le mò sidek yó kem tau bè Idom, là gbeku du ke là tnafaku kul. Deng mom ktes tnibó le yó kem kul dumu Israél, balù udì ke wen kodu le kul. Là kô olò nonol le du yóm kebut le kul, tódô henlós le efet laen dù sónen.

¹² Yó gónóm mon angat wen tey ofi hwitu ebè syudad Timan ne gotu kenen yóm gónó gel heklung bè syudad Busra.”

Yóm udél Dwata eta benwu Amun

¹³ Yó bud udél yóm sana Dwata hol gónó mogot, monen, “Deng tendo sensulit le mò sidek yó kem tau bè Amun, là gbeku du ke là tnafaku kul. Bè yóm kundug le ebè benwu Gilyad anì hlamang le yóm són tonok le, mom gotu snifal tnibó le yó kem libun mlutut bè yó.

¹⁴ Yó gónóm mon angat wen tey ofi hwitu ebè yó kem beng yóm syudad le boluyen Raba ne gotu kenen yóm kdê gónó le gel heklung bè yó. Ya tey angat kehsag yó kem sendalù hohon le bè yóm kesfatay le. Yóm uni le sfatay hol lómón ke lungkul lenos.

¹⁵ Yóm tau hol geta bè yó kem tau Amun ne yó kem genlalen, angat le gotu mung negef ebè benwu mayuk. Ou se Dwata nim mudél ni.”