2 Samwél 24 - Udél Dwata: Gna Kesfasad ne Lomi Kesfasad

Kehsó Dabid boluy yó kem tau Israél ne kem tau Juda

¹ Kogolen bè yó, tey bud kebut Dwata kul yó kem tau Israél, ne hsóhen lu ke Dabid mò lan Dabid hemsidek kul, monen, “Yó ne, gotu nsóhem lu yó kem tau Israél ne kem tau Juda.”

² Tahu se, dók yóm tau hol geta Juab yóm kmandér bè yó kem sendaluen, monen mò du, “Mógówi ebè klamang Israél lenwóten bè Dan fi bwak efet kól etu bè Birsiba fi leged, gotu listahem lu yó kem tau anì tngónu ke hilu tau nô bè yó.”

³ Okóm yó balà Juab yóm tau hol geta, monen, “Yó hem sana kóm Dwata hol gónó mogot hlowil kóm efet deng bud lematu dulék kwen le yó kem tau nogotem. Okóm moen du ke hmoem nim ni?”

⁴ Okóm alì hlan yóm tau hol geta yóm kun kóyô bè le Juab ne bè yó kem genlalen bè yó kem sendaluen, yó gónó le lemwót na le e nsó yó kem tau Israél.

⁵ Yó gna nmò le, nifal le yóm Él Jurdan, ne nbut le msó tau bè benwu Aror ne hlós le ebè yóm benwu nô bè gónón sóól yóm datal yó, omin le bud hlós msó yó kem tau nô bè tonok yóm tehe Gad, ne omin le bud hlós ebè yóm sotu benwu fi bwak boluyen Jasér.

⁶ Omin le hlós ebè Gilyad efet le kól bè Kadis, yóm benwu nô bè tonok yó kem tau Hitayt. Ne omin le bud hlós ebè Dan, omin le hlós fi desdef etu bè Sidon.

⁷ Omin le hlós fi leged bè yóm benwu wen tey bengen duhen Tayal, ne hlós le ebè yó kem syudad yó kem tau Hibayt ne kem tau Kanan. Hol sónen, hlós le ebè Birsiba, yóm benwu hol fi leged bè Juda.

⁸ Timbow deng gotu lenibut le yóm klamang benwu gónó le nô yó kem tau Israél, omin le semfulék ebè Jirusalim. Ne yó kegen le mò du yóm nmò le yó, syóm bulón bud lewu folò kdaw.

⁹ Gotu tulón Juab yóm tau hol geta yóm kdê tau lista le. Bè benwu Israél, yó kwen kem logi deng hulung mogot sudeng, botong wolu latu libu, ne limu latu libu bè Juda.

Ktafak Dwata yóm salà Dabid

¹⁰ Kogol yóm deng gotu kehlista Dabid boluy yó kem tau, gefet béléen yóm ksidek kegnómen du bè yóm nmoen yó, ne yó monen mò ke Dwata, “Ó Dwata, denge tey gemsalà béléem bè yóm deng nmou ni. Hol hnifótem ou bè nim tey ungel nmou ni.”

¹¹ Hlafus hayahen bè yó, wen udél Dwata ebè Gad yóm tugoden wen gel htonen du, monen mò du,

¹² “Mógówi ebè Dabid, tulónem du, ‘Ni se udél Dwata ebéléem. Wen tlu gónóhu hélék kóm, méléki du sotu mò tafaku kuy, ne nmou béléem.’ ”

¹³ Tahu se, mógów ebè Dabid Gad, ne snólóken, “Mahi du se nélékem bè ni kem ni? Yóm tlu halay kbel bitil bong bè benwuhem kô, duhen ke tlu bulón ye tendo mlóy lan le kemtes kuy yó kem hohon ye, duhen ke tlu kdawen msut bè benwuhem yóm tey des mit hatay? Hol hendemem ne, ominem tmulón du dou yóm nélékem anì bud tulónu ke Dwata.”

¹⁴ Omin Dabid mon du mò ke Gad, “Tey sidek kgelen béléu se nim ni. Mom hyu ne ke Dwata tmafak kum, abay se hulung kmodu. Bée dou ke tau tmafak do.”

¹⁵ Tahu se, tódô nbuten bè yóm hlafus yó wen tey des mit hatay hwit Dwata ebè yó kem tau Israél efet tlu kdaw. Botong hitu folò libu tau matay lenwóten bè benwu Dan fi bwak efet kól bè benwu Birsiba fi leged.

¹⁶ Okóm timbow tô genlà yóm hógów Dwata mit hatay yóm syudad Jirusalim, bud mayuk nawa Dwata kul bè yóm alì kehsideken yó kem tau, Yó monen bè yóm hógówen, “Geblaen yó ne, béem bud henlós.” Bè yóm kudél Dwata ebè yóm hógówen yó, lemwót yóm hógów Dwata yó tódô nô bè yóm gónón gel kmusu Arauna yóm tau Jibusayt.

¹⁷ Timbow ton Dabid yóm hógów Dwata mit hatay, yó monen mò ke Dwata, “Ou se yóm deng gemsalà béléem, ne bud ou se mò du yóm sidek. Okóm kul ni kem tau ni, hol lómón ke ubiha le, laen dù sidek nmò le. Ou ne tnafakem homongem yó kem fes lówóhu.”

Kehdà Dabid yóm gónó demsù

¹⁸ Bè yóm kdaw yó, mógów ebè Dabid Gad, yóm tugod Dwata, ne monen mò du, “Lemwóti ne, hemdai gónó demsù ebè Dwata bè yóm gónón gel kmusu Arauna yóm tau Jibusayt.”

¹⁹ Tahu se, lemwót Dabid loloen yóm hlolò Dwata du hlanen bè Gad.

²⁰ Tikóng ton Arauna yóm tau hol geta gu ditu mung du yó kem genlalen, ominen semlong du ne tódô hegdufok ebè tonok bè soluhen.

²¹ Yó mon Arauna mò du, “Na, Sér, nógówem ni du?” Bnalà Dabid se, monen, “Mógówe edini anì naw e benli yóm gónóhem gel kmusu mò gónów hemdà gónó demsù ebè Dwata anì tenflok Dwata yóm kehwiten ebè yó kem tau yóm des mit hatay.”

²² Omin Arauna mon du mò ke Dabid, “Tódô nwahem nô kihu nóyóem, Sér, mò dsuem. Ni wen kem safì mò dsù hkekebem ebè Dwata, ne nwahem se yó kem yok le ne yó kem koyu kusu halay mò snukem yóm dsuem.

²³ Gotu blayu kóm ni kem ni, ne Dwata he hol hemmóyô yóm dsuem, yóm sana kóm Dwata hol gónó mogot.”

²⁴ Okóm yó udél yóm tau hol geta ebè Arauna, monen, “Benlihu lu béléem. Là gbeku demsù du ebè Dwata yóm dsù hkekeb ke laen dù blihu du.” Tahu se, benli Dabid yóm gónó kmusu ne yó kem safì bè limu folò botù blówón bukay.

²⁵ Hefdà gónó demsù ebè Dwata bè yó Dabid, ominen demsù yóm dsù hkekeb ne yóm dsù mit sefyu ebè Dwata. Ne bnalà Dwata yóm hnihen, ne teflok se yóm des mit hatay bè yó kem tau Israél.