2 Samwél 6 - Udél Dwata: Gna Kesfasad ne Lomi Kesfasad

Kwit le yóm Slungan Dwata ebè Jirusalim

¹ Omin Dabid gotu bud semtifun kul yó kem sendalù Israél alì hulung mit sfatay, ne yó kwen le, botong tlu folò libu.

² Gotu nwit Dabid lu etu bè Baala yóm benwu snakuf Juda anì na le e nwa ebè yó yóm Slungan Dwata yóm bnoluy le Slungan yóm Dwata laen dù là gbeken du, yóm Dwata nô lem blóng yóm lewu kem lennged sirubim deng sù le ta yóm Slungan Dwata.Yóm Slungan Dwata yó, nwa le bè gónô Abinadab ta yóm ngà bulul, omin le lemulón du ta yóm klitun hanà lomi. Yó fen mit du yóm klitun yó, duhen yóm lewu kem ngà Abinadab logi, boluy le Usa ne Ahiyu.

³ Yóm Slungan Dwata yó, nwa le bè gónô Abinadab ta yóm ngà bulul, omin le lemulón du ta yóm klitun hanà lomi. Yó fen mit du yóm klitun yó, duhen yóm lewu kem ngà Abinadab logi, boluy le Usa ne Ahiyu.

⁴ Fen mógów tukô gna yóm klitun Ahiyu.

⁵ Yó nmò Dabid ne yóm kdéen tau Israél, gotu le hligal madal bè solu Dwata, tódô hotu le gel le mung du sngal le ne yóm kdê gel nuni le, wen se kenbit le, ne wen se knokot le, ne wen se sentutuk le bè yóm igò le mógów.

⁶ Tikóng le kól bè yóm gónón gel kmusu halay Nakon, tlokob yó kem safì mit klitun, ne tódô nogot Usa yóm Slungan Dwata anì là btangen.

⁷ Ya tey kebut Dwata ke Usa lanen mogot yóm Slungan, ne tódô hnatayen Usa bè yó klohok yóm Slunganen.

⁸ Ne tey kebut Dabid bè yóm alì kebut Dwata ke Usa yó, yóm tódô kekto khatayen du. Ne yó gónó le hlós moluy du Pérés-usa yóm benwu yó efet nim kmoen ni.

⁹ Bè yóm kdaw yó, tey sidek klikò Dabid ke Dwata, yó hendemen, “Tedu se tô kmò kwitu du du yóm Slungan Dwata anì nô béléu?”

¹⁰ Là dog dohò nwiten du ebè yóm kun syudad bè Jirusalim ne yóm Slungan Dwata yó, mom nwiten ebè gónô Ubid-idom bè Gat.

¹¹ Botong tlu bulónen na nô bè gónô Ubid-idom yóm Slungan Dwata yó, ne tey któbóng Dwata ke Ubid-idom dalang se yó kem fes lówóhen.

¹² Tikóng wen tmulón du ke Dabid yóm tey któbóng Dwata yó kem fes lówó Ubid-idom dalang se yóm kdê nfunen lemwót bè yóm knóen bélê le yóm Slungan Dwata, ne bè yóm kungol Dabid du, yó gónón bud mangay yóm Slungan Dwata, ne nwiten ebè yóm kun syudad bè Jirusalim. Ya tey kehligal le bè yóm bud kwit le du.

¹³ Tikóng deng nem dulék le lemafang yó kem tau mit yóm Slungan Dwata, na le htengen mdà, nahen na hedsù safì tudu ebè Dwata Dabid, ne sotu ngà safì mabù.

¹⁴ Tódô hotu Dabid gelen madal bè solu Dwata, leseken yóm nes bukay gel lesek yóm tau gel blóng ebè Dwata boluyen ifod.

¹⁵ Yó kmò kwit Dabid ne yóm kdéen tau Israél du yóm Slungan Dwata, mung du yóm tey hensag le, lel le huni yó kem tey féw.

¹⁶ Yóm khuseken elem syudad yóm Slungan Dwata yó, temngel tembó beng Mikal yóm ngà Sol libun yehen Dabid. Tikóng tonen Dabid hkak ne madal bè solu Dwata, ne tey kekliten du.

¹⁷ Ngangen nwit le elem yóm syudad yóm Slungan Dwata yó ebè yóm gónô deng eles hefdà Dabid mò hlun gónón nô. Omin Dabid hedsù yó kem dsù hkekeb ebè Dwata ne yó kem dsù mit sefyu ebè Dwata.

¹⁸ Tikóng deng kehedsù Dabid yó kem yó, ominen mni bè Dwata bè yó kem tau Israél hlanen bè boluy yóm Dwata laen dù là gbeken du.

¹⁹ Ominen bemlay yóm kdéen tau Israél, logi duhen libun, ket sotu mambang tahà, ne wen ngà utónen, ne ket sfunges yóm bungu grép deng hendaw. Omin le gotu mulék yóm kdê le.

²⁰ Bè yóm kulék Dabid ebè gónóen anì nan e mni bè Dwata bè yó kem fes lówóhen, senlong Mikal yóm ngà Sol libun yehenen, ne yó monen mò du, “Étey, tey kehtótólen yóm kun boluy kemdaw ni yóm tau hol geta bè Israél. Tódô htonen knóen lem blóng yó kem libun tóbóng lówó yó kem genlalen, lómón kmò yóm tau laen dù kenyaken.”

²¹ Yó udél Dabid ebè Mikal, monen, “Ebè Dwata yóm dou gónó e madal, yóm Dwata deng mélék dou mò malak yó kem tauhen Israél. Là maem du se deng néléken, duhen ke wen bè yó kem fes lówóhen. Yó gónóhu alì hligal madal lómón yóm tau laen dù kenyaken mò gónów hegfan du bè Dwata yóm tey kligalu.

²² Ne bud hol tennuu he yóm kehyaku knóu bè nim nmou ni. Ke béléem, henyaku knóu, okóm bè ni kem libun monem ni, dóyón le ou kul.”

²³ Duhen yó, yóm klawi Mikal mowil yóm ngà Sol libun, atil se kun.