3 Jan 1 - Udél Dwata: Gna Kesfasad ne Lomi Kesfasad

¹ Ou se yóm sotu tuha logi gónóhen lemwót nim sulat ni. Smulate ebéléem, Wè Gayus, yóm dou kenbong nawa.

² Ó Wè, gele mni bè Dwata béléem anì tendo hyu kógów klowilem, ne anì kemgis lem lówóhem, lómón yóm kekgis yóm kehtahuhem.

³ Tey kligalu bè yóm kegdek le dini yó kem dumu te hemtahu. Tulón le do yóm tey ketenebem bè yóm tahu tolok, ne segtón bè ktahuhen yóm gel nmoem.

⁴ Laen selen yóm gel kligalu sok gel gungolu yó kem ngau alì tilob klolò le yóm ktahuhen.

Yóm kdóyón Jan yóm nmò Gayus

⁵ Ó Wè, do dumu sogot nawa, tey gel ktenebem tmóbóng yó kem dumuhem hemtahu, baluen ke tau milo.

⁶ Bè yóm kkól le dini, tey ktulón le du bè simbahan yóm alì kbong nawahem kul. Béem tenflok yóm któbóngem kul bè yóm kógów le. Hol nmoem yóm tóbóng gónón hligal Dwata.

⁷ Abay se bè yóm kógów le yó, nwit le yóm kun tulón Krays, ne là kô le na a hetdof bè yó kem tau là hemtahuhen.

⁸ Yó se gónón hyu ke tekuy kem tau hemtahu fen temdof kul anì wen kut du bè yóm kwit le yóm tahu tolok.

Jutrifis ne Dimitriyus

⁹ Deng wen sulat ukol hwitu edyó ebè yó kem tau hemtahu bè yó, okóm là kenmón Jutrifis du yóm sulatu yó. Yó hol kóyóen ke són du mò tô gónó le galak yó kem tau bè yó.

¹⁰ Yó gónóm mon, sok wen lanu mógów edyó bélê ye, gotu benkasu lem blóng ye he yó kem gel nmoen, ne yóm alì sidek kbaken ebélê me, ne yóm kéng gel tulónen. Sotuhen, là dog gel hnódóhen kul yó kem dumu tau hemtahu lemwót bè benwu mayuk, lelen hemseng yó kem dumu tau hemtahu bè yó anì là hnódó le se kul. Ke hnódó le yó kem tau milo, là kô bud hfuseken kul bè simbahan.

¹¹ Ó Wè Gayus, béem dnalang kóm yóm nmò sidek. Yó dé dnalangem yóm hyu. Yóm tau gel hyu nmoen, yó se yóm tau deng nfun Dwata. Yóm tau gel sidek nmoen, là kô tngónen du Dwata.

¹² Tódô kdéen tau se gotu dmóyón ke Dimitriyus. Tódô gdilô bè yóm nmoen yóm tahu tolok gel loloen. Balù kum, sana gel kdóyón me du snéen, ne tódô tngónem se, tahu yóm gel mon me.

Hol són udél Jan bè nim sulat ni

¹³ Tey wen he duen yóm tô nóyô tulónu kóm, okóm là móyóe hemnô du lem sulat.

¹⁴ Kóyóu ke géhél wen lan te bud ston anì tódô te stulón.

¹⁵ Yó ne kóó, Dwata he hol tendo henek nawam. Yó kem kóm wè bè ni, gotu nólóm le u. Hol tulónem do bè yó kem kut wè bè yó yóm gel kólóm me kul.