2 Samwél 23 - Udél Dwata: Gna Kesfasad ne Lomi Kesfasad

Hol són udél Dabid

¹ Ni se hol són udél Dabid. “Udél yóm ngà Jisi yóm tau deng hegeta Dwata, yóm deng nélék yóm kun Dwata Jakub, yóm tau mò lingón bè Israél.

² Wen hudélen do yóm Tulus Dwata. Nô lem baku yó kem udélen.

³ Mudél ebéléu yóm Dwata yó kem tau Israél, yóm Dwata gónó le tendo gel heklung, monen, ‘Yóm tau mogot benwu, ke tedeng kwiten kukum, ne ke wen klikoen ke Dwata,

⁴ hol lómón ke du yóm layag bè kinalen mwas, lómón ke du yóm mata kdaw gel btù hlafus laen dù lobun hemseng du, Heslinangen yó kem bnes deng héfê bè kulón.’

⁵ Deng nélék Dwata yóm dou fes lówó. Yakà deng wen fasaden do, yóm fasad laen dù sónen, fasad mdengen, lelen wen hgeten. Tendo knudung Dwata o anì laen dù hemenu, ne anì wen gónón e kól yó kem nmou.

⁶ Okóm kul yó kem tau là hemtahu le bè Dwata, hol lómón kmò le yóm koyu semnual, tódô bot le, yakà hnalien du yóm tau tô mulut du.

⁷ Yó nmò yóm tau tô mulut du yóm koyu semnual yó, uluten du bala tók duhen ke dol buyus, tódô sulék nlóben lu bè yóm gónó le masà.”

Yóm tlu kem sendalù Dabid alì hulung sfatay

⁸ Ni se boluy yó kem sendalù Dabid alì hulung sfatay. Tanayen, Juséb-basébét tau lemwót bè Takimun. Du geta bè yóm tlu kem sendalù Dabid alì hulung sfatay. Botong wolu latu tau ndeken buyus bè sotu kesgida le.

⁹ Tmodol béléen yóm sotu bè yóm tlu kem sendalù alì hulung sfatay yó koni, duhen Ilisar ngà Doday, sfu Ahuwa. Du se tehe mung ke Dabid bè yóm kesfatay le yó kem Flistin deng eles stifun mit sfatay bélê le. Lemwót yó kem dumu sendalù Israél, deng le gotu mlóy.

¹⁰ Fen là kun ke Ilisar, tódô henlelen hmatay kul sudeng yó kem Flistin efet là bud gbeken kmayang sigelen ne là bud gbeken lemkas tdoken bè subeng yóm sudeng nogoten. Hegmò Dwata lu bè yóm kdaw yó. Song le bud semfulék ebè Ilisar yó kem sendalù Israél deng mlóy, deng deng yóm kesgida le ne olo le megef yóm kdê ton le bè lówó yó kem Flistin deng matay.

¹¹ Todol bè Ilisar, duhen Sama ngà Agi yóm tau lemwót bè Harar. Bè yóm tehe kestifun le bè Lihi yó kem Flistin na le e kundug yó kem tau Israél bè yóm uma hono blotung huluhen. Gotu le mlóy yó kem sendalù Israél,

¹² okóm ke Sama kun, tódô mdà tebel bè yó bè gónón sóól blotung, ne hnatayen yóm kdê sendalù Flistin sut bè yó. Duhen yó, tey bud kehegmò Dwata kul bè yóm kdaw yó.

¹³ Bè yóm sotu kdaw bè bulón muta tehe knô Dabid bè kilib Adulam, ne fen le kmamfù bè Datal Rifaim yó kem Flistin, yóm tlu kem sendalù yó koni yóm tehe mógów ebè Dabid bè yóm kilib yó. (Nim tlu sendalù ni, gomong le bè yóm tlu folò kem sendalù nélék Dabid alì hulung sfatay.)

¹⁴ Bè yóm kdaw tolo kehebnos Dabid bè yóm kilib yó, deng gled kem Flistin yóm benwu Bitlihim.

¹⁵ Yó mon Dabid bè yóm tlu kem tauhen yó, “Tey hyu béléu ke wen él mò ninumu lemwót bè yóm kokol alì hyu élen moni bè bak tikeb bè Bitlihim.”

¹⁶ Ominen yóm tlu kem sendalù alì hulung sfatay yó hganag holo elem blóng yó kem sendalù Flistin na le e mangay él bè Bitlihim bè yóm kokol moni bè bak tikeb yóm benwu yó, ne nwit le ebè Dabid. Okóm là kô ninum Dabid du, deng mom koken bè yó bè solu Dwata.

¹⁷ Yó monen, “Là, Dwata, là gbeku minum du nim él ni, abay se lómón kebtesen litô yó kem tau tódô hamà le klowil le bè yóm kwa le du béléu nim él ni.” Duhen yó, là kô ninum Dabid du yóm él yó. Yó se deng nmò yóm tlu kem sendalù Dabid alì hulung sfatay.

Yóm tlu folò kem sendalù Dabid bud alì hulung sfatay

¹⁸ Yó fen kmandér bè yóm tlu folò kem sendalù Dabid hulung sfatay duhen, Abisay ngà Siruwaya, dumun setwoli Juab. Botong tlu latu kem sendalù hohon le ndeken buyus bè sulék kesgida le. Yó gónón gomong bud tótól se kun lómón yóm tlu kem sendalù Dabid alì hulung sfatay.

¹⁹ Lemwót bè yóm któtólen senta yóm tlu folò, yó gónón baling kmandér le, okóm là gmungen bè yóm tlu kem sendalù alì hulung sfatay.

²⁰ Sotuhen, duhen Binaya ngà Jihuyada, yóm sendalù hulung sfatay lemwót bè Kabsil. Tey wen se kun hnatay, botong hnatayen yóm lewu sendalù Muab alì hulung sfatay bè kdê sendalù le. Sotu kdaw, botong ktesen yóm sotu liyun elem sol bè yóm kdawen kmulón snu. Balù yóm tey kedel tonok botong hnatayen yóm liyun yó.

²¹ Sotu kdaw, olon bogul nogoten botong hnatayen yóm sotu sendalù Idyip alì bong lelen tahà wen buyus nogoten. Tódô nalaw Binaya béléen yóm buyus nogoten, ne deken du, ne matay yóm sendalù Idyip yó.

²² Ni se sotu bè kdê yó kem gel nmò Binaya ngà Jihuyada, ne gónón gomong tótól bè yóm tlu folò kem sendalù alì hulung sfatay.

²³ Du se tótól senta yóm tlu folò, ne nélék Dabid mò kmandér bè yó kem sendalù gel mentey du. Okóm là gomongen bè yóm tlu kem sendalù alì hulung sfatay. Là gomongen bè nili yóm bérs 24 efet kól bè 39. Yó tulónen, wen kem dumu sendalù he mung bè yóm tlu folò kem sendalù bud nélék Dabid alì hulung sfatay bè Israél. Sotu bélê le, duhen Uraya yóm tau Hitayt hfatay Dabid, yehen Batsiba.