2 Samwél 7 - Udél Dwata: Gna Kesfasad ne Lomi Kesfasad

Yóm Fasad Dwata ke Dabid

¹ Bè yóm deng khenek Dabid bè gónóen, ne deng henek Dwata kbenwuhen, laen dù bud hohonen mundug du,

² omin Dabid tminok ke Natan, yóm tugod Dwata ne monen mò du, “Ngem, fene nô bè nim tey gónô tilob nmò bè koyu sidar, okóm yóm Slungan Dwata fen nô bè yóm gónô nmò le bè kulit ógóf.”

³ Ne yó balà Natan yóm tau hol geta, monen, “Yó ne, nmoem yóm kdê nô bè nawahem, yakà nóen béléem Dwata.”

⁴ Okóm bè yóm kifu yó, wen udél Dwata ebè Natan, monen,

⁵ “Lemwóti, wen htulónu kóm bè Dabid yóm tóbóng lówóhu, monem mò du, ‘Ni se udél Dwata ebéléem, Uu kô hemdà béléu gónô mò gónóhu nô?

⁶ Nbuten bè yóm kdaw tehe kehewau yó kem tau Israél gu bè Idyip efet nim kmoen ni, là kóe nô bè gónô se do, són bè yóm gónô nmò le gu bè kulit ógóf gel nwit le mógów gónóhu gel nô.

⁷ Bè kdê yó kem benwu gónó le e gel mili yó kem tau Israél, balù sulék ke denge tmalaw bè yó kem tmuha gel malak kul, yó kem tuha hesegyoku yó kem tauhu ke tô monu mò kul, “Moen ke là hemdà ye béléu gónô tilob nmò bè sidar?” ’

⁸ Duhen ni, tulónem ke Dabid yóm tau tóbóng lówóhu, monem mò du, ‘Ni se udél yóm Dwata laen dù là gbeken du. Deng tehe nwahu uu bè yóm gónóm gel semgyok ubiha, ne néléku uu mò malak yó kem tauhu Israél.

⁹ Ket gónóhem e solu, elese tendo nô béléem, ne gotu genlau yóm kdê hohonem bè ket kesfatayem. Ne ni, htótólu boluyem bè klamangen benwu lómón któtól boluy yóm tau alì mfasang talak tonok.

¹⁰ Ne deng wen benwu blayu kul yó kem tauhu Israél mò gónó le hlós nô. Lómón ke huluhu lu tahen anì wen mdengen kul benwu, ne laen kô dù bud hmala kul bè yó. Là bud hen-gnok le kul ne yó kem tau hono sidek nmò le lemwót bè dumu benwu, lómón yóm tehe deng gel nmò le bélê le,

¹¹ lenwóten bè yóm kdaw tehe kkól le bè ni, bè yóm kdaw kwen kem tau kmukum néléku mò malak yó kem tauhu Israél. Henbalingu menek kbenwu le, laen dù bud hohon le mundug kul. Lelen yó he, ni se bud udél Dwata ebéléem, tendo wen bè yó kem sfuhem seflós mogot benwu tmodol béléem.

¹² Ke dengi matay, ne lebeng le uu bè gónó le lembeng yó kem tehe fuem, angat sotu bè yó kem ngaem fen temles kóm, ne hbegelu yóm kogoten benwu.

¹³ Du se angat hemdà du yóm dou gónô, yóm gónô mit du yóm dou boluy. Ne angat hbegelu yóm kogoten benwu ne laen dù tul sónen.

¹⁴ Ou se angat maen, ne du se angat ngau. Ke wen salà nmoen, tnafaku lómón ktafak mà yóm ngaen logi bede hlanu bè yó kem dumu benwu hmilol.

¹⁵ Okóm là kô kóhu du yó dum alì kbong nawahu du, là lómón yóm tehe kkóhu yóm kbong nawahu ke Sol, botong kóhu anì uu mò tlesen.

¹⁶ Yóm kogotem benwu efet kól bè yó kem sfuhem, laen kô dù sónen bè soluhu, ne tey mbegel yóm kegeta ye.’ ”

¹⁷ Tahu se, mulék ebè Dabid Natan, ne gotu tulónen du yóm kdê htulón Dwata du.

Kdóyón Dabid ke Dwata

¹⁸ Omin Dabid yóm tau hol geta husek elem yóm gónón nô yóm Slungan Dwata, ne myón bè yó bè solu Dwata, ne mni monen, “Ó Dwata yóm Dwata hol dandónen geta, tmau do de dalang se yó kem fes lówóhu ke lómón ni yóm deng nmoem béléu?

¹⁹ Ne ni, Dwata yóm Dwata hol dandónen geta, deng mom bud tennuem he ni kem deng nmoem béléu ni, duhen yóm kwen fasadem do gbak ebè yó kem semfu gu béléu elem hulin kdaw. Ó Dwata, deng duhen ni kô yóm kóm gel kmò ebè tau?

²⁰ Tedu se tô bud dumu udélu ebéléem du, Dwata yóm Dwata hol dandónen geta, yakà deng gotu tngónem du yóm dou kmò, yóm kóm tóbóng lówó.

²¹ Lemwót bè kóm kóyô wen fasadem do, ne deng gotu nmoem ni kem tey tennga ni, ne deng gotu hetngónem do.

²² Teyi mfasang Dwata, uu se yóm Dwata hol dandónen geta. Laen dù semnged kóm, laen dù dumu Dwata, són uu. Laen dù deng hnikót gungol me he ke wen dwata semnged kóm. Tek sónen u yóm deng hol kum klingu mungol du.

²³ Tau du se mkél bè yó kem tauhem Israél, yó kem tau deng tehe nsokem bè yóm keghesek le mò hol kóm nfun. Deng tey kehtótólem boluyem bè yóm kehwaem kul gu bè Idyip. Tey dê hentaw ton yóm deng nmoem bélê le, ne deng gotu lohem yó kem dumu tau tô hemseng kul, gomong yó kem dwata kéng le.

²⁴ Ne deng hbegelem yó kem tauhem Israél mò hol kóm nfun ne laen dù tul sónen, ne deng uu se baling hol kul Dwata.

²⁵ Duhen ni, Dwata yóm sana Dwata hol gónó mogot, hendohoem yóm deng fasadem do dalang se bè yó kem fes lówóhu, lómón yóm deng monem.

²⁶ Angat tey megdóyón yóm boluyem ne laen kô dù tul sónen, ne yó angat mon yó kem tau, ‘Yóm kul Dwata yó kem tau Israél, Dwata laen dù là gbeken du.’ Ne angat tey kehbegelem du bè soluhem yóm kgeta yó kem sfu Dabid yóm tau tóbóng lówóhem.

²⁷ Ó Dwata yóm Dwata laen dù là gbeken du, yóm Dwata yó kem tau Israél, deng wen hetngónem dou, yóm tau tóbóng lówóhem, deng tulónem do, monem, ‘Angat wen tau hol geta tendo semfu gu béléem.’ Yó gónóm mon, laen dù klikou mni du béléem nim hnihu ni.

²⁸ Yakà uu du se yóm Dwata hol dandónen geta. Hono tahu yó kem udélem, ne deng fasadem do, yóm tau tóbóng lówóhem nim tey hyu ni.

²⁹ Duhen ni, ke hyu béléem hol nuyagem ou dalang se yó kem fes lówóhu anì laen dù tul sónen yóm kegeta me bè soluhem. Abay se uu yóm Dwata hol dandónen geta, laen kô dù tul sónen ke wen tau nuyagem.” Là gomongen bè nili yóm tsaptér 8. Yó tulónen bè nim tsaptér ni yóm kalak Dabid yó kem sendaluen ebè gida, yóm kesgida le yó kem tau Idom, ne kem tau Muab, ne kem tau Amunayt, ne kem tau Flistin, ne kem tau Amalikayt ne yó kem dumu hohon le. Bè yóm gel kesgida le yó, sal le gel gemmò le Dabid, ne gwa le yóm benwu gónó le gemmò yó. Bè ni gónón dohò yóm tehe fasad Dwata ke Abraham ekni gbak bè klamang yóm tonok le. Udélen ebélê le bè Hol Kbuten 15:18, ne bè Bok Hlau Dwata 11:24, ominen bè Juswa 1:4 monen, “Yó gónón gkilil yóm tonok yó, lenwóten fi leged bè yóm benwu laen hol wen tauhen efet kól fi bwak yóm bulul Libanun. Yó bud kililen fi dmata kdaw, lenwóten bè Él Yufratis, hnalaken benwu yó kem tau Hitayt efet kól bè Mohin Miditiranyan fi desdef.” Ne bud tulónen bè nim tsaptér ni snéen yóm tey ktilob kwit Dabid yó kem tau nogoten.