2 Samwél 9 - Udél Dwata: Gna Kesfasad ne Lomi Kesfasad

Kehyu nawa Dabid ebè Mifibusét

¹ Sotu kdaw, smólók Dabid, “Wen kô tolo mowil bè yó kem fes lówó Sol anì tnóbóngu mò gónów hegfan du yóm nawahu ebè Junatan?”

² Wen sotu tau tehe tóbóng lówó Sol boluyen Siba, ne tinok le ebè Dabid. Yó mon Dabid mò du, “Uu kô Siba?” Bnalaen se, monen, “El, Sér, ou se.”

³ Yó bud snólók Dabid béléen, “Wen kô mowil bè kem fes lówó Sol mò gónóhu hegfan yóm kehyu nawa Dwata?” Bnalà Siba se, monen, “Wen sotu ngà Junatan tebel, bede kihod.”

⁴ Ne yó mon yóm tau hol geta, “Nô se kun du?” Bnalà Siba, monen, “Nô bè gónô Makir ngà Amyél bè benwu Lo-dibar.”

⁵ Tahu se, hangay Dabid gu bè gónô Makir.

⁶ Yó boluyen, Mifibusét ngà Junatan, témê Sol. Bè yóm kkólen bè Dabid, tódô hegdufok ebè seel bè solu Dabid, ya tey sidek klikoen. Yó mon Dabid mò du, “Uu kô Mifibusét?” Bnalaen se, monen, “Ou se yóm sotu tóbóng lówóhem.”

⁷ Okóm yó udél Dabid ebéléen, monen, “Hol béi abay hlikò. Yó gónóhu hangay kóm anì wen lanu hegfan du béléem yóm kehyu kmò lemwót bè yóm deng tehe fasadu ke maem Junatan. Bud huléku ebéléem yóm kdê tonok tehe nfun téméem Sol, ne tódói nô béléu bè ni bè gónô bongu.”

⁸ Tódô hegluduk Mifibusét bè solu Dabid, monen, “Tmau do de ke lómón ni yóm tey kehyu kmoem ebéléu, igoen hol lómón ke ou yóm ohu deng matay?”

⁹ Omin Dabid tminok ke Siba, ne monen mò du, “Deng gotu bud blayu ke Mifibusét témê yóm tehe amohem Sol, yóm kdê tehe nfunen dalang se yóm kul nfun yó kem fes lówóhen.

¹⁰ Uu ne yó kem ngaem ne yó kem tóbóng lówóhem mò fen mò nmò bè yóm tonoken anì wen ken yó kem fes lówóhen. Okóm ke Mifibusét, tódô nô béléu bè ni bè gónô bongu.” Yóm Siba monen ni, botong sfolò limu ngaen logi ne lewu folò kem tau tóbóng lówóhen.

¹¹ Ne yó balà Siba yóm tau hol geta, monen, “El, Sér, gotu nmou kdê yó kem deng monem.” Tódô lenwóten bè yóm kdaw yó, keseflós Mifibusét mung mken bè Dabid, hol lómón ke hol kun ngà Dabid.

¹² Yóm Mifibusét ni, wen ngaen logi boluyen Mika. Tódô kdê yó kem fes lówó Siba, gotu baling tóbóng lówó Mifibusét.

¹³ Lemwót ke Mifibusét yóm tau kihod, tódô mili ebè Jirusalim, hlós nô bè gónô bong Dabid. Là gomongen bè nili yóm tsaptér 10. Yó tulónen bè yóm tsaptér ni yóm kungol Dabid yóm katay Nahas yóm tau hol geta bè yó kem tau Amunayt. Nim Nahas ni, tehe tnóbóngen Dabid bè yóm tehe kehlóyen ke Sol, ne là kô klifót Dabid du yóm nmoen yó. Bè yóm kungol Dabid du yóm katayen, wen kem tau hógówen ebè Hanun, yóm ngà Nahas logi. Okóm tikóng le gdek bè Hanun yó kem tau hógów Dabid yó koni, deng mom hekfóen lu ne ya tey sidek kehyak le kul ofo kul mon du ke kem tau hmilung bè benwu le. Timbow tngón Dabid yóm nmò le yó, yó gónón hógów yó kem sendaluen anì na le e gnida yó kem tau Amunayt yó. Tikóng glileb yó kem tau Amunayt yóm tô kgida Dabid kul yó, yó gónó le tminok lewu folò libu sendalù Aramiyan mò tmóbóng kul. Okóm senged nóm là kô le gemmò bè le Dabid, ne baling le gnô lem hólól Dabid yó kem tau Amunayt.